തിരുവനന്തപുരം: മുഖ്യമന്ത്രി പിണറായി വിജയൻ ഇന്ന് ഗവർണർ രാജേന്ദ്ര ആർലേക്കറുമായി കൂടിക്കാഴ്ച നടത്തും.  വൈകിട്ട് മൂന്നരയ്ക്ക് രാജഭവനിലാണ് ഇരുവരുടെയും കൂടിക്കാഴ്ച നടക്കുന്നത്. ഭാരതാംബ ചിത്രത്തിൽ തുടങ്ങി കേരള സർവകലാശാല വിഷയങ്ങളിൽ ഉൾപ്പെടെ മുറുകിയ പോര് നിലനിൽക്കുന്നതിനിടെയാണ് രാജഭവനിൽ ഈ നിർണായക കൂടിക്കാഴ്ച നടക്കുന്നത്. 

സർവ്വകലാശാല വിഷയങ്ങളിൽ സമവായം കണ്ടെത്താൻ വേണ്ടിയാണ് ഈ കൂടിക്കാഴ്ച നടത്തുന്നതെന്നാണ് വിലയിരുത്തപ്പെടുന്നത്. കേരള സാങ്കേതിക സർവ്വകലാശാല വിസി നിയമനത്തിൽ ഗവർണറുടെ അപ്പീൽ ഹൈക്കോടതി ഡിവിഷൻ ബെഞ്ച് തള്ളിയതോടെ വിഷയം കൂടുതൽ വഷളാവുകയായിരുന്നു. 

കേരള സർവകലാശാല വിസി നിയമനം, താൽക്കാലിക വിസി  നിയമനം, സർവ്വകലാശാല രജിസ്ട്രാറുടെ സസ്പെൻഷൻ തുടങ്ങിയ വിഷയങ്ങളിൽ അടക്കം ഗവർണറും സർക്കാരും തമ്മിൽ രൂക്ഷമായ തർക്കങ്ങളാണ് നിലനിന്നു കൊണ്ടിരിക്കുന്നത്.  

സ്ഥിര- താൽക്കാലിക വിസിയമാരുടെ നിയമനം, കേരള സർവകലാശാലയിലെ വിസി രജിസ്ട്രാർ തർക്കം തുടങ്ങിയ വിഷയങ്ങൾ കൂടികാഴ്ചയിൽ ചർച്ച ചെയ്യപ്പെടുമെന്നാണ് പ്രതീക്ഷിക്കുന്നത്. സംസ്ഥാനത്തെ 14 സർവകലാശാലകളിൽ 13ലും സ്ഥിരം വൈസ് ചാൻസലർമാരില്ലാതെ ഗുരുതര പ്രതിസന്ധിയാണ് ഉള്ളത്. ഇതിനുള്ള പരിഹാര ഫോർമുല ചർച്ചയിൽ ഉണ്ടാവും എന്നാണ് പ്രതീക്ഷിക്കുന്നത്.