ഷാര്‍ജ: വീടിന്റെ സൗകര്യത്തില്‍ ഇരുന്നു കൊണ്ടുതന്നെ സ്ത്രീകള്‍ക്ക് വരുമാനം നേടാനായി രൂപകല്‍പന ചെയ്ത 'മോംസ് ആന്‍ഡ് വൈവ്‌സ്' ആപ്പിന് ഷാര്‍ജ എക്‌സ്‌പോ സെന്ററില്‍ നടന്ന ചടങ്ങില്‍ തുടക്കമായി. ഡോ. എം.കെ മുനീര്‍ എം.എല്‍.എ, രാജ്യാന്തര സഞ്ചാരി സന്തോഷ് ജോര്‍ജ് കുളങ്ങര എന്നിവരുടെ സാന്നിധ്യത്തില്‍ ചലച്ചിത്ര താരങ്ങളായ കുഞ്ചാക്കോ ബോബന്‍, ആസിഫലി, മംമ്ത മോഹന്‍ദാസ്, നവ്യ നായര്‍ എന്നിവരും, ജുമൈല ദില്‍ഷാദ്, മോംസ് ആന്‍ഡ് വൈവ്‌സ് സി.ഇ.ഒ മുഹമ്മദ് ദില്‍ഷാദ് എന്നിവരും ചേര്‍ന്നായിരുന്നു സമാരംഭം കുറിച്ചത്.

പല കാരണങ്ങളാല്‍ സ്വപ്‌നങ്ങളെയും ഇഷ്ടങ്ങളെയും പിന്തുടരാന്‍ സാധിക്കാതിരുന്നവര്‍ക്കായി അവ നടപ്പാക്കാനും വരുമാനം നേടാനും സാമ്പത്തിക നേട്ടത്തിനൊപ്പം സാമൂഹിക ഉന്നമനം കൂടി നേടാനും ഇതുകൊണ്ടു സാധിക്കുന്നുവെന്ന് മുഹമ്മദ് ദില്‍ഷാദ് പറഞ്ഞു. വീട്ടിലെ ജോലിയുടെ ശേഷി മനസിലാക്കണമെങ്കില്‍ നമ്മള്‍ ചൈനയെ പഠിക്കണമെന്നും, അവിടത്തെ ഓരോ വീടും ഓരോ ബിസിനസ് ഹബ്ബാണെന്നും പറഞ്ഞ ദില്‍ഷാദ്, നമ്മുടെ സ്ത്രീകള്‍ക്ക് അവരുടെ കഴിവുകള്‍ ഏതുമാകട്ടെ, അവ വിപണനം ചെയ്ത് വരുമാനം ഉണ്ടാക്കാവുന്ന, ആഗോള സ്ത്രീ കൂട്ടായ്മയുടെ ഭാഗമാകാന്‍ സാധിക്കുന്ന തരത്തില്‍ അവരെ സാമ്പത്തികമായ സ്വാതന്ത്ര്യത്തിലേക്കും ഉയര്‍ന്ന ജീവിത നിലവാരത്തിലേക്കും മാറ്റുക എന്നതാണ് ഇതുവഴി ഉദ്ദേശിച്ചിട്ടുള്ളതെന്നും വ്യക്തമാക്കി. കുഞ്ചാക്കോ ബോബന്‍, എം.കെ മുനീര്‍, സന്തോഷ് ജോര്‍ജ്, മംമ്ത തുടങ്ങിയവര്‍ ആപ്പിന്റെ ഗുണ സവിശേഷതകളെ കുറിച്ച് സംസാരിച്ചു. 

രമേഷ് പിഷാരടി, അനാര്‍ക്കലി മരിക്കാര്‍, നേഹ നാസ്‌നിന്‍ എന്നിവരും ചടങ്ങില്‍ പങ്കെടുത്തു. ആര്‍ജെ മിഥുനും രഞ്ജിനി ഹരിദാസും അവതാരകരായ പരിപാടിയില്‍ ഗായികമാരായ സിതാര കൃഷ്ണ കുമാറും ശിവാംഗി കൃഷ്ണ കുമാറും സംഘവും ഗാനങ്ങളും റംസാന്‍ മുഹമ്മദും സാനിയ ഇയ്യപ്പനും നൃത്തവുമവതരിപ്പിച്ചു. മോംസ് ആന്‍ഡ് വൈവ്‌സ് അപ്പ് സ്റ്റോറിലും പ്ലേ സ്റ്റോറിലും ലഭ്യമാണ്. നേരത്തെ എക്‌സ്‌പോ സെന്ററില്‍ നടന്ന വാര്‍ത്താസമ്മേളനത്തില്‍ അഖില്‍, ജൈസല്‍ എന്നിവര്‍ സംബന്ധിച്ചു.