ന്യൂഡല്‍ഹി: തൊഴില്‍, വിദ്യാഭ്യാസമേഖലയിലെ പുതിയ മാറ്റത്തിനനുസൃതമായി രാജ്യത്തെ സ്‌കൂള്‍ പാഠ്യപദ്ധതിയില്‍ നിര്‍മിതബുദ്ധി അഥവാ അര്‍ട്ടിഫിഷ്യല്‍ ഇന്റിജന്‍സ് (എ.എ) പഠനം ഉള്‍പ്പെടുത്താന്‍ കേന്ദ്രസര്‍ക്കാര്‍ തീരുമാനം. അടുത്ത അധ്യയനവര്‍ഷത്തോടെ (2026- 27) മൂന്നാം ക്ലാസ് മുതല്‍ കുട്ടികളെ എ.ഐ പഠിപ്പിക്കാനാണ് നീക്കം. പാഠ്യപദ്ധതിക്കാവശ്യമായ സിലബസ് സി.ബി.എസ്.ഇ ആയിരിക്കും തയാറാക്കുക. പാഠ്യപദ്ധതിയുടെ ഭാഗമായി അധ്യാപകര്‍ക്ക് എ.ഐ ഉപകരണങ്ങള്‍ ഉപയോഗിക്കുന്നതിനുള്ള പൈലറ്റ് പ്രോജക്റ്റ് നടന്നുകൊണ്ടിരിക്കുകയാണെന്ന് സ്‌കൂള്‍ വിദ്യാഭ്യാസ സെക്രട്ടറി സഞ്ജയ് കുമാര്‍ അറിയിച്ചു. ആര്‍ട്ടിഫിഷ്യല്‍ ഇന്റലിജന്‍സ്, തൊഴിലവസരങ്ങള്‍ എന്നിവയെക്കുറിച്ചുള്ള നിതി ആയോഗ് റിപ്പോര്‍ട്ട് പുറത്തിറക്കുകയായിരുന്നു കുമാര്‍.  

സാങ്കേതികവിദ്യ നയിക്കുന്ന ഭാവിക്കായി വിദ്യാര്‍ഥികളും അധ്യാപകരും സജ്ജരാണെന്ന് ഉറപ്പാക്കാനായി സ്‌കൂള്‍ വിദ്യാഭ്യാസത്തില്‍ എ.ഐയെ സംയോജിപ്പിക്കുന്നതിനുള്ള സമഗ്ര ചട്ടക്കൂട് വികസിപ്പിച്ചുകൊണ്ടിരിക്കുകയാണെന്ന് വിദ്യാഭ്യാസ മന്ത്രാലയം അറിയിച്ചു. രാജ്യത്തുടനീളമുള്ള ഒരു കോടിയിലധികം അധ്യാപകരിലേക്ക് ഇക്കാര്യം എത്തിച്ചേരുകയും എ.ഐ വിദ്യാഭ്യാസം നല്‍കുന്നതില്‍ അവരെ നയിക്കുകയും ചെയ്യുക എന്നത് വലിയ വെല്ലുവിളിയാണെന്നും മന്ത്രാലയം പറഞ്ഞു.

നിലവില്‍ രാജ്യത്തെ 18,000ത്തിലധികം സി.ബി.എസ്.ഇ സ്‌കൂളുകളില്‍ ആറാം ക്ലാസ് മുതല്‍ 15 മണിക്കൂറുള്ള മൊഡ്യൂളുകളുള്ള നൈപുണ്യ വിഷയമായി എ.ഐ ഉപയോഗിക്കുന്നുണ്ട്. ഒമ്പത് മുതല്‍ 12 വരെയുള്ള ക്ലാസുകളില്‍ ഇവ ഐശ്ചികവിഷയവുമാണ്. 
എ.ഐ വരുന്നതോടെ ഏകദേശം രണ്ട് ദശലക്ഷം പരമ്പരാഗത ജോലികള്‍ ഇല്ലാതാകും. പക്ഷേ എട്ട് ദശലക്ഷം പുതിയ റോളുകള്‍ സൃഷ്ടിക്കപ്പെടുകയും ചെയ്യുമെന്നുമാണ് നിതി ആയോഗ് കണക്ക്. ഇതിന് അനുസൃതമായി രാജ്യത്തെ കുട്ടികളെ സജ്ജരാക്കേണ്ടതുണ്ട്.