ദുബൈ: മേഖലയിലെ യുദ്ധ സമാനമായ സാഹചര്യത്തെ തുടര്‍ന്ന് നിര്‍ത്തി വച്ചിരുന്ന വ്യോമഗതാഗതം പുനഃരാരംഭിച്ചെങ്കിലും പല അറബ് നഗരങ്ങളിലേക്കുമുള്ള വിമാന സര്‍വീസുകള്‍ റദ്ദാക്കുന്നത് തുടര്‍ന്ന് ഗള്‍ഫ് എയര്‍ലൈനുകള്‍. ഇന്നലെ ഇറാനും ഇസ്‌റാഈലും തമ്മില്‍ വെടിനിര്‍ത്തല്‍ കരാറില്‍ എത്തിയിരുന്നു. ഖത്തറിലെ യുഎസ് താവളത്തിനെതിരെ ഇറാന്‍ നടത്തിയ ആക്രമണത്തെ തുടര്‍ന്ന് ഭാഗികമായി അടച്ച ജിസിസി വ്യോമാതിര്‍ത്തികള്‍ തുറക്കുകയും ചെയ്തിരുന്നു. എങ്കിലും മേഖലയിലെ സുരക്ഷാ മുന്നറിയിപ്പുകളും മറ്റും കണക്കിലെടുത്താണ് എയര്‍ലൈനുകള്‍ പല ഇടങ്ങളിലേക്കുമുള്ള സര്‍വീസുകള്‍ റദ്ദാക്കുന്നത്.

ALSO READ: മേഖലയില്‍ സ്ഥിരതയും സമാധാനവും ഉറപ്പാക്കും; യുഎഇയുടെ ഷെയ്ഖ് മുഹമ്മദ് ഇറാന്‍ പ്രസിഡന്റിനെയും ഖത്തര്‍ അമീറിനെയും വിളിച്ചു

ദുബൈ ആസ്ഥാനമായ എമിറേറ്റ്‌സ് ടെഹ്‌റാന്‍ ബാഗ്ദാദ്, ബസ്‌റ എന്നിവിടങ്ങളിലേക്കുള്ള വിമാന സര്‍വീസുകള്‍ 2025 ജൂണ്‍ 30 വരെ നിര്‍ത്തിവച്ചതായി അറിയിച്ചു. 

അതേസമയം, ഫ്‌ലൈദുബൈ, ഇറാന്‍, ഇറാഖ്, സിറിയ, സെന്റ് പീറ്റേഴ്‌സ്ബര്‍ഗ് എന്നിവിടങ്ങളിലേക്കുള്ള സര്‍വീസുകള്‍ ജൂണ്‍ 30 വരെ റദ്ദാക്കിയതായി പ്രഖ്യാപിച്ചു. 'സ്ഥിതിഗതികള്‍ ഞങ്ങള്‍ സൂക്ഷ്മമായി നിരീക്ഷിക്കുന്നു, യാത്രക്കാരുടെയും ജീവനക്കാരുടെയും സുരക്ഷയാണ് ഞങ്ങളുടെ മുന്‍ഗണന,' എയര്‍ലൈന്‍ വ്യക്തമാക്കി.

അബൂദബി ആസ്ഥാനമായ ഇത്തിഹാദ് എയര്‍വേസ്, ടെല്‍ അവീവിലേക്കുള്ള വിമാനങ്ങള്‍ 2025 ജൂലൈ 15 വരെ നിര്‍ത്തിവച്ചിരിക്കുകയാണ്. ടെല്‍ അവീവിലേക്ക് അബൂദബി വഴി കണക്ടിങ് ഫ്‌ലൈറ്റുകളുള്ള യാത്രക്കാരെ യാത്രയുടെ തുടക്ക സ്ഥലത്ത് നിന്ന് സ്വീകരിക്കില്ലെന്നും ഇത് ബാധിക്കപ്പെടുന്ന യാത്രക്കാര്‍ക്ക് ബദല്‍ യാത്രാ ക്രമീകരണങ്ങള്‍ നല്‍കുന്നുണ്ടെന്നും എയര്‍ലൈന്‍ അറിയിച്ചു.

ALSO READ: വന്‍ വിസാ തട്ടിപ്പ്: ദുബൈ കോടതി 21 പേരെ ശിക്ഷിച്ചു; പിഴയിട്ടത് 25.21 മില്യണ്‍ ദിര്‍ഹം

വിസ് എയര്‍ അബൂദബി, യുഎഇയിലേക്കും തിരിച്ചുമുള്ള വിമാനങ്ങള്‍ ജൂണ്‍ 30 വരെ റദ്ദാക്കി. ഷാര്‍ജ ആസ്ഥാനമായ എയര്‍ അറേബ്യ, ഇറാന്‍, ഇറാഖ്, റഷ്യ, അര്‍മേനിയ, ജോര്‍ജിയ, അസര്‍ബൈജാന്‍ എന്നിവിടങ്ങളിലേക്കും തിരിച്ചുമുള്ള സര്‍വീസുകള്‍ ജൂണ്‍ 30 വരെ താല്‍ക്കാലികമായി നിര്‍ത്തിവച്ചിരിക്കുകയാണ്. ജോര്‍ദാനിലേക്കുള്ള വിമാനങ്ങള്‍ ജൂണ്‍ 26 വരെ റദ്ദാക്കിയിട്ടുണ്ട്.

Even after the Iran-Israel ceasefire comes into effect, international flight disruptions and cancellations continue, affecting travelers across the region.