ഇന്ത്യൻ ക്രിക്കറ്റിലേക്ക് ചുവട് വെക്കാനൊരുങ്ങി മുൻ ഇന്ത്യൻ വെടിക്കെട്ട്‌ ഓപ്പണർ വീരേന്ദർ സെവാഗിന്റെ മക്കൾ. 2025 ഡൽഹി പ്രീമിയർ ലീഗിലാണ് സേവാഗിന്റെ മക്കളായ ആര്യവീർ, വേദാന്ത്‌ എന്നിവർ കളിക്കുക.

ലേലത്തിൽ രണ്ട് താരങ്ങളെയും വിവിധ ടീമുകൾ സ്വന്തമാക്കി. എട്ട് ലക്ഷം രൂപയ്ക്കാണ് ആര്യവീറിനെ സെൻട്രൽ ഡൽഹി കിങ്‌സ് ടീമിൽ എത്തിച്ചത്. വേദാന്തിനെ നാല് ലക്ഷം രൂപക്ക് വെസ്റ്റ്‌ ഡൽഹി ലയൺസും സ്വന്തമാക്കി. ലേലത്തിൽ ഓരോ ടീമിനും 1.50 കോടിയാണ് ഉണ്ടായിരുന്നത്. ലേലത്തിന് മുന്നോടിയായി ഓരോ ടീമിനും ഒരു താരത്തെ മാത്രം നിലനിർത്താൻ സാധിക്കുമായിരുന്നു. എല്ലാ ടീമുകൾക്കും ആർടിഎം കാർഡും ഉപയോഗിക്കാൻ കഴിയുമായിരുന്നു. 

കഴിഞ്ഞ സീസണിലാണ് ഈ ടൂർണമെന്റിന് തുടക്കം കുറിക്കുന്നത്. ആദ്യ സീസനിൽ ആറ് ടീമുകൾ ആയിരുന്നു ടൂർണമെന്റിൽ ഉണ്ടായിരുന്നത്. എന്നാൽ ഈ സീസണിൽ രണ്ട് പുതിയ ടീമുകളും ടൂർണമെന്റിന്റെ ഭാഗമായിട്ടുണ്ട്.

ഔട്ടർ ഡൽഹി വാരിയേഴ്സ്, ന്യൂ ഡൽഹി ടൈഗേഴ്‌സ് എന്നീ ടീമുകളാണ് ടൂർണമെന്റിലെ പുതുമുഖങ്ങൾ. നോർത്ത് ഡൽഹി സ്ട്രൈക്കേഴ്സ് ആണ് നിലവിലെ ചാമ്പ്യൻമാർ.  സൗത്ത് ഡൽഹി സൂപ്പർ സ്റ്റാർസിനെ കീഴടക്കിയാണ് നോർത്ത് ഡൽഹി സ്ട്രൈക്കേഴ്സ് കിരീടം സ്വന്തമാക്കിയത്.

Former Indian opener Virender Sehwags sons are set to make their debut in Indian cricket Sehwags sons Aryavir and Vedant will play in the 2025 Delhi Premier League