കോഴിക്കോട്: അഭിമാനപൂർവം നൂറാം വാർഷികത്തിൽ എത്തിനിൽക്കുന്ന സമസ്തയിൽ ശിഥിലീകരണമുണ്ടാക്കാൻ ശ്രമിക്കുന്ന നിക്ഷിപ്ത താത്പര്യക്കാരെ കരുതിയിരിക്കണമെന്ന് സമസ്തയുടെ വിവിധ പോഷക സംഘടനാ ഭാരവാഹികൾ സംയുക്ത പ്രസ്താവനയിൽ അഭ്യർഥിച്ചു. 

സമസ്തയുടെ പ്രധാന പോഷക ഘടകമാണ് സുന്നി മഹല്ല് ഫെഡറേഷൻ. മഹല്ല് തലങ്ങളിൽ ഇസ് ലാമിക സംസ്കരണ പ്രവർത്തനങ്ങൾ നടത്തുകയാണ് സംഘടനയുടെ പ്രധാന അജൻഡ. ഇത് ഫലപ്രദമായി നടപ്പിലാക്കാൻ സമസ്തയുടെ എല്ലാ പ്രധാന പോഷക ഘടകങ്ങളുടെയും ഭാരവാഹികളുടെയും കൂട്ടായ്മയായാണ് അതിൻ്റെ ഘടനയും പ്രവർത്തന ശൈലിയും. എന്നാൽ അടുത്ത കാലത്തായി ഖത്വീബ്, മുദരിസ്, സമസ്ത കീഴ്ഘടകങ്ങളുടെ ഭാരവാഹികൾ തുടങ്ങിയവരെ ഒഴിവാക്കി മഹല്ല് കമ്മിറ്റികളിൽ ചിലർക്ക് മാത്രം മെമ്പർഷിപ്പ് നൽകി തെരഞ്ഞെടുപ്പുകൾ നടത്തുകയായിരുന്നു. അതിന് വേണ്ടി ഭരണഘടനാവിരുദ്ധമായി പ്രത്യേക തെരഞ്ഞെടുപ്പ് മാന്വൽ ഉണ്ടാക്കുകയും ചെയ്തു. ഇതിനെതിരെ സമസ്ത പോഷക സംഘടന ഭാരവാഹികൾ മുശാവറക്ക് പരാതി നൽകിയപ്പോൾ അതിൽ തീരുമാനമെടുക്കാൻ പ്രത്യേക സമിതിയെ നിശ്ചയിച്ചു. സമസ്ത പ്രസിഡൻ്റ് സയ്യിദ് മുഹമ്മദ് ജിഫ് രി മുത്തുക്കോയ തങ്ങൾ, എം.ടി അബ്ദുല്ല മുസ് ലിയാർ, കൊയ്യോട് ഉമർ മുസ് ലിയാർ, ഉമർ ഫൈസി മുക്കം, എ.വി അബ്ദുറഹിമാൻ മുസ് ലിയാർ, വാക്കോട് മൊയ്തീൻ കുട്ടി മുസ് ലിയാർ തുടങ്ങിയവരടങ്ങുന്ന സമിതി തെരഞ്ഞെടുപ്പ് നിർത്തിവെക്കാനും മാന്വൽ പുനഃപരിശോധിക്കാനും തീരുമാനിക്കുകയും ചെയ്തു. അക്കാര്യത്തിൽ തീർപ്പുണ്ടാകുന്നതിന് മുമ്പ് പുതിയ സംസ്ഥാന കമ്മിറ്റി ഏകപക്ഷീയമായി തെരഞ്ഞെടുപ്പ് നടത്തിയിരിക്കുകയാണ്. സുന്നി മഹല്ല് ഫെഡറേഷൻ്റെ സംസ്ഥാന, ജില്ലാ തലങ്ങളിലുണ്ടായിരുന്ന നിരവധി നേതാക്കൾക്ക് വരെ അംഗത്വം നിഷേധിച്ചു കൊണ്ടാണ് ഈ തെരഞ്ഞെടുപ്പ് നടന്നിട്ടുള്ളത്. അതോടൊപ്പം സമസ്ത വിരുദ്ധ സംഘടനകളോട് ആഭിമുഖ്യം പുലർത്തുന്നവർ സംസ്ഥാന കൗൺസിലർമാരായത് ദുരൂഹമാണ്. 

ALSO READ: സ്‌കൂൾ സമയമാറ്റം: ഇല്ലാത്ത നിർദേശത്തിന്റെ പേരിൽ വിദ്വേഷ പ്രചാരണത്തിനു ശ്രമം, സമസ്തക്കെതിരെ വ്യാജവാർത്തയുമായി ഏഷ്യാനെറ്റും ജനം ടിവിയും, ദീപികയും

കീഴ്ഘടകങ്ങളുടെ മഹാഭൂരിപക്ഷത്തിൻ്റെ പിന്തുണയോടെ സംസ്ഥാന കൗൺസിലിലേക്ക് തെരഞ്ഞെടുക്കപ്പെട്ട അബ്ദുൽ ഹമീദ് ഫൈസി അമ്പലക്കടവിനെതിരേ വ്യാജ ആരോപണങ്ങൾ ഉന്നയിച്ച് കൗൺസിലിൽ പ്രമേയം അവതരിപ്പിക്കുകയും ചെയ്തു.
മഹല്ല് തലങ്ങളിൽ ഉലമ ഉമറാ കൂട്ടായ്മയും മാതൃകാപരമായ ഇസ് ലാമിക പ്രബോധന രീതിയും നടപ്പാക്കാൻ മഹാരഥൻമാർ രൂപം കൊടുത്ത മഹത്തായ ഒരു സംഘടനയെ ദുരുപയോഗം ചെയ്തും സമസ്ത മുശാവറ തീരുമാനത്തിന് പോലും കാത്തു നിൽക്കാതെയുമാണ് സുന്നി മഹല്ല് ഫെഡറേഷൻ്റെ പേരിൽ ചിലർ ഇതിന് ശ്രമിക്കുന്നത്. സമസ്തയുടെ നൂറാം വാർഷികാഘോഷ പരിപാടികൾ വിജയിപ്പിക്കാൻ രംഗത്തിറങ്ങേണ്ട പ്രവർത്തകരെ ഭിന്നിപ്പിക്കാനും സംഘടനയുടെ ശാക്തീകരണ പ്രവർത്തനങ്ങൾക്ക് തടയിടാനും ചിലർ നടത്തുന്ന നീക്കങ്ങൾക്കെതിരേ ജാഗ്രത പാലിക്കണമെന്നും ജംഇയ്യതുൽ മുഅല്ലിമീൻ ജനറൽ സെക്രട്ടറി കൊടക് അബ്ദുറഹ് മാൻ മുസ് ലിയാർ,  സമസ്ത എംപ്ലോയീസ് അസോസിയേഷൻ പ്രസിഡന്റ്  മുസ്തഫ മുണ്ടുപാറ, എസ്.വൈ.എസ്  ട്രഷറർ എ.എം പരീത് എറണാകുളം, എസ്.വൈ.എസ് വൈസ് പ്രസിഡൻ്റ് സി.കെ.കെ മാണിയൂർ, എസ്.കെ.എസ്.എസ്.എഫ് ജനറൽ സെക്രട്ടറി ഒ.പി.എം അഷ്റഫ്, ട്രഷറർ അയ്യൂബ് മുട്ടിൽ, ജംഇയ്യതുൽ ഖുത്വുബാ ട്രഷറർ സുലൈമാൻ ദാരിമി ഏലംകുളം എന്നിവർ അഭ്യർഥിച്ചു.

As Samastha Kerala Jem-iyyathul Ulama proudly reaches its centenary celebrations, leaders of various affiliated organizations have issued a joint statement, urging vigilance against vested interests attempting to destabilize or weaken the organization from within.