ഷാര്‍ജ: അറേബ്യന്‍ ഉപദ്വീപില്‍ ആദിമ മനുഷ്യര്‍ താമസിച്ചിരുന്നുവെന്നതിന്റെ തെളിവുകള്‍ ഗവേഷകര്‍ കണ്ടെത്തി. ജബല്‍ ഫായയില്‍ നിന്ന് 80,000 വര്‍ഷം പഴക്കമുള്ള ഉപകരണങ്ങളാണ് പുരാവസ്തു ഗവേഷകര്‍ കണ്ടെത്തിയത്. 210,000 വര്‍ഷക്കാലം തുടര്‍ച്ചയായി ഈ മേഖലയില്‍ മനുഷ്യ സാന്നിധ്യം ഉണ്ടായിരുന്നുവെന്ന് ഇത് വെളിപ്പെടുത്തുന്നതായി ഗവേഷകര്‍ വ്യക്തമാക്കുന്നു. ആര്‍ക്കിയോളജിക്കല്‍ ആന്‍ഡ് ആന്ത്രോപോളജിക്കല്‍ സയന്‍സസ് ജേണലില്‍ പ്രസിദ്ധീകരിച്ച കുറിപ്പുകളിലാണ് ഇക്കാര്യങ്ങള്‍ വിശദീകരിക്കുന്നത്.

 

 

ആദിമ മനുഷ്യര്‍ (ഹോമോ സാപിയന്‍സ്) അറേബ്യയിലൂടെ കടന്നു പോകുക മാത്രമല്ല, ദീര്‍ഘ കാല വാസ സ്ഥലങ്ങള്‍ ഈ മേഖലയില്‍ സ്ഥാപിക്കുകയും, പ്രദേശത്തിന്റെ കാലാവസ്ഥയുമായി പൊരുത്തപ്പെടുകയും പുതിയ ഉപകരണ നിര്‍മാണ സാങ്കേതിക വിദ്യകള്‍ വികസിപ്പിക്കുകയും ചെയ്തുവെന്നാണ് പുതിയ കണ്ടെത്തലുകള്‍ സൂചിപ്പിക്കുന്നത്. ഷാര്‍ജ ആര്‍ക്കിയോളജി അതോറിറ്റി ജര്‍മനിയിലെയും യു.കെയിലെയും സര്‍വകലാശാലകളുമായി സഹകരിച്ചാണ് ഈ അന്താരാഷ്ട്ര ഗവേഷണ പദ്ധതി നടപ്പാക്കിയത്. ജര്‍മന്‍ റിസര്‍ച്ച് ഫൗണ്ടേഷനും ഹൈഡല്‍ബര്‍ഗ് അക്കാദമി ഓഫ് സയന്‍സസും ഈ ഗവേഷണ പദ്ധതിക്ക് ധനസഹായം നല്‍കി.

യുനെസ്‌കോക്ക് സമര്‍പ്പിക്കാനായി അല്‍ ഫായ സൈറ്റിന്റെ അതിര്‍ത്തികള്‍ നിര്‍ണയിച്ച മാപ്

 

മറൈന്‍ ഐസോടോപ് സ്റ്റേജ് 5എ (MIS 5a) സാങ്കേതിക വിദ്യ അവലംബിച്ചാണ് മനുഷ്യ സാന്നിധ്യം തിരിച്ചറിഞ്ഞത്.

ഉപകരണങ്ങളുടെ സവിശേഷത 

'ബൈ ഡയരക്ഷണല്‍ റിഡക്ഷന്‍' എന്ന സങ്കീര്‍ണമായ ഉപകരണ നിര്‍മാണ സാങ്കേതിക വിദ്യയാണ് ജബല്‍ ഫായ നിവാസികള്‍ ഉപയോഗിച്ചിരുന്നത്. കല്ലു കൊണ്ടുള്ള ഉറപ്പുള്ള പാളികളുടെ രണ്ടറ്റത്തും കൃത്യമായി രാകി മിനുക്കി മൂര്‍ച്ചയുള്ളതും നീളമേറിയതുമായ കത്തികളും സമാനമായ മറ്റ് ആയുധങ്ങളും അവര്‍ ഉണ്ടാക്കിയിരുന്നു.

 

 

ഒരു പാചകക്കാരന്‍ മത്സ്യത്തില്‍ നിന്ന് ശ്രദ്ധാപൂര്‍വം മാംസം (ഫില്ലറ്റ്) വേര്‍തിരിച്ചെടുക്കുന്നത് പോലെ സൂക്ഷ്മമായാണ് ഇത് ചെയ്തിരുന്നതെന്ന് ഗവേഷകന്‍ ഡോ. ബ്രെറ്റ്‌സ്‌കെ പറയുന്നു. ഉപയോഗക്ഷമമായ കല്ലുകള്‍ കാര്യക്ഷമതയോടെ വിനിയോഗിക്കുക, ഭാവിയിലെ ഉപയോഗത്തിനായി അസംസ്‌കൃത കല്ല് സംരക്ഷിക്കുക എന്നിവയായിരുന്നു ലക്ഷ്യമെന്നും, ഇത് ആഴത്തിലുള്ള പാരിസ്ഥിതിക അറിവും അസാധാരണ വൈദഗ്ധ്യവും പ്രതിഫലിപ്പിക്കുന്നതാണെന്നും അദ്ദേഹം സാക്ഷ്യപ്പെടുത്തുന്നു. വേട്ടയാടല്‍, കശാപ്പ്, സംസ്‌കരണ പ്ലാന്റുകള്‍, അധിക ഉപകരണങ്ങള്‍ നിര്‍മിക്കല്‍ എന്നിവയ്ക്കായാണ് വിവിധോദ്ദേശ്യ ഉപകരണങ്ങള്‍ രൂപകല്‍പന ചെയ്തിരുന്നത്.

 

 

210,000 മുതല്‍ 80,000 വര്‍ഷങ്ങള്‍ക്ക് മുമ്പുള്ളതും അറേബ്യന്‍ പുരാവസ്തു ശാസ്ത്രത്തിലെ അപൂര്‍വവുമായ ഒരു പുരാവസ്തു രേഖ ജബല്‍ ഫായയില്‍ സൂക്ഷിച്ചിട്ടുണ്ട്. ആദിമ മനുഷ്യര്‍ തുടര്‍ച്ചയായി ഈ സ്ഥലത്ത് താമസമാക്കിയിരിക്കുകയോ, പല വട്ടം ഇതേ സ്ഥലത്ത് തിരിച്ചെത്തുകയോ ചെയ്തിട്ടുണ്ടെന്ന് ലുമിനസെന്‍സ് ഡേറ്റിംഗ് ഉപയോഗിച്ച് നടത്തിയ പഠനത്തില്‍ ''ജബല്‍ ഫായയിലെ കണ്ടെത്തലുകള്‍ കാണിക്കുന്നത് പ്രതിരോധ ശേഷി, പൊരുത്തപ്പെടുത്തല്‍, നവീകരണം എന്നിവ മനുഷ്യ രാശിയുടെ ഏറ്റവും സുപ്രധാനമായ സ്വഭാവ വിശേഷങ്ങളില്‍ പെടുന്നവയാണ് എന്ന വസ്തുതയാണ്' എസ്.എ.എ ഡയരക്ടര്‍ ഈസ യൂസിഫ് പറഞ്ഞു.

ALSO READ: ഗസ്സ വെടിനിര്‍ത്തല്‍ ചര്‍ച്ച സജീവം: കരാര്‍ ഇസ്‌റാഈല്‍ അംഗീകരിച്ചെന്ന് ട്രംപ്, നെതന്യാഹു വൈറ്റ്ഹൗസിലേക്ക്; ഈജിപ്ത് - ഖത്തര്‍ മധ്യസ്ഥര്‍ ഹമാസ് നേതാക്കളെ കാണും | Gaza Ceasefire

ALSO READ: സഊദിയില്‍ ഗാര്‍ഹിക തൊഴിലാളികള്‍ക്ക് ജോലി കണ്ടെത്താന്‍ ഓണ്‍ലൈന്‍ പ്ലാറ്റ്‌ഫോം; ശമ്പളം ഡിജിറ്റല്‍ വാലറ്റുകള്‍ വഴിയും | Saudi Arabia Domestic Workers

ഈ ഉപകരണങ്ങള്‍ മനുഷ്യരും ഭൂമിയും തമ്മിലുള്ള ആഴമേറിയ ബന്ധത്തെ പ്രതിഫലിപ്പിക്കുന്നുവെന്നും യുനെസ്‌കോ അംഗീകാരത്തിനായി ഫയ പാലിയോ ലാന്‍ഡ്‌സ്‌കേപ്പിനെ നാമനിര്‍ദേശം ചെയ്യാനുള്ള ശ്രമങ്ങള്‍ മുന്നോട്ട് കൊണ്ടുപോകുമ്പോള്‍ ഇത്തരം കണ്ടെത്തലുകള്‍ വലിയ ഊര്‍ജമാണ് പകരുന്നതെന്നും ഈസ യൂസിഫ് വ്യക്തമാക്കി. യു.എ.ഇ സുപ്രീം കൗണ്‍സില്‍ അംഗവും ഷാര്‍ജ ഭരണാധികാരിയുമായ ശൈഖ് ഡോ. സുല്‍ത്താന്‍ ബിന്‍ മുഹമ്മദ് അല്‍ ഖാസിമി യുനെസ്‌കോയുടെ ലോക പൈതൃക പട്ടികയില്‍ നാമനിര്‍ദേശം ചെയ്യുന്നതിനായി അല്‍ ഫായ സൈറ്റിന്റെ അതിര്‍ത്തികള്‍ നിര്‍ണയിച്ച് ഉത്തരവിറക്കിയിരുന്നു. ഇത് പ്രകാരം അംഗീകൃത ഭൂപടത്തില്‍ വിവരിച്ചിരിക്കുന്ന അല്‍ ഫയയുടെ സ്ഥാനം, അതിര്‍ത്തികള്‍, വിസ്തീര്‍ണം എന്നിവ സംയോജിപ്പിച്ച് ഒരു സാംസ്‌കാരിക പൈതൃക സ്ഥലമായി ഔദ്യോഗികമായി പ്രഖ്യാപിച്ചിട്ടുണ്ട്.

Archaeologists have uncovered 80,000-year-old stone tools at Jebel Faya in Sharjah, providing groundbreaking evidence of sophisticated early human activity in the Arabian Peninsula and revealing a continuous human presence spanning 210,000 years. The discovery gains additional significance as Ruler of Sharjah has issued an administrative decision approving the boundaries of the Al Faya site for its Unesco World Heritage List nomination.