അബുദാബി: ഏഷ്യ കപ്പ് ഗ്രൂപ്പ് ഘട്ടത്തിലെ അവസാന മത്സരത്തിൽ ഒമാനെതിരെ അർദ്ധ സെഞ്ച്വറി നേടി തിളങ്ങി മലയാളി സൂപ്പർതാരം സഞ്ജു സാംസൺ. അബുദാബി ഇന്റർനാഷണൽ സ്റ്റേഡിയത്തിൽ നടക്കുന്ന മത്സരത്തിൽ 45 പന്തിൽ 56 റൺസ് നേടിയാണ് സഞ്ജു ഇന്ത്യൻ ടീമിന്റെ ടോപ് സ്കോററായത്. മൂന്ന് വീതം ഫോറുകളും സിക്സുകളും ആണ് സഞ്ജു അടിച്ചെടുത്തത്. ഈ അർദ്ധ സെഞ്ച്വറിക്ക് പിന്നാലെ വിക്കറ്റ് കീപ്പർ എന്ന നിലയിൽ സഞ്ജു ഒരു ചരിത്രനേട്ടമാണ് കൈപ്പിടിയിലാക്കിയത്. 

ടി-20 ഫോർമാറ്റിൽ നടക്കുന്ന ഏഷ്യ കപ്പിൽ അർദ്ധ സെഞ്ച്വറി നേടുന്ന ആദ്യ ഇന്ത്യൻ വിക്കറ്റ് കീപ്പറായാണ് സഞ്ജു മാറിയത്. മുൻ ഇന്ത്യൻ നായകനായ എംഎസ് ധോണിക്ക് പോലും നേടാനാവാത്ത നേട്ടമാണ് സഞ്ജു തന്റെ പേരിലാക്കി മാറ്റിയിരിക്കുന്നത്. 

മത്സരത്തിൽ ടോസ് നേടി ആദ്യം ബാറ്റ് ചെയ്ത ഇന്ത്യ എട്ട് വിക്കറ്റ് നഷ്ടത്തിൽ 188 റൺസാണ് നേടിയത്. ഇന്ത്യൻ നിരയിൽ സഞ്ജുവിന് പുറമെ അഭിഷേക് ശർമ്മ 15 പന്തിൽ 38 റൺസ് നേടി മികച്ച പ്രകടനം നടത്തി. അഞ്ചു ഫോറുകളും രണ്ട് സിക്സുകളും ആണ് താരം നേടിയത്. തിലക് വർമ്മ 18 പന്തിൽ 29 റൺസും അക്‌സർ പട്ടേൽ 13 പന്തിൽ 26 റൺസും നേടി നിർണായകമായി. 

ഒമാൻ ബൗളിങ്ങിൽ ആമിർ കലീം, ജിതേൻകുമാർ രാമാനന്ദി, ഫൈസൽ ഷാ എന്നിവർ രണ്ട് വിക്കറ്റുകൾ വീതം നേടി മികച്ച പ്രകടനം നടത്തി.

Sanju Samson shone by scoring a half-century against Oman in the final match of the Asia Cup group stage.Sanju became the first Indian wicketkeeper to score a half-century in the Asia Cup, which is held in the T20 format