ദുബൈ: ശമ്പളം കിട്ടാന്‍ ഇനിയും ദിവസങ്ങള്‍ കാത്തിരിക്കേണ്ടതിനാല്‍ രൂപയുടെ മൂല്യത്തകര്‍ച്ച മുതലാക്കാനാകാതെ ഇന്ത്യന്‍ പ്രവാസികള്‍. ഒരു ദിര്‍ഹത്തിന് 24 രൂപയായിരുന്നു ഇന്നത്തെ വിനിമയ നിരക്ക്.

അതേസമയം ഇതുവരെ സ്വരൂപിച്ച പണവും ക്രെഡിറ്റ് കാര്‍ഡില്‍ നിന്ന് പണം പിന്‍വലിച്ചും കടം വാങ്ങിയും നാട്ടിലേക്ക് പണം അയക്കുന്നവരുണ്ട്. എന്നാല്‍ വളരെ ചുരുക്കം ചിലര്‍ മാത്രമേ ഈ രീതി പിന്തുടരുന്നുള്ളൂ എന്നാണ് ധനവിനിമയ സ്ഥാപനങ്ങള്‍ പറയുന്നത്. നിലവിലുള്ള വിനിമയ നിരക്ക് മാസാവസാനം വരെ തുടരുകയാണെങ്കില്‍ നാട്ടിലേക്കുള്ള പണം ഒഴുക്ക് 25 ശതമാനം വരെ വര്‍ധിച്ചേക്കുമെന്ന് എക്‌സ്‌ചേഞ്ച് വൃത്തങ്ങള്‍ അറിയിച്ചു.

ALSO READ: ഇന്ത്യന്‍ രൂപയും മറ്റ് കറന്‍സികളും തമ്മിലുള്ള ഇന്നത്തെ വിനിമയ നിരക്ക് | Indian Rupee Value 

മണി ആപ്പുകളിലൂടെ നാട്ടിലേക്ക് പണം അയക്കുന്നവരുടെ എണ്ണം ദിനംപ്രതി വര്‍ധിച്ചുവരികയാണ്. അന്താരാഷ്ട്ര നിരക്ക് പൂര്‍ണമായും ലഭിക്കുന്നതും തുലോം തുച്ഛമായ സേവനനിരക്കും കൃത്യസമയത്ത് അക്കൗണ്ടില്‍ പണം എത്തുന്നതും മണി ആപ്പുകള്‍ ഉപയോഗിക്കാന്‍ ജനങ്ങളെ പ്രേരിപ്പിക്കുന്നു. എക്‌സ്‌ചേഞ്ചില്‍ പോകാതെ എവിടെ വെച്ചും ഏത് സമയത്തും പണം അയക്കാമെന്നതാണ് മണി ആപ്പിന്റെ മറ്റൊരു നേട്ടം.

ഇതില്‍ തന്നെ ചില മണി ആപ്പുകള്‍ സേവന നിരക്ക് ഈടാക്കുന്നില്ല. ചില മണി ആപ്പുകളില്‍ 5 മുതല്‍ 8 ദിര്‍ഹം വരെയാണ് സേവന നിരക്ക്. ഇതേസമയം 23 ദിര്‍ഹമാണ് എക്‌സ്‌ചേഞ്ചുകള്‍ സേവന നിരക്കായി ഈടാക്കുന്നത്. അന്താരാഷ്ട്ര വിനിമയ നിരക്ക് 24.15 ആയെങ്കിലും രാജ്യത്തെ ചില എക്‌സ്‌ചേഞ്ചുകള്‍ ഒരു ദിര്‍ഹത്തിന് 24.07 രൂപയാണ് നല്‍കികൊണ്ടിരിക്കുന്നത്.

ALSO READ: ആശ്വാസം, സ്വര്‍ണവില ഇന്നും കുറഞ്ഞു; അഡ്വാന്‍സ് ബുക്കിങ്ങിന് നല്ല സമയം 

അമേരിക്കന്‍ പ്രസിഡന്റ് ഡോണള്‍ഡ് ട്രംപ് ഇന്ത്യക്കെതിരായ നിലപാട് വീണ്ടും കടുപ്പിച്ചതോടെ രൂപയുടെ മൂല്യം വീണ്ടും തകരുകയായിരുന്നു. ട്രംപ് വിസ ഫീസ് ഒരു ലക്ഷം ഡോളറാക്കി ഉയര്‍ത്തിയതാണ് നിലവിലെ വിനിമയ നിരക്കിലെ ചാഞ്ചാട്ടത്തിന് ഹേതുവായതെന്ന് സാമ്പത്തിക വിദഗ്ധര്‍ ചൂണ്ടിക്കാട്ടുന്നു. ഇതിനെ തുടര്‍ന്ന് ഇന്ത്യന്‍ ഓഹരികളും തകര്‍ന്നടിഞ്ഞിരുന്നു. ഇന്ത്യയിലെ ഐടി കമ്പനികളുടെ ഓഹരികളും കുത്തനെ ഇടിഞ്ഞിരുന്നു. ട്രംപിന്റെ നിലപാട് മൂലം സ്വര്‍ണ വില വീണ്ടും കുത്തനെ ഉയരുകയാണ്. 

നിലവിലെ വിനിമയ നിരക്ക് (രൂപയില്‍)

• സഊദി റിയാല്‍- 23.65
• യുഎഇ ദിര്‍ഹം- 24.28
• ഖത്തര്‍ റിയാല്‍- 24.37
• ഒമാന്‍ റിയാല്‍- 230.75
• ബഹ്‌റൈന്‍ ദീനാര്‍- 235.31
• കുവൈത്ത് ദീനാര്‍- 290.45

expatriates face challenges capitalizing on the rupee's value decline, resorting to loans and credit card withdrawals to send money to india, impacting their financial planning.