മലയാളി സൂപ്പർതാരം സഞ്ജു സാംസണിന്റെ ക്രിക്കറ്റ് കരിയറിൽ ഏറെ സ്വാധീനം ചെലുത്താൻ രാജസ്ഥാൻ റോയൽസ് പരിശീലകൻ രാഹുൽ ദ്രാവിഡിന് സാധിച്ചിട്ടുണ്ട്. ഇന്ത്യയുടെ അണ്ടർ 19 ടീം മുതൽ രാജസ്ഥാൻ റോയൽസ് വരെ സഞ്ജുവിനൊപ്പം രാഹുൽ ദ്രാവിഡ് സഞ്ചരിച്ചിട്ടുണ്ട്.

ഇപ്പോൾ സഞ്ജുവിനെ ആദ്യം കണ്ടപ്പോഴുള്ള അനുഭവം പങ്കുവെക്കുകയാണ് ദ്രാവിഡ്. 18 വയസുള്ളപ്പോൾ തന്നെ സഞ്ജുവിൽ വലിയ പ്രതിഭയുണ്ടെന്ന് തോന്നിയിരുന്നുവെന്നാണ് ദ്രാവിഡ് പറഞ്ഞത്. മുൻ ഇന്ത്യൻ സ്പിന്നർ ആർ അശ്വിനുമായി തന്റെ യൂട്യൂബ് ചാനലിൽ നടത്തിയ അഭിമുഖത്തിലാണ് ദ്രാവിഡ് ഇക്കാര്യം പറഞ്ഞത്. 

ഞാൻ ആദ്യമായി സഞ്ജു സാംസണെ കാണുമ്പോൾ അവന് 18 വയസായിരുന്നു. അവനെ കണ്ടപ്പോൾ ഒരു ദശലക്ഷം ഡോളർ വരെ മൂല്യമുള്ള താരമായിരുന്നു അവൻ. അത് ഇപ്പോഴും കാണുന്നുണ്ട്. ഇന്ത്യൻ ക്രിക്കറ്റ് സംവിധാനത്തിന്റെ മികച്ച ഭാഗമായാണ് ഇത്തരത്തിൽ താരങ്ങൾ ഉണ്ടാവുന്നത്. ഐ‌പി‌എൽ ട്രയൽസിൽ എത്തുന്നത് യുവതാരങ്ങൾ പോലും അത്ഭുതപ്പെടുത്തുകയാണ്' രാഹുൽ ദ്രാവിഡ് പറഞ്ഞു. 

2015ൽ അന്താരാഷ്ട്ര ക്രിക്കറ്റിൽ അരങ്ങേറിയ സഞ്ജു ടി20യിൽ ഇതുവരെ 42 മത്സരങ്ങളിൽ നിന്നും മൂന്ന് സെഞ്ച്വറികൾ ഉൾപ്പെടെ 861 റൺസ് നേടിയിട്ടുണ്ട്. ടി20യിൽ അരങ്ങേറി പിന്നെയും 6 വർഷം കഴിഞ്ഞാണ് താരം ഏകദിനത്തിൽ അരങ്ങേറ്റം കുറിച്ചത്. 2021 ജൂലൈ 23നാണ് താരം ഏകദിന ക്രിക്കറ്റിൽ അരങ്ങേറിയത്. ഏകദിനത്തിൽ 16 മത്സരങ്ങളിൽ നിന്നായി ഒരു സെഞ്ച്വറിയടക്കം 510 റൺസും താരത്തിന്റെ പേരിലുണ്ട്. 

അതേസമയം 2025 ഏഷ്യാ കപ്പിനുള്ള ഇന്ത്യൻ ടീമിൽ സഞ്ജു ഇടം നേടിയിട്ടുണ്ട്. സമീപകാലങ്ങളിൽ ടി-20യിൽ സഞ്ജു മികച്ച പ്രകടനമാണ് പുറത്തെടുക്കുന്നത്. മൂന്ന് സെഞ്ച്വറികളാണ് കഴിഞ്ഞ കലണ്ടർ ഇയറിൽ സഞ്ജു ടി-20യിൽ അടിച്ചെടുത്തത്. ഈ മൂന്ന് സെഞ്ച്വറികളും സഞ്ജു ഓപ്പണർ എന്ന നിലയിലാണ് സ്വന്തമാക്കിയത്. 

സെപ്റ്റംബർ 9 മുതൽ 28 വരെയാണ് ഏഷ്യ കപ്പ് നടക്കുന്നത്. ടൂർണമെന്റിന് യുഎഇയാണ് ആതിഥേയത്വം വഹിക്കുന്നത്. നിലവിലെ ചാമ്പ്യന്മാരായ ഇന്ത്യയടക്കം എട്ട് ടീമുകൾ ഈ ടൂർണമെന്റിൽ മാറ്റുരയ്ക്കും. അഫ്ഗാനിസ്ഥാൻ, ബംഗ്ലാദേശ്, പാകിസ്ഥാൻ, ശ്രീലങ്ക, ആതിഥേയരായ യുഎഇ, ഒമാൻ, ഹോങ്കോംഗ് ചൈന എന്നിവയാണ് മത്സരിക്കുന്ന മറ്റ്‌ ടീമുകൾ. രണ്ട് ഗ്രൂപ്പുകളായി തിരിച്ചാണ് ടൂർണമെന്റ് നടക്കുക. 2026-ലെ ടി20 ലോകകപ്പിന് മുന്നോടിയായി ടി20 ഫോർമാറ്റിലാണ് മത്സരങ്ങൾ.

Rahul Dravid is sharing his experience of first meeting Rajasthan Royals skipper Sanju Samson Dravid said that he felt that Sanju had great talent even when he was 18 years old