അലിഗഡ്:ഉത്തർപ്രദേശിലെ അലിഗഡിൽ വിവാഹത്തിന്റെ മറവിൽ നടന്ന വൻ തട്ടിപ്പിൽ പത്തിലേറെ യുവാക്കൾ വഞ്ചിക്കപ്പെട്ടതായി പരാതി. വിവാഹത്തിന് ശേഷം പിറ്റേന്ന് രാവിലെ വധുവിനെ കാണാതാവുകയും വീട്ടിലെ പണവും ആഭരണങ്ങളും അപ്രത്യക്ഷമാവുകയും ചെയ്തതായി യുവാക്കൾ റിപ്പോർട്ട് ചെയ്തു.

"ലൂട്ടേരി ദുൽഹൻസ്" (കടന്നുകളയുന്ന വധുക്കൾ) എന്നറിയപ്പെടുന്ന ഈ തട്ടിപ്പിന് നേതൃത്വം നൽകുന്നത് മുകേഷ് ഗുപ്ത എന്നയാളാണെന്ന് വഞ്ചിക്കപ്പെട്ട യുവാക്കൾ ആരോപിച്ചു. വിവാഹം നടത്തുന്നതിന് മുകേഷ് ഗുപ്ത 1.25 ലക്ഷം രൂപ വീതം ഈടാക്കിയതായി യുവാക്കൾ മൊഴി നൽകി. വരനോടൊപ്പം ഒരു രാത്രി ചെലവഴിച്ച ശേഷം, വധു പണവും ആഭരണങ്ങളും എടുത്ത് അപ്രത്യക്ഷമാകുന്നതാണ് തട്ടിപ്പിന്റെ രീതി.

തിരക്കിട്ട് വിവാഹം, കർവാ ചൗത്തിനോട് അനുബന്ധിച്ച്

സോഷ്യൽ മീഡിയയിലൂടെയും ഫോൺ വഴിയും യുവാക്കളെ ബന്ധപ്പെട്ടാണ് തട്ടിപ്പ് നടത്തിയിരുന്നത്. സുന്ദരികളുടെ ഫോട്ടോകൾ കാണിച്ച് വിശ്വാസം നേടിയ ശേഷം, വിവാഹങ്ങൾ തിരക്കിട്ട് ക്ഷേത്രങ്ങളിലോ വീടുകളിലോ ചെറിയ ഹാളുകളിലോ നടത്തിയിരുന്നു. പലപ്പോഴും കർവാ ചൗത്ത് ആഘോഷവുമായി ബന്ധപ്പെടുത്തിയാണ് വിവാഹങ്ങൾ സംഘടിപ്പിച്ചത്. ഗ്രാമപ്രദേശങ്ങളിൽ നിന്നുള്ള യുവാക്കളാണ് തട്ടിപ്പിന് ഇരയായവരിൽ ഭൂരിഭാഗവും.

അലിഗഡിലെ മുൻ മേയർ ശകുന്തള ഭാരതി പറഞ്ഞതനുസരിച്ച്, നിരവധി പുരുഷന്മാർ പണവും ആഭരണങ്ങളും നഷ്ടപ്പെട്ടതായി പരാതിപ്പെട്ടിട്ടുണ്ട്. എന്നാൽ, നാണക്കേട് ഭയന്ന് പലരും പൊലിസിൽ പരാതി നൽകാൻ മടിക്കുന്നതായും അവർ വ്യക്തമാക്കി.പ്രാദേശിക ഭരണകൂടത്തിന്റെ ശ്രദ്ധയിൽ വിഷയം എത്തിയതോടെ, പൊലിസ് അന്വേഷണം ആരംഭിച്ചിട്ടുണ്ട്.

ഉത്തർപ്രദേശിലെ അലിഗഡിൽ വിവാഹത്തിന്റെ മറവിൽ നടന്ന തട്ടിപ്പിൽ യുവാവിന് 4.01 ലക്ഷം രൂപയും സ്വർണാഭരണങ്ങളും നഷ്ടമായി. അലിഗഡ് സ്വദേശിയായ പ്രതീക് ശർമയാണ് "ലൂട്ടേരി ദുൽഹൻസ്" (കടന്നുകളയുന്ന വധുക്കൾ) എന്നറിയപ്പെടുന്ന തട്ടിപ്പിന് ഇരയായത്. കർവാ ചൗത്തിനോടനുബന്ധിച്ച് നടന്ന വിവാഹത്തിന് ശേഷം, പ്രതിശ്രുത വധുവായ ശോഭ കുടുംബത്തിന് മയക്കുമരുന്ന് കലർത്തി നൽകിയ ശേഷം പണവും ആഭരണങ്ങളുമായി കടന്നുകളഞ്ഞുവെന്നാണ് പരാതി.

വിവാഹാലോചന കൊണ്ടുവന്നത് മുകേഷ് ഗുപ്ത എന്നയാളാണെന്ന് പ്രതീക് ശർമ പറഞ്ഞു. ഈ തട്ടിപ്പിന് നേതൃത്വം നൽകുന്നതും മുകേഷ് ഗുപ്തയാണെന്ന് ആരോപിക്കപ്പെടുന്നു. ശോഭ ബിഹാർ സ്വദേശിനിയാണെന്നും ഇവർ "ലൂട്ടേരി ദുൽഹൻസ്" സംഘത്തിലെ അംഗമാണെന്നും പ്രതീക് വ്യക്തമാക്കിൊ

"അടുത്ത ദിവസം രാവിലെ ബോധം വന്നപ്പോൾ, ശോഭ വീട്ടിലെ എല്ലാ വിലപിടിപ്പുള്ള വസ്തുക്കളുമായി രക്ഷപ്പെട്ടതായി ഞങ്ങൾക്ക് മനസ്സിലായി. അവൾ എടുക്കാതെ വിട്ടുപോയ മൊബൈൽ ഫോണിലേക്ക് ഈ സംഘവുമായി ബന്ധമുള്ള നിരവധി നമ്പറുകളിൽ നിന്ന് കോളുകൾ വന്നതായി ഞങ്ങൾ കണ്ടെത്തി," പ്രതീക് ശർമ തന്റെ പരാതിയിൽ പറഞ്ഞു.

യുവാവിന്റെ പരാതിയെ തുടർന്ന് പൊലിസ് കേസ് രജിസ്റ്റർ ചെയ്ത് അന്വേഷണം ആരംഭിച്ചതായി അധികൃതർ അറിയിച്ചു. "ലൂട്ടേരി ദുൽഹൻസ്" സംഘത്തിന്റെ മറ്റ് അംഗങ്ങളെ കണ്ടെത്താനും മുകേഷ് ഗുപ്തയുടെ പങ്ക് സ്ഥിരീകരിക്കാനും പൊലിസ് തീവ്രശ്രമം നടത്തിവരുകയാണ്.