കൊച്ചി: സംസ്ഥാനത്ത് സ്വര്‍ണവിലയില്‍ ഇന്നും വര്‍ധന. പുതിയ റെക്കോര്‍ഡിലേക്കാണ് സ്വര്‍ണത്തിന്റെ കുതിപ്പ്.  ഗ്രാമിന് 65 രൂപയുടെ വര്‍ധനയാണ് ഇന്ന് ഉണ്ടായിരിക്കുന്നത്. 

ലോകവിപണിയിലും സ്വര്‍ണവില ഉയര്‍ന്നിട്ടുണ്ട്. സ്‌പോട്ട് ഗോള്‍ഡിന്റെ വില ഔണ്‍സിന് 3412.56 ഡോളറായാണ് ഉയര്‍ന്നത്. ഈ മാസം ഇതുവരെ 3.9 ശതമാനം വില വര്‍ധനവാണ് സ്വര്‍ണത്തിനുണ്ടായത്. എന്നാല്‍,  യു.എസ് ഗോള്‍ഡ് ഫ്യൂച്ചര്‍ നിരക്കില്‍ മാറ്റമില്ല. യു.എസ് ഡോളര്‍ ഇന്‍ഡക്‌സിലും ഇന്ന് ഇടിവുണ്ടായിട്ടുണ്ട്.

ട്രംപിന്റെ നീക്കങ്ങള്‍ തന്നെയാണ് ഇന്നത്തെ സ്വര്‍ണ വില വര്‍ധനവിന്റേയും പിന്നില്‍. ഫഡറല്‍ റിസര്‍വിന് നേരെ ട്രംപ് കൈക്കൊള്ളുന്ന തീരുമാനങ്ങള്‍ ഡോളറിനെ ബാധിക്കുന്നുണ്ട്. ഇതു കൂടിയാണ് സ്വര്‍ണവിലക്കുതിപ്പിന് പിന്നില്‍.ഫെഡറല്‍ റിസര്‍വിന്റെ ഗവര്‍ണര്‍മാരില്‍ ഒരാളായ ലീസ കുക്കിനെ പുറത്താക്കിയ ട്രംപിന്റെ നടപടിയിലാണ് സ്വര്‍ണക്കുതിപ്പ് പുനരാരംഭിച്ചത്. നടപടി  ഇപ്പോള്‍ കോടതിയുടെ പരിഗണനയിലാണ്. തന്നെ പുറത്താക്കാന്‍ ട്രംപിന് അധികാരമില്ലെന്ന് കാട്ടി കുക്കാണ് കോടതിയെ സമീപിച്ചത്. ട്രംപും ഫെഡറല്‍ റിസര്‍വും തമ്മിലെപോര് യുഎസ് സമ്പദ്‌വ്യവസ്ഥയെ ബാധിക്കുന്നു. ഇതാണ് സ്വര്‍ണത്തെ ബാധിക്കുന്നത്. 

ALSO READ: 777 മില്യൺ ഡോളറിന്റെ ബിറ്റ്‌കോയിൻ: പക്ഷേ അയൺകീ വാലറ്റിന്റെ പാസ്‌വേഡറിയില്ല; നിധികാക്കും ഭൂതം പോലൊരാൾ!

ഇന്നത്തെ വില അറിയാം

22 കാരറ്റ് ഗ്രാമിന് 65 രൂപയുടെ വര്‍ധനയാണ് ഇന്ന് ഉണ്ടായിരിക്കുന്നത്. ഗ്രാമിന് 9470 രൂപയായി വില വര്‍ധിച്ചു. പവന് 520 രൂപ വര്‍ധിച്ച് വില 75,760 രൂപയായി. സംസ്ഥാനത്ത് 18 കാരറ്റ് സ്വര്‍ണവിലയും ഇന്ന് ചരിത്രത്തിലെ ഏറ്റവും ഉയരത്തിലെത്തിയിരിക്കുകാണ്. 18 ഗ്രാമിന് വില 55 രൂപ വര്‍ധിച്ച് 7,830 രൂപയായി. 14 കാരറ്റ് സ്വര്‍ണവില ഗ്രാമിന് 45 രൂപ വര്‍ധിച്ച് 6,055 രൂപയും 9 കാരറ്റ് വില 35 രൂപ ഉയര്‍ന്ന് 3,915 രൂപയുമായി. രണ്ടും റെക്കോര്‍ഡാണ്.

ചില ജ്വല്ലറികളില്‍ വെള്ളിവില ഗ്രാമിന് 128 രൂപയില്‍ മാറ്റമില്ലാതെ നില്‍ക്കുകയാണ്. അതേസമയം, ചിലജ്വല്ലറികള്‍ അവരുടെ ഇന്നലത്തെ വിലയില്‍നിന്ന് ഒരു രൂപ കൂട്ടി വില 127 രൂപയാക്കിയിട്ടുണ്ട്. 

സംസ്ഥാനത്ത് സ്വര്‍ണവില കഴിഞ്ഞ ദിവസവും വര്‍ധിച്ചിരുന്നു. ഗ്രാമിന് 15 രൂപയുടെ വര്‍ധനവാണ് കഴിഞ്ഞ ദിവസം ഉണ്ടായത്. 22 കാരറ്റ് ഗ്രാമിന് 9405 രൂപയായാണ് വര്‍ധിച്ചത്. പവന്റെ വില 120 രൂപ ഉയര്‍ന്ന് 75240 രൂപയായിരുന്നു ഇന്നലെ. 18 കാരറ്റ് സ്വര്‍ണത്തിന്റെ വില ഗ്രാമിന് 10 രൂപ ഉയര്‍ന്ന് 7720 രൂപയും ആയിരുന്നു. 14 കാരറ്റിന്റെ വില 6010 രൂപയില്‍ തുടരുകയാണ്. ഒമ്പത് കാരറ്റിന്റെ വില 3880ല്‍ തുടരുകയാണ്. അതേസമം, വെള്ളിവിലയില്‍ കഴിഞ്ഞ ദിവസം മാറ്റമുണ്ടായില്ല.

gold prices in kerala continue to rise, with a rs 65 increase per gram today. the surge follows a similar upward trend in the international market.