വാഴപ്പഴം നമ്മള്‍ നിത്യേന കഴിക്കുന്ന ഒരു പഴമാണ്. എല്ലാവരുടെയും വീട്ടില്‍ വാഴപ്പഴം ഉണ്ടാവാറുമുണ്ട്. കാരണം ഇതിന് വിലക്കുറവുള്ളതു തന്നെ. മാത്രമല്ല ഏതു സീസണിലും ലഭിക്കുകയും ചെയ്യും. സാധാരണക്കാരന്‍ ഒരു ദിവസം തിരഞ്ഞെടുക്കുന്ന പഴങ്ങളില്‍ ഒന്നാണ് വാഴപ്പഴം. നേന്ത്രപ്പഴം, റോബസ്റ്റ, മൈസൂര്‍പഴം, ഞാലിപ്പൂവന്‍ തുടങ്ങി പല പേരിലും പഴങ്ങളുണ്ട്.

ഇതിന്റെയൊക്കെ ഗുണത്തിലും വ്യത്യാസമുണ്ട്. ഇതില്‍ ഏറ്റവും മുന്നില്‍ നില്‍ക്കുന്ന പഴമാണ് ഏത്തപ്പഴം അഥവാ നേന്ത്രപ്പഴം. ഇതില്‍ മൂന്നു തരത്തിലാണ് കാര്‍ബോഹൈഡ്രേറ്റുകളുള്ളത്. ഗ്ലൂക്കോസ്, ഫ്രക്‌റ്റോസ്, സുക്രോസ് എന്നിവയാണിത്. ബി കോംപ്ലക്‌സ് വിറ്റാമിനുകള്‍ നിറഞ്ഞതും ഇരുമ്പ് സത്തും നാരും പൊട്ടാസ്യവും ഇതില്‍ കൂടുതലായുണ്ട്. അതുകൊണ്ട് തന്നെ നല്ല ഊര്‍ജം നല്‍കുന്ന പഴവുമാണ് ഏത്തപ്പഴം. 

പഴങ്ങള്‍ എപ്പോള്‍ എങ്ങനെയാണ് കഴിക്കേണ്ടത്?

ഭക്ഷണം കഴിച്ചു കഴിഞ്ഞാല്‍ ആമാശയത്തില്‍ കുറച്ചു കൂടി സ്ഥലമുണ്ടെന്നു കരുതി ഒന്നോ രണ്ടോ പഴങ്ങള്‍ കൂടി കഴിക്കുന്നവരാണ് നമ്മള്‍. എന്നാല്‍ പഴങ്ങള്‍ കഴിക്കേണ്ടത് ആഹാരത്തിനു ശേഷമല്ല, ആഹാരത്തിനു മുമ്പാണ് നിങ്ങള്‍ പഴങ്ങള്‍ കഴിക്കേണ്ടത്. വെറും വയറ്റില്‍ ഇങ്ങനെ കഴിക്കുന്ന പഴങ്ങള്‍ ശരീരത്തിലെ വിഷാംശങ്ങളെ നശിപ്പിക്കുകയും കൂടുതല്‍ ഊര്‍ജം പ്രദാനം ചെയ്യുകയും ചെയ്യുന്നു.  

വാഴപ്പഴം ഒരു ഇന്‍സ്റ്റന്റ് എനര്‍ജി ബൂസ്റ്റര്‍ കൂടിയാണ്. ദഹനം മെച്ചപ്പെടുത്താനും രോഗപ്രതിരോധ ശേഷി വര്‍ധിപ്പിക്കാനുമൊക്കെ മികച്ചതുമാണ്. എന്നാല്‍ പഴം കഴിക്കുന്നത് കൊണ്ട് ജലദോഷം, പനി ലക്ഷണങ്ങള്‍ വഷളാക്കുമെന്ന് ചിലരെങ്കിലും വിശ്വസിക്കുന്നു.

വാഴപ്പഴം ആരോഗ്യത്തിന് ഏറെ ഗുണം ചെയ്യുന്നുണ്ടെങ്കിലും പനിയും ജലദോഷവും ഉള്ള സമയത്ത് വാഴപ്പഴം കഴിച്ചാല്‍ കഫം കൂടാന്‍ കാരണമാകുന്നു എന്നു പറയപ്പെടുന്നു. എന്നു വച്ച് വാഴപ്പഴത്തെ രോഗകാരണമാക്കുന്ന രീതി ശരിയല്ലെന്നും
ആരോഗ്യ വിദഗ്ധര്‍ പറയുന്നുണ്ട്.

വൈറസ് മൂലമാണ് പനിയും ജലദോഷവും നമുക്ക് ഉണ്ടാകുന്നത്. നിങ്ങള്‍ക്ക് ജലദോഷം ഉള്ളപ്പോഴാണ് പഴം കഴിക്കുന്നതെങ്കില്‍ കഫം കൂടാന്‍ കാരണമായേക്കാം. എന്നാല്‍ രോഗകാരി പഴമല്ല.  

എന്നാല്‍ നിങ്ങള്‍ക്ക് ജലദോഷമുള്ളപ്പോള്‍ വെളുത്തുള്ളി, മഞ്ഞള്‍, ബദാം, നെല്ലിക്ക, നാരങ്ങ, മധുരക്കിഴങ്ങ് എന്നിവ കഴിക്കുന്നത് നല്ലതാണ്. ഇവ ശരീരത്തെ ചൂടാക്കി നിര്‍ത്താന്‍ സഹായിക്കുന്നതുമാണ്.