ന്യൂഡല്‍ഹി: ഗഗന്‍യാന്‍ പരീക്ഷണ ദൗത്യം ഈ വര്‍ഷം ഡിസംബറില്‍ തുടക്കമാകുമെന്ന് ഇസ്രോ ചെയര്‍മാന്‍ ഡോ.വി നാരയണന്‍. കേന്ദ്ര ശാസ്ത്ര സാങ്കേതിക മന്ത്രി ഡോ. ജിതേന്ദ്ര സിങ്, ആക്‌സിയം ദൗത്യത്തിന്റെ ഭാഗമായി 18 ദിവസം അന്താരാഷ്ട്ര ബഹിരാകാശ നിലയത്തില്‍ കഴിഞ്ഞ ശുഭാംശു ശുക്ല, ഗഗന്‍യാന്‍ ദൗത്യാംഗം മലയാളിയായ ഗ്രൂപ്പ് ക്യാപ്റ്റന്‍ പ്രശാന്ത് നാരായണന്‍ എന്നിവരോടൊത്ത് നടത്തിയ വാര്‍ത്താ സമ്മേളനത്തിലാണ് ചെയര്‍മാന്‍ വിശദാംശങ്ങള്‍ വ്യക്തമാക്കിയത്. 

പത്ത് വര്‍ഷത്തിനുള്ളില്‍ ബഹിരാകാശ മേഖലയില്‍ ഇന്ത്യ കുതിച്ചുചാട്ടമുണ്ടാക്കിയെന്ന് അദ്ദേഹം പറഞ്ഞു. 2015 മുതല്‍ 2025വരെ പൂര്‍ത്തിയാക്കിയത് 2005 മുതല്‍ 2015 വരെ പൂര്‍ത്തിയാക്കിയ പദ്ധതികളുടെ ഇരട്ടിയോളമാണ്. കഴിഞ്ഞ ആറുമാസത്തിനിടെ ആക്‌സിയം-4 ഉള്‍പ്പെടെ സുപ്രധാനമായ മൂന്ന് ദൗത്യങ്ങള്‍ പൂര്‍ത്തീകരിക്കാന്‍ സാധിച്ചുവെന്നും ഡോ.വി നാരായണന്‍ പറഞ്ഞു. 
ഗഗന്‍യാന്‍ ദൗത്യത്തിൽ അനുഭവങ്ങള്‍ കരുത്തുപകരുമെന്ന് ബഹിരാകാശ യാത്ര കഴിഞ്ഞ് മടങ്ങിയെത്തിയ ശുഭാംശു ശുക്ല പറഞ്ഞു. 18 ദിവസത്തെ ബഹിരാകാശ വാസത്തില്‍ നിന്നുള്ള അനുഭവങ്ങളും അറിവുകളും ഗഗന്‍യാന്‍ ദൗത്യത്തിനും ഇന്ത്യയുടെ സ്വന്തം ഭാരതീയ അന്തരീക്ഷ സ്റ്റേഷനും പകരാനാകും. ബഹിരാകാശത്ത് നിന്ന് ലഭിക്കുന്ന അറിവുകള്‍ വിലമതിക്കാനാകാത്തതാണെന്നും ശുഭാംശു പറഞ്ഞു.

ALSO READ: പരിശീലനം വേണ്ട, ക്ലാസിലും പോകണ്ട; പണമുണ്ടോ, ബി.എഡ് സർട്ടിഫിക്കറ്റ് റെഡി; ഇതരസംസ്ഥാന ലോബികൾ സജീവം

അഗ്നിപരീക്ഷണം വിജയകരം
ഭൂവനേശ്വര്‍: ഇന്ത്യന്‍ പ്രതിരോധ മേഖലയ്ക്ക് കരുത്തു പകര്‍ന്ന് അഗ്നി 5 ബാലിസ്റ്റിക് മിസൈലുകള്‍ വിജയകരമായി പരീക്ഷിച്ചു. 5000 കിലോമീറ്ററോളം മധ്യ-ദൂര പരിധിയില്‍ ഉപയോഗിക്കാവുന്നതും ആണവ ശേഷിയുള്ളതുമായ  ബാലിസ്റ്റിക് മിസൈലിന്റെ പരീക്ഷണ വിക്ഷേപണം ഒഡീഷയിലെ ചാന്ദിപ്പൂരില്‍ നടന്നു. 

പ്രതിരോധ ഗവേഷണ വികസന ഏജന്‍സി (ഡി.ആര്‍.ഡി.ഒ)യാണ് അഗ്നി 5 വികസിപ്പിച്ചത്. പ്രതിരോധസേനയുടെ കരുത്തായ അഗ്നി സീരിസിലെ പുതിയ മിസൈലാണ് പരീക്ഷിച്ചത്. ചൈന തലസ്ഥാനമായ ബെയ്ജിങ്, റഷ്യൻ തലസ്ഥാനമായ മോസ്‌കോ, യൂറോപ്, ആഫ്രിക്കയിലെ കെനിയ, നെയ്‌റോബി തുടങ്ങിയ സ്ഥലങ്ങള്‍ ഉള്‍പ്പെടെ അഗ്നി-5ന്റെ പരിധിയില്‍ വരും. പരീക്ഷണത്തിന് മുന്നോടിയായി ബംഗാള്‍ ഉള്‍ക്കടലിന് മുകളിലൂടെയുള്ള  വ്യോമഗതാഗതത്തിന് നിയന്ത്രണം ഏര്‍പ്പെടുത്തിയിരുന്നു.