കോഴിക്കോട്: കനത്ത മഴയെ തുടര്‍ന്ന് കോഴിക്കോട് കക്കയം ഡാമില്‍ റെഡ് അലര്‍ട്ട് പ്രഖ്യാപിച്ചു. ഡാം തുറക്കാനുള്ള സാധ്യതയുണ്ടെന്നാണ് റിപ്പോര്‍ട്ട്. ഡാമിന്റെ വൃഷ്ടിപ്രദേശത്ത് മഴ തുടരുകയാണ്. ഡാമില്‍ ജലനിരപ്പ് പരമാവധി എത്തിയാല്‍ രണ്ട് ഷട്ടറുകള്‍ തുറന്നേക്കും. കുറ്റ്യാടി പുഴയുടെ തീരത്തുള്ളവര്‍ ജാഗ്രത പാലിക്കാന്‍ നിര്‍ദേശം.

അതേസമയം കനത്ത മഴയില്‍ സംസ്ഥാനത്തെ വിവിധയിടങ്ങളില്‍ നാശനഷ്ടങ്ങള്‍ റിപ്പോര്‍ട്ട് ചെയ്തു. വിവിധ ജില്ലകളില്‍ ദുരന്തനിവാരണ അതോറിറ്റി പ്രത്യേക മുന്നറിയിപ്പുകള്‍ പുറപ്പെടുവിച്ചിട്ടുണ്ട്. മഴയില്‍ മൂന്നാറില്‍ മണ്ണിടിഞ്ഞ് കടകള്‍ തകര്‍ന്നു. ആളപായമില്ല. കണ്ണന്‍ ദേവന്‍ പ്ലാന്റേഷന്‍ റീജണല്‍ ഓഫീസിന് സമീപത്തെ നാല് വഴിയോര കടകള്‍ക്ക് മുകളിലേക്കാണ് മണ്ണിടിഞ്ഞത്. കടകളില്‍ ആളില്ലാത്തതിനാല്‍ വലിയ അപകടം ഒഴിവായി. അപകടത്തില്‍ നാല് കടകളും പൂര്‍ണമായും തകര്‍ന്നു. 

സംസ്ഥാനത്തുടനീളം കനത്ത മഴ തുടരുന്ന സാഹചര്യത്തില്‍ ഇടുക്കി ജില്ലയില്‍ പ്രത്യേക നിയന്ത്രണങ്ങള്‍ ഏര്‍പ്പെടുത്തി ദുരന്തനിവാരണ അതോറിറ്റി ഉത്തരവിറക്കി. മൂന്നാര്‍ ഗ്യാപ് റോഡില്‍ രാത്രി യാത്രയ്ക്ക് നിയന്ത്രണമേര്‍പ്പെടുത്തിയിട്ടുണ്ട്. മൈനിങ് പ്രവര്‍ത്തനങ്ങള്‍ നിര്‍ത്തിവെയ്ക്കണമെന്നും, തോട്ടം മേഖലയിലെ പുറം ജോലികള്‍ നിര്‍ത്തണമെന്നും നിര്‍ദേശമുണ്ട്. 

ALSO READ: മാറാട് യുവതിയുടെ ആത്മഹത്യ: ഭർത്താവിനെതിരെ ഗുരുതര ആരോപണവുമായി കുടുംബം 

നേരത്തെ എറണാകുളം ജില്ലയിലും സമാനമായ നിയന്ത്രണങ്ങള്‍ ഏര്‍പ്പെടുത്തിയിരുന്നു. കൊച്ചി നഗരത്തില്‍ വിവിധ ഭാഗങ്ങളില്‍ രൂക്ഷമായ വെള്ളക്കെട്ട് രൂപപ്പെട്ടു. കളമശ്ശേരി, ഇടപ്പള്ളി, എംജി റോഡ്, പാലാരിവട്ടം പ്രദേശങ്ങളില്‍ മഴ തുടരുകയാണ്. നിലവില്‍ എറണാകുളം ജില്ലയുടെ മലയോര പ്രദേശങ്ങളില്‍ രാത്രി യാത്ര നിരോധനം ഏര്‍പ്പെടുത്തിയിട്ടുണ്ട്.