ഉജ്ജയിൻ (മധ്യപ്രദേശ്): മധ്യപ്രദേശിലെ ഉജ്ജയിനിൽ ജഗന്നാഥ രഥയാത്രയ്ക്കിടെ മസ്ജിദിലേക്ക് അക്രമികൾ ചെരിപ്പ് എറിഞ്ഞ സംഭവത്തിന്റെ വീഡിയോ വൈറലായതോടെ നഗരത്തിൽ സംഘർഷാവസ്ഥ. വെള്ളിയാഴ്ച രാത്രി നടന്ന ഈ സംഭവം മുസ് ലിം സമുദായാംഗങ്ങൾക്കിടയിൽ രോഷം വിതച്ചു. ധാബ റോഡിലെ ജഗദീഷ് ക്ഷേത്രത്തിൽ നിന്ന് ആരംഭിച്ച രഥയാത്ര ഗോപാൽ ക്ഷേത്രം സന്ദർശിച്ച ശേഷം മടങ്ങവെ, ഛത്രി ചൗക്ക് മേഖലയിലെ മസ്ജിദിന് സമീപം കൂടി കടന്നുപോകുമ്പോഴാണ് സംഭവം. വൈറലായ വീഡിയോയിൽ, ഘോഷയാത്ര കടന്നുപോകുന്നതിനിടെ മസ്ജിദിലേക്ക് മൂന്ന് തവണ ചെരിപ്പുകൾ എറിയുന്നത് വ്യക്തമാണ്.

സംഭവത്തിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിച്ചതോടെ, ഖര കുവാൻ പൊലീസ് സ്റ്റേഷന് പുറത്ത് വലിയ ജനക്കൂട്ടം പ്രതിഷേധവുമായി തടിച്ചുകൂടി. മുദ്രാവാക്യങ്ങൾ മുഴക്കിയ പ്രതിഷേധക്കാർ, ഈ പ്രവൃത്തി മനഃപൂർവം സാമുദായിക ഐക്യം തകർക്കാൻ ലക്ഷ്യമിട്ടതാണെന്ന് ആരോപിച്ചു. കുറ്റവാളികളെ കണ്ടെത്തി കർശന ശിക്ഷ നൽകണമെന്ന് ആവശ്യപ്പെട്ട് വീഡിയോ തെളിവായി പൊലീസിന് കൈമാറി.

അഡീഷണൽ പൊലീസ് സൂപ്രണ്ട് നിതേഷ് ഭാർഗവ് പരാതി ലഭിച്ചതായും അന്വേഷണം ആരംഭിച്ചതായും സ്ഥിരീകരിച്ചു. "സാമൂഹിക വിരുദ്ധർ  ആരാധനാലയത്തിലേക്ക് വസ്തു എറിഞ്ഞതായി റിപ്പോർട്ട് ലഭിച്ചിട്ടുണ്ട്. കുറ്റവാളികളെ കണ്ടെത്താൻ സിസിടിവി ദൃശ്യങ്ങൾ പരിശോധിക്കുകയാണ്," ഉജ്ജൈൻ പൊലീസ് സൂപ്രണ്ട് പ്രദീപ് ശർമ്മയുടെ ഓഫീസ് എക്സിൽ വ്യക്തമാക്കി.

നഗരത്തിൽ ഇസ്കോൺ ക്ഷേത്രത്തിന്റെയും ഖാതി സമുദായത്തിന്റെയും രണ്ട് രഥയാത്രകൾ നടന്നിരുന്നു. സംഭവം ഖാതി സമുദായത്തിന്റെ യാത്രയ്ക്കിടെയാണ് ഉണ്ടായതെന്നാണ് വിവരം. ഉജ്ജൈനിന്റെ മതപരമായ പവിത്രത കാത്തുസൂക്ഷിക്കാൻ കർശന നടപടി വേണമെന്ന് ഉജ്ജൈൻ ഖാസി ഖാലിഖ്-ഉർ-റഹ്മാൻ ആവശ്യപ്പെട്ടു. ഇത്തരം പ്രകോപനപരമായ പ്രവൃത്തികൾ നഗരത്തിന്റെ സാമുദായിക ഐക്യത്തിന് ഭീഷണിയാണ്," അദ്ദേഹം പറഞ്ഞു. ഭാരതീയ ന്യായ സംഹിതയിലെ വകുപ്പുകൾ പ്രകാരം അജ്ഞാത വ്യക്തികൾക്കെതിരെ കേസ് രജിസ്റ്റർ ചെയ്തതായി ഖര കുവാൻ പൊലീസ് സ്റ്റേഷൻ ഇൻചാർജ് രാജ്കുമാർ മാളവ്യ അറിയിച്ചു. കുറ്റവാളികളെ തിരിച്ചറിഞ്ഞ് അറസ്റ്റ് ചെയ്യുമെന്നും അദ്ദേഹം ഉറപ്പുനൽകി.

നഗരത്തിൽ സമാധാനം നിലനിർത്താൻ കനത്ത പൊലീസ് സന്നാഹം വിന്യസിച്ചിട്ടുണ്ട്. സെൻസിറ്റീവ് മേഖലകളിൽ പട്രോളിംഗ് ശക്തമാക്കാൻ ഉജ്ജൈൻ എസ്പി നിർദേശം നൽകി. പ്രകോപനപരമായ ഉള്ളടക്കം പങ്കിടാതിരിക്കാനും സംശയാസ്പദ പ്രവർത്തനങ്ങൾ റിപ്പോർട്ട് ചെയ്യാനും പോലീസ് പൊതുജനങ്ങളോട് അഭ്യർത്ഥിച്ചു. എക്സ്, യൂട്യൂബ് തുടങ്ങിയ പ്ലാറ്റ്ഫോമുകളിൽ വീഡിയോ വ്യാപകമായി പ്രചരിച്ചതോടെ, ഓൺലൈനിൽ രൂക്ഷമായ പ്രതികരണങ്ങൾ ഉയർന്നു. സംഭവം സാമുദായിക ഐക്യം തകർക്കാനുള്ള ശ്രമമാണെന്ന് ചിലർ സംശയിക്കുന്നു. അന്വേഷണം പുരോഗമിക്കുകയാണ്.