ലിസ്ബൺ: ഗസ്സയിൽ ഇസ്‌റാഈൽ ആക്രമണം അതിരൂക്ഷമായ സാഹചര്യത്തിൽ ഫലസ്തീനൊപ്പം നിൽക്കാൻ തീരുമാനമെടുത്ത് യൂറോപ്യൻ രാജ്യമായ പോർച്ചുഗൽ. ഫലസ്തീനെ രാഷ്ട്രമായി അംഗീകരിക്കാൻ പോർച്ചുഗൽ തീരുമാനിച്ചു. ഇതോടെ 9 രാജ്യങ്ങളാണ് വരുന്ന യു.എൻ പൊതുസഭയിൽ ഫലസ്തീനെ രാഷ്ട്രമായി പ്രഖ്യാപിക്കുക. നേരത്തെ ഫ്രാൻസ്, കാനഡ, ആസ്‌ത്രേലിയ, യു.കെ രാജ്യങ്ങളും ഫലസ്തീനെ രാഷ്ട്രമായി പ്രഖ്യാപിക്കാൻ തീരുമാനിച്ചിരുന്നു. 

വെള്ളിയാഴ്ചയാണ് പോർച്ചുഗീസ് വിദേശകാര്യ മന്ത്രാലയം ഫലസ്തീനെ അംഗീകരിക്കാനുള്ള തീരുമാനത്തിലെത്തിയത്. യു.എന്നിന്റെ പൊതുസഭയും ഫലസ്തീനെ രാഷ്ട്രമായി അംഗീകരിക്കാനുള്ള പ്രമേയം പാസാക്കിയിരുന്നു. 

ALSO READ: ഗസ്സയിലെ കുഞ്ഞു മക്കളെ കൊന്നൊടുക്കാന്‍ ഇസ്‌റാഈലിന് കൂട്ടുനില്‍ക്കുന്ന 15 കമ്പനികള്‍ ഇതാ...; ലിസ്റ്റ് പുറത്തു വിട്ട് ആംനസ്റ്റി ഇന്റര്‍നാഷണല്‍

യു.എന്നിൽ 145 രാജ്യങ്ങൾ ഫലസ്തീനെ രാഷ്ട്രമായി അംഗീകരിക്കാൻ തീരുമാനിച്ചിട്ടുണ്ട്. ഇത് യു.എൻ അംഗരാജ്യങ്ങളുടെ 75 % വരും. ഇസ്‌റാഈൽ, അർജന്റീന, പരാഗ്വെ, പലാവു, നൗറു എന്നീ രാജ്യങ്ങളാണ് ഫലസ്തീനെ രാഷ്ട്രമായി അംഗീകരിക്കുന്നതിനെ എതിർത്ത് വോട്ടു ചെയ്തത്. ആറു രാജ്യങ്ങൾ വോട്ടെടുപ്പിൽ വിട്ടു നിൽക്കുകയും ചെയ്തിരുന്നു. 

സെപ്റ്റംബർ 25നാണ് യു.എന്നിന്റെ 80ാമത് പൊതുസഭ ചേരുന്നത്. ഇതിൽ പങ്കെടുക്കാൻ ഫലസ്തീൻ പ്രസിഡന്റ് മഹ്മൂദ് അബ്ബാസിനും സംഘത്തിനും യു.എസ് വിസ നിഷേധിച്ചിരുന്നു. ഇതേ തുടർന്ന് മഹ്മൂദ് അബ്ബാസിന് പൊതുസഭയെ ഓൺലൈൻ വഴി അഭിസംബോധന ചെയ്യാൻ യു.എൻ അനുമതി നൽകിയിരുന്നു. ഇതിനുള്ള വോട്ടെടുപ്പിൽ ഇന്ത്യയും ഫലസ്തീന് അനുകൂലമായി വോട്ടു ചെയ്തു.