മസ്‌കത്ത്: ഫലസ്തീനില്‍ കുഞ്ഞുങ്ങളെയും സ്ത്രീകളെയും സാധാരണക്കാരെയും ഉള്‍പ്പെടെ കൂട്ടക്കൊല ചെയ്യുന്ന സയണിസ്റ്റ് രാജ്യത്തിന് സാമ്പത്തിക സഹായം നല്‍കിയ ഫ്രഞ്ച് റീട്ടെയില്‍ ഭീമന്‍മാരായ കാരിഫോര്‍ (Carrefour) ശൃംഖലയ്ക്ക് കൂടുതല്‍ ഗള്‍ഫ് നാടുകളില്‍ തിരിച്ചടി. കുവൈത്തിലെയും ബഹ്‌റൈനിലെയും എല്ലാ ശാഖകളും കാരിഫോര്‍ അടച്ചുപൂട്ടി. സയണിസ്റ്റ് അനുകൂല നിലപാടിന്റെ പേരില്‍ ബഹിഷ്‌കരണം നേരിട്ടതിനെത്തുടര്‍ന്ന് ജോര്‍ദാനിലെയും ഒമാനിലെയും ശാഖകള്‍ അടച്ചുപൂട്ടേണ്ടിവന്നിരുന്നു. ഇതിന് പിന്നാലെയാണ് കുവൈത്തിലെയും ബഹ്‌റൈനിലെയും ശാഖകളും കാരിഫോര്‍ അടച്ചുപൂട്ടിയത്. 

ഇസ്‌റാഈല്‍ ഗസ്സയില്‍ നടത്തിവരുന്ന വംശഹത്യക്ക് സഹായം നല്‍കിയതിനെ തുടര്‍ന്ന് നടത്തിയ ബഹിഷ്‌കരണ കാംപയിന്‍ ആണ് ഇതോടെ വിജയം കണ്ടതെന്ന് ബഹിഷ്‌കരണാഹ്വാനം നടത്തിയ ബി.ഡി.എസ് മൂവ്‌മെന്റ് (Divestment and Sanctions, BDS) അറിയിച്ചു. ഇസ്‌റാഈല്‍ ഭരണകൂടത്തിന് പിന്തുണ നല്‍കുന്ന കമ്പനികളെ അന്താരാഷ്ട്ര നിയമം പാലിക്കാന്‍ നിര്‍ബന്ധിക്കുന്ന പ്രസ്ഥാനമാണ് ബി.ഡി.എസ്. 

ബഹ്‌റൈനില്‍ കാരിഫോര്‍ സെപ്റ്റംബര്‍ 14 ന് ആണ് പ്രവര്‍ത്തനങ്ങള്‍ നിര്‍ത്തിവച്ച് തുടങ്ങിയത്. 14 ന് രാജ്യത്തുടനീളമുള്ള ഏഴ് സ്റ്റോറുകള്‍ അടച്ചുപൂട്ടി. സെപ്റ്റംബര്‍ 16 ന് കുവൈത്തിലെ പ്രവര്‍ത്തനങ്ങള്‍ പൂര്‍ണ്ണമായും അടച്ചുപൂട്ടുന്നതായും കാരിഫോര്‍ പ്രഖ്യാപിച്ചു. യു.എ.ഇയിലെ വമ്പന്‍ ഗ്രൂപ്പായ അല്‍ഫുതൈം ആണ് കാരിഫോറിന്റെ ഷോപ്പുകള്‍ നടത്തിയിരുന്നത്. ഗള്‍ഫ് മേഖലയിലെ ഏറ്റവും പ്രമുഖ സൂപ്പര്‍മാര്‍ക്കറ്റ് ശൃംഖലകളില്‍ ഒന്നാണ് കാരിഫോര്‍. 

 

 

ഉപഭോക്താക്കളുടെ വിശ്വസ്തതയ്ക്ക് നന്ദി പറഞ്ഞ കാരിഫോര്‍, വിപണിയില്‍ നിന്ന് പിന്മാറുന്നതിനുള്ള കാരണങ്ങള്‍ വിശദമാക്കിയിട്ടില്ല. എന്നാല്‍ ബോയ്‌കോട്ട്, ബിഡിഎസ് പ്രസ്ഥാനത്തിന്റെയും ഗസ്സയ്‌ക്കെതിരായ ഇസ്രായേലിന്റെ ഏകപക്ഷീയ യുദ്ധത്തില്‍ പങ്കാളികളാണെന്ന് കരുതപ്പെടുന്ന കമ്പനികള്‍ക്കെതിരായ വ്യാപകമായ പ്രചാരണങ്ങളുടെയും ഫലമായാണ് അടച്ചുപൂട്ടലെന്ന് അറബ് മാധ്യമങ്ങള്‍ റിപ്പോര്‍ട്ട്‌ചെയ്തു. ഇസ്‌റാഈല്‍ കമ്പനികളായ ഇലക്ട്ര കണ്‍സ്യൂമര്‍ പ്രോഡക്ട്‌സും അതിന്റെ അനുബന്ധ സ്ഥാപനമായ യെനോട്ട് ബിറ്റാനുമായി 2022ല്‍ ഫ്രാഞ്ചൈസി കരാര്‍ ഒപ്പിട്ടതുമുതല്‍ കാരിഫോര്‍ ബിഡിഎസിന്റെ പ്രധാന ലക്ഷ്യമാണ്. 

2024 നവംബറിലാണ് കാരിഫോര്‍ ജോര്‍ദാനിലെ എല്ലാ സ്റ്റോറുകളും അടച്ചുപൂട്ടിയത്. എന്നാല്‍ ജോര്‍ദാനില്‍ പിന്നീട് പ്രാദേശിക ബ്രാന്‍ഡായ ഹൈപ്പര്‍മാക്‌സിന് കീഴില്‍ പേര് മാറ്റി തുറക്കുകയായിരുന്നു. ഈ മാസം ആദ്യം ഒമാനിലെ പ്രവര്‍ത്തനങ്ങള്‍ അവസാനിപ്പിക്കുന്നതായി ശൃംഖല പ്രഖ്യാപിച്ചിരുന്നു. തുണീഷ്യയിലെ ചില സ്റ്റോറുകളും കമ്പനിക്ക് പൂട്ടേണ്ടിവരികയുണ്ടായി.

ഫലസ്തീനില്‍ ഇസ്‌റാഈല്‍ തുടരുന്നത് നിയമവിരുദ്ധമാണെന്നും അതിന് പിന്തുണ നല്‍കുന്നത് തടയണമെന്നും ഹേഗ് ആസ്ഥാനമായ രാജ്യാന്തര കോടതി കഴിഞ്ഞവര്‍ഷം ഉത്തരവിറക്കിയിരുന്നു. ഈ സാഹചര്യത്തില്‍ അധിനിവേശ സൈന്യത്തിന് നല്‍കുന്ന ഓരോ സഹായവും അന്താരാഷ്ട്ര നിയമങ്ങളുടെ ലംഘനമാണെന്ന് ചൂണ്ടിക്കാട്ടിയാണ് കാരിഫോറിനെ ബഹിഷ്‌കരിക്കേണ്ട കമ്പനികളുടെ പട്ടികയില്‍ ബിഡിഎസ് ഉള്‍പ്പെടുത്തിയത്. ഗസ്സയില്‍ കൂട്ടക്കൊല നടത്തിവരുന്ന സയണിസ്റ്റ് സൈനികര്‍ക്ക് കാരിഫോര്‍ സമ്മാനപൊതികള്‍ കൊടുത്തയച്ചത് വലിയ വിവാദമായിരുന്നു. കമ്പനി സൈനികര്‍ക്കായി സംഭാവന പിരിക്കാനും തുടങ്ങിയതോടെയാണ് ബഹിഷ്‌കരണം ശക്തിപ്പെട്ടത്.

ബഹിഷ്‌കാരണാഹ്വാനം ഉണ്ടായതോടെ വിവിധ രാജ്യങ്ങളിലെ കാരിഫോര്‍ ഔട്ട്‌ലെറ്റുകള്‍ക്ക് മുന്നില്‍ ജനാധിപത്യ വിശ്വാസികള്‍ പ്രതിഷേധിക്കുന്നത് പതിവ് കാഴ്ചയായി. ഇത് കാരിഫോറിന്റെ വരുമാനം കുത്തനെ ഇടിയാനനും ജീവനക്കാരെ വെട്ടിക്കുറ്കകാനും കാരണമായി. ലോകമെമ്പാടും 3400 ഷോപ്പുകളാണ് ഈ കമ്പനിക്കുള്ളത്.

അമേരിക്കന്‍ കമ്പനിയായ എച്ച്.പി, ഷെവ്‌റോണ്‍, പിസ്സ ഹട്ട്, കാള്‍ട്ടെക്‌സ്, ജര്‍മന്‍ കമ്പനിയായ സീമെന്‍സ്, പുമ, ഇന്‍ഷുറന്‍സ് കമ്പനിയായ എഎക്‌സ്എ, ഇന്റല്‍, ഹുണ്ടായ്, വോള്‍വോ, കാറ്റ്, ജെസിബി, ബാര്‍ക്ലേയ്‌സ്, ഗൂഗ്ള്‍, ആമസോണ്‍, എയര്‍ബിഎന്‍ബി, എക്‌സ്പീഡിയ, ഡിസ്‌നി, മക്‌ഡൊണാള്‍ഡ്‌സ്, ബര്‍ഗര്‍ കിങ്, പാപ്പ ജോണ്‍സ് തുടങ്ങിയവയാണ് ബഹിഷ്‌കരണം നേരിടുന്ന ബിഡിഎസിന്റെ പട്ടികയിലുള്ള മറ്റു കമ്പനികള്‍.

ALSO READ: ആണവരാജ്യമായ പാകിസ്ഥാനുമായി പ്രതിരോധ കരാറില്‍ ഒപ്പുവച്ച് സൗദി അറേബ്യ

Carrefour has closed all of its branches in Kuwait and Bahrain this week, marking another retreat from Gulf markets amid mounting boycott campaigns linked to the supermarket chain's ties with Israel. In Bahrain, Carrefour suspended operations on 14 September, shuttering its seven stores across the kingdom. And the company announced the complete closure of its operations in Kuwait on 16 September.