പാലക്കാട്: പാലക്കാട് രണ്ട് യുവാക്കളെ വെടിയേറ്റ് മരിച്ച നിലയിൽ കണ്ടെത്തി. പാലക്കാട് കല്ലടിക്കോടാണ് സംഭവം. മൂന്നേക്കർ മരുതുംക്കാട് സ്വദേശി ബിനുവും സുഹൃത്ത് നിതിനുമാണ് മരിച്ചത്. ബിനുവിൻറെ മൃതദേഹത്തിന് സമീപത്തുനിന്ന് പൊലിസ് നാടൻ തോക്ക് കണ്ടെത്തിയിട്ടുണ്ട്.  

ഇന്ന് വൈകീട്ട് മൂന്ന് മണിയോടെയാണ് സംഭവം. മരുതുംകാട് സർക്കാർ സ്കൂളിന് സമീപത്തെ പാതയിലാണ് ബിനുവിനെ മരിച്ച നിലയിൽ ആദ്യം കണ്ടെത്തിയത്. ഇതിന് കുറച്ച് അപ്പുറം മാറി  നിതിൻറെ മൃതശരീരവും കണ്ടെത്തി. 

ഒരാൾ മറ്റൊരാളെ വെടിവെച്ച് പിന്നീട് സ്വയം വെടിയുതിർത്തതാണെന്നാണ് സംശയം. നിതിനെ കൊലപ്പെടുത്തിയ ശേഷം ബിനു സ്വയം വെടിവെച്ച് ആത്മഹത്യ ചെയ്തത് ആകാമെന്നാണ് സൂചന. 

പൊലിസ് അന്വേഷണം ആരംഭിച്ചുട്ടുണ്ട്. ജില്ലാ പൊലിസ് മേധാവി അജിത് കുമാർ സംഭവസ്ഥലത്ത് എത്തി. കല്ലടിക്കോട് പൊലിസ് പരിശോധന ആരംഭിച്ചു.