അബൂദബി: രാജ്യത്തെ കുറഞ്ഞുവരുന്ന ജനനനിരക്ക് മറികടക്കാന്‍ ഫെഡറല്‍ ഫെര്‍ട്ടിലിറ്റി സെന്റര്‍ സ്ഥാപിക്കാന്‍ ഒരുങ്ങി യുഎഇ. വന്ധ്യതാ പ്രശ്‌നങ്ങള്‍ നേരിടുന്ന ഇമാറാത്തി പൗരന്മാര്‍ക്ക് നൂതന ചികിത്സകള്‍ നല്‍കി ദേശീയ ജനനനിരക്ക് ഉയര്‍ത്തുകയാണ് ലക്ഷ്യം. ബുധനാഴ്ച അബൂദബിയില്‍ നടന്ന ഫെഡറല്‍ നാഷണല്‍ കൗണ്‍സില്‍ (എഫ്എന്‍സി) സെഷനില്‍ വെച്ച് കുടുംബ മന്ത്രി സന സുഹൈലാണ് പദ്ധതി പ്രഖ്യാപിച്ചത്.

ALSO READ: യുകെയിലെ പിസ്സ ഡെലിവറി ബോയ് യുഎഇയിലൊരു സാമ്രാജ്യം പണിത കഥ; ആരെയും പ്രചോദിപ്പിക്കുന്ന ജേസന്റെ ജീവിതം

ആരോഗ്യ മന്ത്രാലയവും എമിറേറ്റ്‌സ് ഹെല്‍ത്ത് സര്‍വീസസും ചേര്‍ന്നാണ് സെന്റര്‍ വികസിപ്പിക്കുന്നത്. പ്രാഥമിക ആരോഗ്യ കേന്ദ്രങ്ങളില്‍ പ്രത്യുത്പാദന കൗണ്‍സിലിംഗും ഫെര്‍ട്ടിലിറ്റി സേവനങ്ങളും സംയോജിപ്പിക്കാന്‍ പദ്ധതി ലക്ഷ്യമിടുന്നു. 

'ഫെര്‍ട്ടിലിറ്റിയും പ്രത്യുത്പാദന ആരോഗ്യവും ദേശീയ മുന്‍ഗണനയാണ്,' സുഹൈല്‍ പറഞ്ഞു. 2025 അവസാനത്തോടെ ദേശീയ തന്ത്രം പ്രഖ്യാപിക്കുമെന്നും അവര്‍ വ്യക്തമാക്കി.

2015നും 2022നും ഇടയില്‍ ഇമാറാത്തികള്‍ക്കിടയിലെ ജനനനിരക്ക് 11% കുറഞ്ഞതായി കണക്കുകള്‍ വെളിപ്പെടുത്തുന്നു. അതേസമയം പ്രവാസികളുടെ ജനനനിരക്ക് 5% വര്‍ധിച്ചു. 2022ല്‍ ഇമാറാത്തികള്‍ക്കിടയില്‍ 30,889 ജനനങ്ങളും പ്രവാസികള്‍ക്കിടയില്‍ 65,762 ജനനങ്ങളുമാണ് രേഖപ്പെടുത്തിയത്. 

'25 വര്‍ഷത്തിനുള്ളില്‍ ഇമാറാത്തികള്‍ ജനസംഖ്യയുടെ 10%ന് താഴെയാകും,' എഫ്എന്‍സി അംഗം സുല്‍ത്താന്‍ അല്‍ സാബി മുന്നറിയിപ്പ് നല്‍കി.

പ്രസവാവധി, മുലയൂട്ടല്‍ അവകാശങ്ങള്‍, ശിശുസംരക്ഷണ അവധി, വിദൂര ജോലി നയങ്ങള്‍ എന്നിവ പരിഷ്‌കരിക്കാന്‍ കൗണ്‍സില്‍ 15 ശുപാര്‍ശകള്‍ അംഗീകരിച്ചു. ഫെര്‍ട്ടിലിറ്റി ചികിത്സകള്‍ക്ക് ഇന്‍ഷുറന്‍സ് പരിരക്ഷയും വടക്കന്‍ എമിറേറ്റുകളില്‍ സേവനങ്ങള്‍ വിപുലീകരിക്കാനും ആവശ്യപ്പെട്ടു.

വിവാഹ പ്രായം വര്‍ധിക്കുന്നതും യുവാക്കള്‍ക്ക് വിവാഹത്തോടുള്ള വിമുഖതയും ആശങ്കയായി ഉയരുന്നുണ്ട്. 

'30 വയസ്സിന് ശേഷം വിവാഹം ചെയ്യുന്നവര്‍ കൂടുന്നത് ഫെര്‍ട്ടിലിറ്റിയെ ബാധിക്കുന്നു,' ഡോ. ഹമോസ അല്‍ ഷെഹി ചൂണ്ടിക്കാട്ടി. ജീവിതശൈലി, പുകവലി, ജീവിതച്ചെലവ്, ഭവന പരിമിതികള്‍ എന്നിവയും ചര്‍ച്ചയായി.

ALSO READ: റാസല്‍ഖൈമയില്‍ ഉണ്ടൊരു നെല്‍ കര്‍ഷകന്‍: പ്രതിവര്‍ഷം ഉല്‍പ്പാദിപ്പിക്കുന്നത് 60 കിലോഗ്രാം നെല്ല്; നെല്‍പ്പാടത്ത് ഇന്ത്യയുടെ 'ബസുമതിയും'

'കുടുംബങ്ങളെ പിന്തുണക്കുന്നത് ദേശീയ നിക്ഷേപമായി കാണണം,' എഫ്എന്‍സി അംഗം മുഹമ്മദ് ഹസ്സന്‍ അല്‍ ദഹൂരി ആവശ്യപ്പെട്ടു. സോഷ്യല്‍ മീഡിയ വഴി ബോധവല്‍ക്കരണവും കുടുംബ മൂല്യങ്ങള്‍ പ്രോത്സാഹിപ്പിക്കലും തന്ത്രത്തിന്റെ ഭാഗമാണെന്ന് സുഹൈല്‍ വ്യക്തമാക്കി.

In response to the falling birth rate among Emirati citizens, the UAE government plans to establish a federal fertility center. The initiative aims to support national families through advanced reproductive care and boost population growth.