ഹൈദരാബാദ്: ഭാരത് രാഷ്ട്ര സമിതി (ബിആർഎസ്) എംഎൽസിയും മുൻ തെലങ്കാന മുഖ്യമന്ത്രി കെ. ചന്ദ്രശേഖർ റാവുവിന്റെ (കെസിആർ) മകളുമായ കെ. കവിതയെ പാർട്ടിയിൽ നിന്ന് സസ്‌പെൻഡ് ചെയ്തു. ഇന്നലെ വൈകുന്നേരം തന്റെ ബന്ധുവും മുൻ മന്ത്രിയുമായ ടി. ഹരീഷ് റാവുവിനും രാജ്യസഭാ എംപിയായ സന്തോഷ് കുമാറിനും എതിരെ കവിത നടത്തിയ വിവാദ പരാമർശങ്ങൾക്ക് പിന്നാലെയാണ് ബിആർഎസ് കവിതയ്ക്കെതിരെ അച്ചടക്ക നടപടി സ്വീകരിച്ചത്.

കവിതയുടെ പ്രവർത്തനങ്ങൾ പാർട്ടിക്ക് വിരുദ്ധമാണെന്നും, കവിതയുടെ ഭാ​ഗത്ത് നിന്നുണ്ടായ പെരുമാറ്റം പാർട്ടിക്ക് ദോഷകരമായെന്നും ചൂണ്ടിക്കാട്ടി ബിആർഎസ് അച്ചടക്ക സമിതി നോട്ടീസ് പുറപ്പെടുവിച്ചു. പാർട്ടി പ്രസിഡന്റും പിതാവുമായ കെ. ചന്ദ്രശേഖർ റാവുവിന്റെ നിർദേശപ്രകാരമാണ് കവിതയെ സസ്‌പെൻഡ് ചെയ്യുന്നതെന്നും നോട്ടീസിൽ പറയുന്നുണ്ട്. സോമ ഭരത് കുമാറും ടി. രവീന്ദർ റാവും സസ്പെൻഡ് നോട്ടീസിൽ ഒപ്പുവച്ചു.

കവിത പാർട്ടി അംഗത്വത്തിൽ നിന്നും എംഎൽസി സ്ഥാനത്തിൽ നിന്നും രാജിവയ്ക്കാൻ സാധ്യതയുണ്ടെന്നും അടുത്ത വൃത്തങ്ങൾ സൂചിപ്പിക്കുന്നുണ്ട്. പാർട്ടിയുടെ രണ്ട് പ്രമുഖർക്കെതിരെ പ്രസ്താവന നടത്തിയതു മുതൽ കവിതയ്ക്കെതിരെ എന്ത് നടപടി സ്വീകരിക്കണമെന്ന് ബിആർഎസ് ആലോചിച്ചിരുന്നു. ഇന്നലെയും ഇന്നുമായി ചർച്ചകളിൽ ഉന്നത നേതൃത്വം കെസിആറിന്റെ അനുഗ്രഹത്തോടെയാണ് തീരുമാനത്തിലെത്തിയതെന്നും പാർട്ടി വൃത്തങ്ങൾ വെളിപ്പെടുത്തി.

ALSO READ: ഡല്‍ഹി കലാപ ഗൂഢാലോചന കേസ്: ഉമര്‍ഖാലിദിനും ഷര്‍ജീല്‍ ഇമാമിനും ജാമ്യമില്ല/Delhi Riot 2020

തെലങ്കാന മുഖ്യമന്ത്രി രേവന്ത് റെഡ്ഡി കാലേശ്വരം ലിഫ്റ്റ് ഇറിഗേഷൻ പ്രോജക്ട് (കെഎൽഐപി) അന്വേഷണം സിബിഐക്ക് കൈമാറുമെന്ന് പ്രഖ്യാപിച്ചതിന് തൊട്ടുപിന്നാലെയാണ് ബിആർഎസിൽ ഈ നാടകീയ സംഭവങ്ങൾ അരങ്ങേറിയത്. ഇന്നലെ നടത്തിയ പത്രസമ്മേളനത്തിൽ, കവിത തന്റെ പിതാവ് കെസിആറിന്റെ പേര് "ചിലർ ചെളിയിൽ വലിച്ചിഴച്ചു" എന്ന് ആരോപിച്ചു. കാലേശ്വരം അന്വേഷണത്തിന് ഹരീഷ് റാവു ഉത്തരവാദിയാണെന്നും, "അഞ്ച് വർഷം ജലസേചന മന്ത്രിയായിരുന്ന ഹരീഷ് റാവുവിന് ഇതിൽ ഉത്തരവാദിത്തമില്ലേ?" എന്നും കവിത ചോദിച്ചു.

ALSO READ: തിരൂരിലെ സ്കൂളിൽ സ്വാതന്ത്ര്യദിനത്തിന് വിദ്യാർഥികൾ ആർഎസ്എസ് ഗണഗീതം പാടി; വിശദീകരണവുമായി അധികൃതർ

കൂടാതെ, ബിൽഡർ മേഘ കൃഷ്ണ റെഡ്ഡിയും രാജ്യസഭാ എംപി സന്തോഷ് കുമാറും സ്വന്തം നേട്ടങ്ങൾക്കായി പ്രവർത്തിച്ച് സ്വത്ത് സമ്പാദിച്ചുവെന്നും കവിത ആരോപിച്ചു. പിതാവ് തെലങ്കാന ജനതയ്ക്കായി പ്രവർത്തിക്കുമ്പോൾ, ഈ ആളുകൾ സ്വന്തം ലാഭത്തിനായാണ് പ്രവർത്തിക്കുന്നതെന്നും കവിത കുറ്റപ്പെടുത്തിയിരുന്നു. കവിതയുടെ പരാമർശങ്ങൾ വാർത്താ ചാനലുകളിൽ പ്രക്ഷേപണം ചെയ്തതിന് പിന്നാലെയാണ് ബിആർഎസ് ഉന്നത നേതൃത്വം ഹൈദരാബാദിലെ കെസിആറിന്റെ വസതിയിൽ ഒത്തുകൂടി തീരുമാനമെടുത്തത്. എന്നാൽ കവിതയെ അഭിപ്രായത്തിനായി ബന്ധപ്പെട്ടെങ്കിലും ലഭ്യമല്ലായിരുന്നു.

K Kavitha, BRS MLC and daughter of former Telangana CM K Chandrasekhar Rao, was suspended from the party after accusing leaders, including T Harish Rao and Santosh Kumar, of amassing wealth using her father's name. The decision, backed by KCR, followed her critical remarks against party figures and the Kaleshwaram project probe