ഷാർജ: യു.എ.ഇയിലെ വിവിധ എമിറേറ്റുകളിൽ ജ്യൂസ് വെൻഡിങ്ങ് മെഷിനുകൾ സ്ഥാപിക്കാനുള്ള പദ്ധതിയുമായി സഊദി അറേബ്യ ആസ്ഥാനമായി പ്രവർത്തിക്കുന്ന ജ്യൂസ് വേൾഡ് ഗ്രൂപ് രംഗത്ത്. സാധാരണക്കാർക്ക് മിതമായ നിരക്കിൽ ഗുണനിലവാരമുള്ള 'ഫ്രഷ്' ജ്യൂസ് ലഭ്യമാക്കുക എന്നതാണ് ലക്ഷ്യമെന്ന് ജ്യൂസ് വേൾഡ് മാനേജിങ് പാർട്ണറും എക്സിക്യൂട്ടിവ് ഡയരക്ടറുമായ മുഹമ്മദ് മെദുവിൽ ഷാർജയിൽ മാധ്യമപ്രവർത്തകരോട് പറഞ്ഞു.

മാളുകൾക്കും വ്യാപാര കേന്ദ്രങ്ങൾക്കും പുറമെ, പാതയോരങ്ങളിലും വെൻഡിങ്ങ് മെഷിനുകൾ സ്ഥാപിക്കാനാണ് പദ്ധതി. ജ്യൂസ് വേൾഡിന്റ യു.എ.ഇയിലെ അഞ്ചാമത് ശാഖ ശനിയാഴ്ച ഷാർജയിലെ കിംഗ് ഫൈസലിൽ പ്രവർത്തനം തുടങ്ങും. ഇന്ന് വൈകിട്ട് 7.30ന് ഷാർജ രാജകുടുംബാംഗം ശൈഖ് സുൽത്താൻ ബിൻ ഖാലിദ് അൽ ഖാസിമി ഉദ്ഘാടനം നിർവഹിക്കും. അൽ മജാസ് 1-ൽ ലുലു ഹൈപർ മാർക്കറ്റിന് സമീപമാണ് പുതിയ ശാഖ. ഫ്രഷ് ജ്യൂസുകൾ, ഫലൂദ, ബ്രോസ്റ്റഡ് ചിക്കൻ, ഷവർമ, പാസ്ത, ബർഗർ, സാൻഡ് വിച്ച്, പോപ്സിക്കിളുകൾ തുടങ്ങിയവ ഇവിടെ ലഭ്യമാണ്.

പുതിയ സ്റ്റോറിൽ മറ്റ് ശാഖകളിൽ നിന്ന് വ്യത്യസ്തമായി ഇറ്റാലിയൻ പാസ്ത നൽകുമെന്നും അധികൃതർ അറിയിച്ചു. 200ലധികം വ്യത്യസ്ത രുചികളിലുള്ള ജ്യൂസുകളാണ് തങ്ങളുടെ ഏറ്റവും വലിയ പ്രത്യേകതയെന്നും അവയ്ക്കൊപ്പം ഫലൂദ, പാസ്ത, ബർഗറുകൾ എന്നിവ കൂടി ഉൾപ്പെടുത്തി മെനു കുടുംബങ്ങൾക്ക് അനുയോജ്യമായ രീതിയിൽ നവീകരിച്ചിട്ടുണ്ടെന്നും മുഹമ്മദ് മെദുവിൽ വ്യക്തമാക്കി. രണ്ട് നിലകളിലായി പ്രവർത്തിക്കുന്ന ശാഖയിൽ കുടുംബ പാർട്ടികൾ നടത്താനുള്ള സൗകര്യവുമുണ്ട്.

2013ലാണ് ജ്യൂസ് വേൾഡ് യു.എ.ഇയിൽ പ്രവർത്തനം തുടങ്ങിയത്. ഇവിടെ കൂടുതൽ ശാഖകൾ തുറക്കുമെന്നും ഗ്രൂപ്പിന്റെ മറ്റൊരു സംരംഭമായ മന്തി വേൾഡിന്റെ പ്രവർത്തനം യു.എ.ഇയിലേക്ക് വ്യാപിപ്പിക്കുമെന്നും അദ്ദേഹം കൂട്ടിച്ചേർത്തു. മാർക്കറ്റിങ്ങ് മാനേജർ ഷഹീൻ യൂസഫ്, ഖലീൽ റഹ്മാൻ, ജുനൈദ് മെദുവിൽ, ഇസ്ഹാഖ് പി.കെ എന്നിവരും ഇതുസംബന്ധിച്ച പ്രഖ്യാപന ചടങ്ങിൽ പങ്കെടുത്തു.