ദുബൈ: പ്രവാചക തിരുജന്മത്തിൻ്റെ ഒന്നര സഹസ്രാബ്ദം പൂർത്തിയാകുന്നതിന്റെ ഭാഗമായി യു.എ.ഇ സുന്നി കൗൺസിലിന്റെ ആഭിമുഖ്യത്തിൽ സമസ്ത ഗ്രാൻ്റ് മീലാദ് കോൺഫറൻസ് ഖിസൈസ് ന്യൂ ഡാൺ സ്കൂൾ ഓഡിറ്റോറിയത്തിൽ ഇന്ന് വൈകീട്ട് 5.30നു നടക്കും. കോഴിക്കോട് ഖാസി സയ്യിദ് മുഹമ്മദ് കോയ  തങ്ങൾ ജമലുല്ലൈലി കോൺഫറൻസ് ഉദ്ഘാടനം ചെയ്യും. മുഹമ്മദ് നബി (സ) യുടെ സമഗ്ര ജീവിത പാഠങ്ങളെ പൊതുസമൂഹത്തിന് പരിചയപ്പെടുത്തുക, സാമൂഹിക-സാംസ്കാരിക-സംസ്കരണ വിമോചന സന്ദേശങ്ങളെയും  മാനവിക-ധാർമിക മൂല്യങ്ങളെയും പരിചയപ്പെടുത്തുക തുടങ്ങിയ  ലക്ഷ്യങ്ങളോടെയാണ് മീലാദ് കോൺഫറൻസ് സംഘടിപ്പിക്കുന്നതെന്ന് നേതാക്കൾ അറിയിച്ചു.
 
യു.എ.ഇയിലെ ഏറ്റവും വലിയ പ്രവാചക പ്രകീർത്തന സംഗമമായ സമസ്ത മീലാദ് കോൺഫറൻസിൻ്റെ ഭാഗമായി മദ്ഹുറസൂൽ പ്രഭാഷണം, ഇശൽ വിരുന്ന്, ബുർദാസ്വാദനം, ഇശ്ഖ് മജ്ലിസ്, പ്രാർഥനാ സംഗമം തുടങ്ങിയവ നടക്കും. ബാല ഗായകൻ മാസ്റ്റർ നാസിഫിൻ്റെ നേതൃത്വത്തിൽ നടക്കുന്ന ഇശൽവിരുന്നിൽ യു.എ.ഇ റെയ്ഞ്ചിനു കീഴിലെ വിവിധ മദ്റസകളിലെ പ്രതിഭകൾ പങ്കെടുക്കും. 

ഇശ്ഖ് മജ്ലിസിന് അൻവറലി ഹുദവി പുളിയക്കോട് നേതൃത്വം നൽകും. യു.എ.ഇ സുന്നി കൗൺസിൽ പ്രസിഡന്റ് സയ്യിദ് പൂക്കോയ തങ്ങൾ ബാ അലവി  സമാപന സമ്മേളനത്തിൽ അധ്യക്ഷനാകും. സയ്യിദ് മുഹമ്മദ് കോയ തങ്ങൾ ജമലുല്ലൈലിയുടെ നേതൃത്വത്തിൽ നടക്കുന്ന പ്രാർഥനാ സംഗമത്തോടെ കോൺഫറൻസ് സമാപിക്കും.

ALSO READ: നിങ്ങളുടെ എമിറേറ്റ്സ് ഐഡിയുടെ ആപ്ലിക്കേഷൻ സ്റ്റാറ്റസ് എങ്ങനെ ഓൺലൈനായി പരിശോധിക്കാം?

ശിഹാബുദ്ദീൻ തങ്ങൾ അൽഐൻ, അബ്ദുൽ ഹകീം തങ്ങൾ ദുബൈ, സക്കീർ ഹുസൈൻ തങ്ങൾ ദുബൈ, അശ്കർ അലി തങ്ങൾ മംഗലാപുരം, അബ്ദുൽ ജലീൽ ദാരിമി ദുബൈ, മൊയ്തീൻ ഹാജി അൽഐൻ, അബ്ദുൽ ജലീൽ ഹാജി ഒറ്റപ്പാലം, അഹ്മദ് സുലൈമാൻ ഹാജി, അബ്ദുല്ല ഹാജി ചേലേരി, ടി.കെ.സി അബ്ദുൽ ഖാദർ ഹാജി ദുബൈ, മൂസ ഹാജി പള്ളിക്കര, അലവിക്കുട്ടി ഫൈസി മുതുവല്ലൂർ, അബ്ദുറസാഖ് വളാഞ്ചേരി, ഷൗക്കത്ത് മൗലവി ദൈദ്, അബ്ദുറഊഫ് അഹ്സനി അബൂദബി, സി.വി അബ്ദുറഹ്മാൻ, അബ്ദുൽ കബീർ ഹുദവി അബൂദബി, ഷറഫുദ്ദീൻ ഹുദവി ദുബൈ, മൻസൂർ മൂപ്പൻ, മുസ്തഫ താന്നിക്കൽ ഫുജൈറ, ശരീഫ് ഹുദവി ഫുജൈറ, അനസ് ഹാജി ദുബൈ, അബ്ദുറഷീദ് ദാരിമി പരതക്കാട്, സി.കെ അബൂബക്കർ, നഈം പുത്തൂർ, അബ്ദുൽ ഹമീദ് ഉമരി, താഹിർ തങ്ങൾ ഉമ്മുൽഖുവൈൻ, അബൂബക്കർ ഉമ്മുൽഖുവൈൻ, ഇസ്മായിൽ എമിറേറ്റ്സ് അജ്മാൻ, സുബൈർ ഹാജി റാസൽഖൈമ, മുഹമ്മദ് കുട്ടി ഫുജൈറ, അബ്ദുൽ കബീർ ഹുദവി ബനിയാസ് തുടങ്ങിയവർ സംബന്ധിക്കും. പ്രോഗ്രാം ജനറൽ കൺവീനർ സയ്യിദ് അബ്ദുറഹ്മാൻ തങ്ങൾ അബൂദബി സ്വാഗതവും, സുന്നി കൗൺസിൽ സെക്രട്ടറി ഷൗക്കത്തലി ഹുദവി ദുബൈ നന്ദിയും പറയും. 

സ്ത്രീകൾക്കും പ്രത്യേകം സൗകര്യം ഏർപ്പെടുത്തിയ നഗരിയിലേക്ക് ഇശ്ഖിലലിഞ്ഞ് ചേരാൻ യു.എ.ഇയിലെ പ്രവാചക സ്നേഹികൾ എല്ലാ എമിറേറ്റുകളിൽ നിന്നും എത്തിച്ചേരും. ബസ് മാർഗവും മെട്രോ വഴിയും വന്നെത്തുന്നവർക്ക് സമ്മേളന നഗരിയിൽ എത്താൻ ദേരയിൽ നിന്നും മെട്രോ സ്റ്റേഷനിൽ നിന്നും വാഹന സൗകര്യം ഏർപ്പെടുത്തിയിട്ടുണ്ട്.