തിരുവനന്തപുരം: മെഡിക്കൽ കോളജ് ആശുപത്രിയിലെ ശസ്ത്രക്രിയാ ഉപകരണക്ഷാമം സംബന്ധിച്ച് പരസ്യമായി വെളിപ്പെടുത്തൽ നടത്തിയ യൂറോളജി വിഭാഗം മേധാവി ഡോ. സി.എച്ച്. ഹാരിസിനെ രൂക്ഷമായി വിമർശിച്ച് മന്ത്രി സജി ചെറിയാൻ. ഡോ. ഹാരിസിന്റെ നടപടി അദ്ദേഹത്തിന്റെ സ്ഥാനത്തിന് യോജിച്ചതല്ലെന്ന് മന്ത്രി വ്യക്തമാക്കി. "നല്ല രീതിയിൽ പ്രവർത്തിക്കുന്ന മെഡിക്കൽ കോളജ് ആശുപത്രിയിൽ ചിലപ്പോൾ പഞ്ഞിയോ മരുന്നോ ഉപകരണങ്ങളോ കുറവുണ്ടാകാം. അത് നിഷേധിക്കുന്നില്ല. പക്ഷേ, ഡോക്ടർ അപ്പോഴത്തെ മാനസികാവസ്ഥയിൽ പ്രതികരിച്ചത് ശരിയായില്ല. അദ്ദേഹം അത് തിരുത്തിയിട്ടുണ്ട്, അതോടെ ഈ വിഷയം അവസാനിച്ചു," മന്ത്രി പറഞ്ഞു.

വിവാദത്തിന്റെ പേര് ചൂണ്ടിക്കാട്ടി കോൺഗ്രസ് ആരോഗ്യമന്ത്രി വീണാ ജോർജിനെതിരെ വിമർശനം ശക്തമാക്കി. മന്ത്രി രാജിവയ്ക്കണമെന്നാവശ്യപ്പെട്ട് കോൺഗ്രസ് മാർച്ചും സംഘടിപ്പിച്ചു. ഇതിനോട് പ്രതികരിച്ച മന്ത്രി സജി ചെറിയാൻ, "ഇവർ പറയുമ്പോൾ മന്ത്രി രാജിവയ്ക്കാനാണോ ഇരിക്കുന്നത്?" എന്ന് ചോദിച്ചു. വിവാദം ശക്തമായതോടെ, ഹൈദരാബാദിൽ നിന്ന് ഉപകരണങ്ങൾ വിമാനമാർഗം എത്തിക്കുകയും മുടങ്ങിയ ശസ്ത്രക്രിയകൾ പുനരാരംഭിക്കുകയും ചെയ്തു.

ഡോ. ഹാരിസിന്റെ പ്രതികരണത്തെ തുടർന്ന്, വിവിധ മെഡിക്കൽ കോളജുകളിലെയും സർക്കാർ ആശുപത്രികളിലെയും മരുന്നുക്ഷാമം ഉൾപ്പെടെയുള്ള പ്രശ്നങ്ങൾ പുറത്തുവരുന്നുണ്ട്. എന്നാൽ, ഡോ. ഹാരിസ് ഇപ്പോൾ സംതൃപ്തനാണെന്നും യൂറോളജി വിഭാഗത്തിനാവശ്യമായ ഉപകരണങ്ങൾ എത്തിച്ചതിനാൽ ശസ്ത്രക്രിയകൾ ആരംഭിച്ചതായും അദ്ദേഹം വ്യക്തമാക്കി. "ഞാൻ പ്രതികരിച്ചപ്പോൾ ഒരുപാട് പേർ ഒപ്പം നിന്നു. ബ്യൂറോക്രസിയുടെ വീഴ്ചകൾ പരിഹരിക്കപ്പെട്ടാൽ ആരോഗ്യമേഖല ഉയർച്ചയിലേക്ക് പോകും. മുഖ്യമന്ത്രിയുടെ കുറ്റപ്പെടുത്തലിൽ വിഷമമില്ല. ഞാൻ ചെയ്തത് ഒരു പ്രൊഫഷണൽ സൂയിസൈഡ് ആയിരുന്നു," ഡോ. ഹാരിസ് കൂട്ടിച്ചേർത്തു.

ALSO READ: പ്രവാസികൾക്ക് സന്തോഷവാർത്ത: ഇന്ത്യൻ സിം ഇല്ലാതെ വിദേശ നമ്പർ വഴി യുപിഐ ഉപയോഗിച്ച് നാട്ടിലേക്ക് എളുപ്പം പണമയക്കാം

അതേസമയം, ഡോ. ഹാരിസിനെ പിന്തുണച്ച് സിപിഐ സംസ്ഥാന സെക്രട്ടറി ബിനോയ് വിശ്വം രംഗത്തെത്തി. "ഡോ. ഹാരിസ് മികച്ച ഡോക്ടറാണ്. കാര്യങ്ങൾ നേരെയാകണമെന്ന ബോധ്യത്തോടെയാണ് അദ്ദേഹം പ്രതികരിച്ചത്. അതിൽ 'കുനിഷ്ട്' ഉള്ളതായി തോന്നുന്നില്ല. സർവീസ് ചട്ടങ്ങളുമായി ബന്ധപ്പെട്ട കാര്യങ്ങൾ സർക്കാർ പരിശോധിക്കട്ടെ," ബിനോയ് വിശ്വം പറഞ്ഞു. മുഖ്യമന്ത്രിയുടെ വിമർശനത്തെക്കുറിച്ചുള്ള ചോദ്യത്തോട് അദ്ദേഹം പ്രതികരിച്ചില്ല.

Minister Saji Cherian criticized Dr. C.H. Harris, head of the Urology Department at Thiruvananthapuram Medical College, for publicly highlighting equipment shortages, deeming it inappropriate for his position. While acknowledging occasional shortages, Cherian noted Dr. Harris corrected his stance. The issue sparked Congress protests demanding Health Minister Veena George's resignation. Equipment was airlifted from Hyderabad to resume surgeries. CPI leader Binoy Viswam supported Dr. Harris, praising his professionalism, while Dr. Harris expressed satisfaction with the resolution, calling his action a "professional suicide."