കൊച്ചി: പ്രശസ്ത എഴുത്തുകാരി അരുന്ധതി റോയിയുടെ പുതിയ പുസ്തകം 'Mother Mary Comes To Me' യുടെ വില്‍പ്പന തടയണമെന്ന ഹരജി തള്ളി ഹൈക്കോടതി. പുസ്തകത്തിന്റെ മുഖചിത്രത്തില്‍ അരുന്ധതി റോയി പുകവലിക്കുന്ന ചിത്രം ഉപയോഗിച്ചതിനെതിരെ എറണാകുളം ഹൈക്കോടതി അഭിഭാഷകനായ രാജസിംഹന്‍ നല്‍കിയ ഹരജിയാണ് ചീഫ് ജസ്റ്റിസ് നിതിന്‍ ജാംദാര്‍, ജസ്റ്റിസ് ബസന്ത് ബാലാജി എന്നിവരുടെ ഡിവിഷന്‍ ബെഞ്ച് തള്ളിയത്. 

പുകവലി ആരോഗ്യത്തിന് ഹാനികരമാണെന്ന നിയമപ്രകാരമുള്ള മുന്നറിയിപ്പ് കവര്‍ പേജില്‍ ഉള്‍പ്പെടുത്താതെ പുസ്തകം അച്ചടിച്ചുവെന്നാണ് ഹരജിയിലെ പ്രധാന ആരോപണം. പുകവലിയെ പ്രോത്സാഹിപ്പിക്കുന്ന രീതിയില്‍ എഴുത്തുകാരിയുടെ ചിത്രം കവര്‍ പേജില്‍ ഉള്‍പ്പെടുത്തിയത് നിയമവിരുദ്ധമാണെന്ന് ഹരജിക്കാരന്‍ വാദിക്കുന്നു.

ALSO READ: വീണ്ടും ബാങ്ക് ലയനം; പൊതുമേഖല ബാങ്കുകള്‍ മൂന്നായി ചുരുങ്ങും

അതേസമയം, പുസ്തകത്തിലെ നിരാകരണക്കുറിപ്പ് ഉള്‍പ്പെടെയുള്ള വസ്തുതകളും നിലവിലെ നിയമവും പരിഗണിക്കാതെയാണ് ഹരജിക്കാരന്‍ പൊതുതാല്‍പര്യ ഹരജിയുമായി കോടതിയെ സമീപിച്ചതെന്ന് ഡിവിഷന്‍ ബെഞ്ച് പറഞ്ഞു. 

പുസ്തകത്തിന്റെ പുറംചട്ടയില്‍ നിയമപ്രകാരമുള്ള മുന്നറിയിപ്പ് പ്രസിദ്ധീകരിച്ചിട്ടുണ്ടെന്ന് പുസ്തകത്തിന്റെ പ്രസാധകരായ പെന്‍ഗ്വിന്‍ ബുക്‌സ് നേരത്തെ അറിയിച്ചിരുന്നു. 

ഹരജിയിലെ വാദങ്ങള്‍

ഹരജി സമര്‍പ്പിച്ച രാജസിംഹന്റെ വാദപ്രകാരം, അരുന്ധതി റോയി സമൂഹത്തില്‍ വലിയ സ്വാധീനമുള്ള വ്യക്തിത്വമാണ്. അവരുടെ പുകവലിക്കുന്ന ചിത്രം പുസ്തകത്തിന്റെ മുഖചിത്രമായി ഉപയോഗിക്കുന്നത് പുകയില ഉപയോഗത്തെ പ്രോത്സാഹിപ്പിക്കുമെന്നും, ഇത് യുവാക്കള്‍ ഉള്‍പ്പെടെയുള്ളവരില്‍ തെറ്റായ സന്ദേശം നല്‍കുമെന്നും അദ്ദേഹം ചൂണ്ടിക്കാട്ടുന്നു. നിയമപ്രകാരം പുകയില ഉല്‍പ്പന്നങ്ങള്‍ക്ക് മുന്നറിയിപ്പ് നിര്‍ബന്ധമാണെന്നിരിക്കെ, ഇത് ലംഘിച്ചുകൊണ്ട് പുസ്തകം പ്രസിദ്ധീകരിച്ചത് ഗുരുതരമായ വീഴ്ചയാണെന്നും ഹരജിയില്‍ ആരോപിക്കുന്നു.

പുസ്തകത്തിന്റെ പ്രചാരണവും വില്‍പ്പനയും തടയണമെന്നാണ് ഹരജിക്കാരന്റെ പ്രധാന ആവശ്യം. കൂടാതെ, മുഖചിത്രത്തില്‍ നിന്ന് പുകവലിക്കുന്ന ചിത്രം നീക്കം ചെയ്യണമെന്നും അദ്ദേഹം ആവശ്യപ്പെടുന്നു. സമൂഹത്തില്‍ വലിയ സ്വാധീനം ചെലുത്താന്‍ കഴിവുള്ള ഒരു എഴുത്തുകാരിയുടെ ഇത്തരം ചിത്രം ഉപയോഗിക്കുന്നത് യുവതലമുറയില്‍ ലഹരി ഉപയോഗത്തിന് പ്രചോദനമാകുമെന്നാണ് ഹരജിക്കാരന്റെ വാദം.

English Summary: The Kerala High Court has dismissed a petition seeking a ban on the sale of author Arundhati Roy’s new book Mother Mary Comes To Me. The plea, filed by advocate Rajasimhan, objected to the book’s cover image which features Roy smoking.