തിരുവനന്തപുരം: സംസ്ഥാന പൊലിസ് മേധാവിയെ നിശ്ചയിക്കാനുള്ള ചുരുക്കപ്പട്ടിക തയാറാക്കാന്‍ യു.പി.എസ്.സി ഇന്ന് യോഗം ചേരാനിരിക്കെ സര്‍ക്കാര്‍ അയച്ച പട്ടികയില്‍ ഉള്‍പ്പെട്ട എ.ഡി.ജി.പി എം.ആര്‍ അജിത്കുമാറിനെതിരേ സിപി.ഐ.  
എം.ആര്‍ അജിത് കുമാറിനെ ഡി.ജി.പിയാക്കുന്നതിലെ വിയോജിപ്പ് പരസ്യമാക്കി സി.പി.ഐ സംസ്ഥാന സെക്രട്ടറി ബിനോയ് വിശ്വം തന്നെ രംഗത്തെത്തി. 

എം.ആര്‍ അജിത്ത് കുമാര്‍ പൊലിസ് മേധാവിയാകാന്‍ വഴിയില്ലെന്ന് ബിനോയ് വിശ്വം പറഞ്ഞു. മന്ത്രി വിളിച്ചാല്‍ ഫോണ്‍ എടുക്കാത്ത ഒരാള്‍ എങ്ങനെ പൊലിസ് മേധാവിയാകുമെന്നും അദ്ദേഹം ചോദിച്ചു. 

ALSO READ: ആരാകും പുതിയ സംസ്ഥാന പൊലിസ് മേധാവി; നിര്‍ണായക യോഗം ഇന്ന്

തൃശൂര്‍ പൂരത്തിനിടെ പ്രശ്‌നങ്ങള്‍ ഉണ്ടായപ്പോള്‍ സംസ്ഥാനത്തെ ഒരു മന്ത്രി ഒരുവട്ടം അല്ല, പലവട്ടം ഫോണ്‍ വിളിച്ചാല്‍ എടുക്കാന്‍ തയാറാകാത്ത ഒരാള്‍ ആര്‍.എസ്.എസ് നേതാക്കളെ ഒരു വട്ടം അല്ല, പല വട്ടം കാണാന്‍ പോകുന്നയാള്‍, എന്നിങ്ങനെ പലവിധ കാരണങ്ങളാല്‍ പലപ്പോഴും ആരോപണ വിധേയനായ ആള്‍ കേരളത്തിലെ പൊലിസ് തലപ്പത്ത് എത്താന്‍ സാധ്യതയില്ലെന്നും ബിനോയ് വിശ്വം പറഞ്ഞു.

ആര്‍.എസ്.എസ് നേതാക്കളെ അങ്ങോട്ടുപോയി കണ്ട ഒരാള്‍ പൊലിസ് തലപ്പത്ത് വരുമെന്ന് നിങ്ങളൊക്കെയാണ് പറയുന്നത്. എന്നാല്‍, താന്‍ അങ്ങനെ പറയില്ല. അതിന് സാധ്യത കുറവാണ്. കേരളം ഭരിക്കുന്നത് ഇടതുപക്ഷ സര്‍ക്കാരാണ്. ആ സര്‍ക്കാരിന് ഇത്തരം കാര്യങ്ങളെ ഗൗരവത്തോടെ കാണാന്‍ കെല്‍പുണ്ടെന്നും അദ്ദേഹം കൂട്ടിച്ചേര്‍ത്തു.