കുവൈത്ത് സിറ്റി: കുവൈത്ത് എയര്‍വേയ്‌സിന്റെ ബാങ്കോക്കില്‍ നിന്ന് കുവൈത്തിലേക്കുള്ള ഫസ്റ്റ് ക്ലാസ് വിമാനയാത്രക്കിടെ വീഡിയോ ചിത്രീകരിക്കാന്‍ ശ്രമിച്ച പ്രശസ്ത ട്രാവല്‍ വ്‌ളോഗര്‍ 'നോണ്‍സ്റ്റോപ്പ് ഡാന്‍' എന്ന യൂട്യൂബറെ കാബിന്‍ ക്രൂ ജീവനക്കാര്‍ ഭീഷണിപ്പെടുത്തുകയും വിമാനം ലാന്‍ഡ് ചെയ്തശേഷം പൊലിസിനെ വിളിച്ചുവരുത്തുകയും ചെയ്തതായി ആരോപണം. സംഭവത്തിന്റെ വിശദാംശങ്ങള്‍ ഡാന്‍ തന്റെ യൂട്യൂബ് ചാനലില്‍ വീഡിയോയായി പങ്കുവച്ചു. എന്നാല്‍, ഈ വിഷയത്തില്‍ കുവൈത്ത് എയര്‍വേയ്‌സ് ഇതുവരെ പ്രതികരണം നടത്തിയിട്ടില്ല.

ALSO READ: ബഹുരാഷ്ട്ര കമ്പനികൾക്ക് പുതിയ നികുതി ഏർപ്പെടുത്തി കുവൈത്ത്

ഫസ്റ്റ് ക്ലാസ് ടിക്കറ്റില്‍ യാത്ര ചെയ്യവേ, അനുവാദമില്ലാതെ മൊബൈല്‍ ഫോണില്‍ വീഡിയോ ചിത്രീകരിച്ചത് കാബിന്‍ ക്രൂ ചോദ്യം ചെയ്തതാണ് സംഭവത്തിന്റെ തുടക്കം. താന്‍ ഒരു യൂട്യൂബറാണെന്നും വീഡിയോ ചിത്രീകരിക്കാന്‍ അനുമതി വേണമെന്ന് അറിയില്ലായിരുന്നുവെന്നും ഡാന്‍ വിശദീകരിച്ചു. എന്നാല്‍, വിമാനത്തില്‍ വീഡിയോ എടുക്കാന്‍ അനുമതി നിര്‍ബന്ധമാണെന്നും അനുവാദമില്ലാതെ ചിത്രീകരിച്ച വീഡിയോ ഓണ്‍ലൈനില്‍ പോസ്റ്റ് ചെയ്യരുതെന്നും ക്രൂ അറിയിച്ചു.

അനുമതിക്കായി എയര്‍ലൈനിന്റെ മാര്‍ക്കറ്റിങ് വിഭാഗവുമായി ബന്ധപ്പെടണമെന്നും, അനുമതി ലഭിച്ച ശേഷം മറ്റൊരു വിമാനത്തില്‍ പുതിയ ടിക്കറ്റ് എടുത്ത് യാത്ര ചെയ്യണമെന്നും ജീവനക്കാരന്‍ നിര്‍ദേശിച്ചു. മാര്‍ക്കറ്റിങ് വിഭാഗവുമായി ബന്ധപ്പെടാമെന്ന് ഡാന്‍ സമ്മതിച്ചെങ്കിലും, അനുമതി ലഭിക്കുന്നതുവരെ വീഡിയോ എടുക്കരുതെന്ന് ജീവനക്കാരന്‍ വാശിപിടിച്ചുവെന്നാണ് ഡാന്‍ ആരോപിക്കുന്നത്.

പത്ത് മിനിറ്റിന് ശേഷം, പേരും കോണ്‍ടാക്ട് വിവരങ്ങളും ഒരു കടലാസില്‍ രേഖപ്പെടുത്തി നല്‍കണമെന്ന് ആവശ്യപ്പെട്ട് ഒരു ജീവനക്കാരന്‍ ഡാനിനെ സമീപിച്ചു. എന്നാല്‍, ഡാന്‍ ഇതിന് തയ്യാറായില്ല. വിമാനം കുവൈത്തില്‍ ലാന്‍ഡ് ചെയ്തശേഷം പൊലിസ് എത്തി ഡാനിനെ ചോദ്യം ചെയ്തു.

ALSO READ: ചാരിറ്റി സംഘടനകള്‍ക്ക് പുതിയ നിയന്ത്രണങ്ങള്‍ ഏര്‍പ്പെടുത്തി കുവൈത്ത്

ഡാന്‍ മറ്റ് യാത്രക്കാരെ ശല്യപ്പെടുത്തുകയും വിമാനത്തിലെ സെന്‍സിറ്റീവ് സുരക്ഷാ ഉപകരണങ്ങള്‍ വീഡിയോയില്‍ പകര്‍ത്തുകയും ചെയ്തുവെന്ന് എയര്‍ലൈന്‍ ജീവനക്കാര്‍ ആരോപിച്ചു. എന്നാല്‍, താന്‍ ഇരുന്ന കാബിനിലെ വീഡിയോ മാത്രമാണ് ചിത്രീകരിച്ചതെന്ന് ഡാന്‍ വ്യക്തമാക്കിയതിനെ തുടര്‍ന്ന്, പൊലീസ് അന്വേഷണത്തിന് ശേഷം ഇയാളെ വിട്ടയ്ക്കുകയായിരുന്നു.

A popular travel vlogger was allegedly threatened by airline staff for filming a video during a flight from Bangkok to Kuwait. The incident has raised discussions about airline policies and treatment of content creators onboard.