മധുര: മധുരയിൽ 28 വയസ്സുള്ള പ്രിയദർശിനി എന്ന യുവതി ജീവനൊടുക്കിയ സംഭവത്തിൽ ഭർത്താവിനും ഭർതൃവീട്ടുകാർക്കുമെതിരെ സ്ത്രീധന പീഡന ആരോപണവുമായി യുവതിയുടെ കുടുംബം. ഭർത്താവ് റൂബൻരാജിന്റെയും, മാതാപിതാക്കളുടെയും തുടർച്ചയായ സ്ത്രീധന ആവശ്യങ്ങളും മാനസിക പീഡനവുമാണ് പ്രിയദർശിനിയുടെ ആത്മഹത്യക്ക് കാരണമെന്ന് കുടുംബം ആരോപിക്കുന്നു.

ALSO READ: വിവാഹാലോചനയ്ക്ക് വിളിച്ചുവരുത്തി യുവാവിനെ മർദിച്ച് കൊലപ്പെടുത്തി; സംഭവത്തിൽ യുവതിയുടെ പിതാവ് ഉൾപ്പെടെ ഒൻപത് പേർ അറസ്റ്റിൽ

ഉസിലാംപട്ടിക്ക് സമീപമുള്ള പെരുമാൾ കോവിൽപട്ടി സ്വദേശിനിയായ പ്രിയദർശിനി 2024 സെപ്റ്റംബറിൽ സെല്ലൂർ സ്വദേശിയായ 30 വയസ്സുള്ള റൂബൻരാജിനെ വിവാഹം കഴിച്ചിരുന്നു. വിവാഹസമയത്ത് യുവതിയുടെ കുടുംബം 150 പവൻ സ്വർണം സ്ത്രീധനമായി നൽകിയിരുന്നു. എന്നാൽ, വാഗ്ദാനം ചെയ്തിരുന്ന മറ്റൊരു 150 പവൻ സ്വർണം നൽകാൻ കഴിയാത്തതിനെ തുടർന്ന് ഭർത്താവും ഭർതൃവീട്ടുകാരും പ്രിയദർശിനിയെ നിരന്തരം പീഡിപ്പിച്ചുവെന്നാണ് കുടുംബം ആരോപിക്കുന്നത്.

പ്രിയദർശിനിയുടെ മാതാപിതാക്കളായ അഗ്നിയും,സെൽവിയും പറയുന്നത്, റൂബൻരാജും അവന്റെ മാതാപിതാക്കളായ ഇളംഗേശ്വരനും ധനബക്കിയവും ബാക്കി സ്വർണത്തിനായി തങ്ങളുടെ മകളെ മാനസികമായി പീഡിപ്പിച്ചിരുന്നുവെന്നാണ്. ഈ പീഡനം സഹിക്കാൻ കഴിയാതെ, കുറച്ച് മാസങ്ങൾക്ക് മുമ്പ് പ്രിയദർശിനി മാതാപിതാക്കളുടെ അടുത്തേക്ക് മടങ്ങിയിരുന്നു. എന്നാൽ, റൂബൻരാജ് രണ്ടാം വിവാഹത്തിന് ശ്രമിക്കുന്നതായി അറിഞ്ഞതിനെ തുടർന്ന് മനോവിഷമത്തിലായ പ്രിയദർശിനി വിഷം കഴിച്ച് ആത്മഹത്യയ്ക്ക് ശ്രമിച്ചുവെന്നാണ് റിപ്പോർട്ട്.

ഗുരുതരാവസ്ഥയിൽ മധുര രാജാജി സർക്കാർ ആശുപത്രിയിൽ പ്രവേശിപ്പിച്ചെങ്കിലും യുവതിയുടെ ജീവൻ രക്ഷിക്കാനായില്ല. സംഭവത്തെക്കുറിച്ച് മധുര പൊലിസ് അന്വേഷണം ആരംഭിച്ചിട്ടുണ്ട്. പ്രിയദർശിനിയുടെ മാതാപിതാക്കൾ നൽകിയ പരാതിയുടെ അടിസ്ഥാനത്തിൽ റൂബൻരാജിനും അവന്റെ കുടുംബാംഗങ്ങൾക്കുമെതിരെ കേസ് രജിസ്റ്റർ ചെയ്തിട്ടുണ്ട്.