ദുബൈ: കഴിഞ്ഞ ദിവസമാണ് യുഎഇയിൽ വേനൽ അവധിക്ക് ശേഷം സ്കൂളുകൾ തുറന്നത്. പത്തുലക്ഷത്തിലധികം വിദ്യാർത്ഥികളാണ് സ്‌കൂളുകളിലേക്ക്  എത്തിയത്. യുഎഇ പ്രസിഡന്റ് മുതൽ താഴെക്കിടയിലുള്ള പൊലിസുകാർ വരെ നിരവധി പേരാണ് രാജ്യത്തെ വിദ്യാർത്ഥികൾക്ക് ആശംസയുമായി രം​ഗത്തെത്തിയത്. 

ഇതിനിടെ തന്റെ സ്കൂൾ കാലത്തെ ഓർത്തെടുത്തിരിക്കുകയാണ് ദുബൈ കിരീടാവകാശിയും യുഎഇ പ്രതിരോധ മന്ത്രിയുമായ ഷെയ്ഖ് ഹംദാൻ. അക്കാദമിക് ലോകത്തെ ഉത്സാഹിയായ ഒരു വിദ്യാർത്ഥി എന്ന നിലയിൽ തന്റെ ജീവിതത്തിലെ അപൂർവ ചിത്രങ്ങളും സ്കൂൾ കാലത്തെക്കുറിച്ചുള്ള ഓർമയും അദ്ദേഹം സോഷ്യൽ മീഡിയയിൽ പങ്കുവെച്ചു.

ALSO READ: ആശുപത്രിയില്‍ വെച്ച് ഗര്‍ഭസ്ഥ ശിശു മരിച്ചു; 47 ലക്ഷം രൂപ നഷ്ടപരിഹാരം നല്‍കാന്‍ ഉത്തരവിട്ട് കോടതി 

"സ്കൂളിലെ എന്റെ ആദ്യ ദിവസം എനിക്ക് ഇപ്പോഴും ഓർമ്മയുണ്ട്. ഞാൻ ഒരു കുട്ടിയായിരുന്നു, പക്ഷേ എന്റെ സ്വപ്നങ്ങൾ വളരെ വലുതായിരുന്നു," ദുബൈ കിരീടാവകാശിയും ഉപപ്രധാനമന്ത്രിയും പ്രതിരോധ മന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം സമൂഹമാധ്യമങ്ങളിൽ കുറിച്ചു.

ജിജ്ഞാസയുള്ള ഒരു വിദ്യാർത്ഥിയിൽ നിന്ന് സ്കൂളുകൾ സന്ദർശിക്കുകയും വിദ്യാർത്ഥികളെ പ്രോത്സാഹിപ്പിക്കുകയും ചെയ്യുന്ന ഒരു മുതിർന്ന വ്യക്തിയിലേക്കുള്ള തന്റെ യാത്രയെക്കുറിച്ചുള്ള പഴയകാല ഫോട്ടോകളും അദ്ദേഹം പങ്കുവെച്ചു.

രാജ്യത്തിന്റെ ഭാവി രൂപപ്പെടുത്തുന്നതിൽ വിദ്യാഭ്യാസത്തിന്റെ പ്രാധാന്യവും ഷെയ്ഖ് ഹംദാൻ എടുത്തുറഞ്ഞു: "അറിവ് പ്രകാശമാണ്, നമ്മൾ ഒരുമിച്ച്  ഉന്നതിയിലേക്ക് ​ഗമിക്കും." ഓരോ പുതിയ അധ്യയന വർഷവും ഒരു പുതിയ സ്വപ്നത്തിന്റെ പിറവിയെ പ്രതിനിധീകരിക്കുന്നുവെന്ന് അദ്ദേഹം കൂട്ടിച്ചേർത്തു.

തന്റെ സ്വകാര്യ ജീവിതത്തിലെ അപൂർവവും മനോഹരവുമായ ചില ഫോട്ടോകളും വിഡീയോകളും ദുബൈ കിരീടാവകാശിയായ ഷെയ്ഖ് ഹംദാൻ ഇടയ്ക്കിടെ പങ്കുവെക്കാറുണ്ട്. 

ALSO READ: ദിബ്ബ അൽ ഹിസ്ൻ കോട്ടയ്ക്ക് യുനെസ്‌കോ പൈതൃക പദവി തേടി ഷാർജ 

രണ്ട് വർഷം മുമ്പ്, തന്റെ ഹൈസ്കൂൾ കാലത്തെ മൂന്ന് സുഹൃത്തുക്കളെ കണ്ടുമുട്ടിയ സന്തോഷം ഷെയ്ഖ് ഹംദാൻ പങ്കുവെച്ചിരുന്നു. അന്ന് അദ്ദേഹം പോസ്റ്റ് ചെയ്ത സെൽഫി സോഷ്യൽ മീഡിയയിൽ വൈറലായിരുന്നു.

"ഹൈസ്കൂൾ റീയൂണിയൻ! സ്കൂൾ ബോയ്സ്" എന്ന ലളിതമായ അടിക്കുറിപ്പോടെയുള്ള ചിത്രം വളരെപ്പെട്ടെന്നാണ് സോഷ്യൽ മീഡിയാ ഉപയോക്താക്കളുടെ ഹൃദയം കവർന്നത്.

Dubai's Crown Prince Sheikh Hamdan reminisces about his school days, sharing rare childhood photos and inspiring words: "I was a small child, but my dreams were big." Explore his nostalgic journey and insights.