തിരുവനന്തപുരം: ജനറൽ ആശുപത്രിയിൽ ശസ്ത്രക്രിയക്കിടെ യുവതിയുടെ നെഞ്ചിൽ കുടുങ്ങിയ ഗൈഡ് വയർ ഇനി പുറത്തെടുക്കുന്നത് സങ്കീർണവും അപകടകരവുമെന്ന് മെഡിക്കൽ ബോർഡ് വിദഗ്ധ സമിതി. സുമയ്യ എന്ന യുവതിയുടെ നെഞ്ചിലെ രക്തക്കുഴലുകളോട് ഒട്ടിച്ചേർന്ന നിലയിലുള്ള വയർ നീക്കം ചെയ്യുന്നത് രക്തക്കുഴൽ പൊട്ടാനുള്ള സാധ്യത വർധിപ്പിക്കുമെന്നാണ് മെഡിക്കൽ ബോർഡിന്റെ വിലയിരുത്തൽ. ഇക്കാര്യം സുമയ്യയെയും കുടുംബത്തെയും ബോധ്യപ്പെടുത്താനാണ് ആശുപത്രി അധികൃതരുടെ തീരുമാനം.

പ്രത്യേക മെഡിക്കൽ ബോർഡ് ഇന്ന് ചേർന്ന യോഗത്തിൽ സുമയ്യയുടെ ചികിത്സാ രേഖകൾ വിശദമായി പരിശോധിച്ച ശേഷമാണ് ഈ നിഗമനത്തിലെത്തിയത്. നിലവിൽ ഗൈഡ് വയർ രക്തക്കുഴലുകളോട് ഒട്ടിപ്പിടിച്ച നിലയിലാണ്. ഇത് പുറത്തെടുക്കാൻ ശസ്ത്രക്രിയ നടത്തിയാൽ ഗുരുതരമായ രക്തസ്രാവത്തിന് കാരണമാകാം. വയർ അവിടെ തുടരുന്നത് മറ്റ് ആരോഗ്യപ്രശ്നങ്ങൾക്ക് കാരണമാകില്ലെന്നും ബോർഡ് വിലയിരുത്തി. ശ്രീചിത്ര തിരുനാൾ ഇൻസ്റ്റിറ്റ്യൂട്ടിലെ വിദഗ്ധരുടെ അഭിപ്രായം അടിസ്ഥാനമാക്കിയാണ് ഈ തീരുമാനം.

ALSO READ: അമീബിക് മസ്തിഷ്കജ്വരം സംശയിച്ച് മൃതദേഹം പുറത്തെടുത്തു; മരണകാരണം ഹൃദയാഘാതമെന്ന് സ്ഥിരീകരണം

സുമയ്യ വയർ പുറത്തെടുക്കണമെന്ന് ആവശ്യപ്പെട്ടാൽ, അതിന്റെ അപകടസാധ്യതകൾ വിശദീകരിച്ച് ബോധ്യപ്പെടുത്താനാണ് ആശുപത്രിയുടെ തീരുമാനം. ശ്വാസംമുട്ടൽ ഉൾപ്പെടെയുള്ള ബുദ്ധിമുട്ടുകൾ നേരിടുന്നുണ്ടെന്ന് സുമയ്യ മെഡിക്കൽ ബോർഡിനെ അറിയിച്ചിരുന്നു. ഇതിന്റെ വിശദമായ പരിശോധന അടുത്ത ദിവസം നടത്തും. തുടർചികിത്സയെക്കുറിച്ചുള്ള തീരുമാനം ഇതിന് ശേഷമായിരിക്കും.

2023 മാർച്ച് 22ന് തിരുവനന്തപുരം ജനറൽ ആശുപത്രിയിൽ ഡോ. രാജീവ് കുമാറിന്റെ യൂണിറ്റിൽ നടന്ന തൈറോഡ് ഗ്രന്ഥി ശസ്ത്രക്രിയക്കിടെയാണ് സെൻട്രൽ ലൈനിന്റെ ഗൈഡ് വയർ സുമയ്യയുടെ നെഞ്ചിൽ കുടുങ്ങിയത്. രക്തവും മരുന്നും നൽകാൻ ഉപയോഗിച്ച ഈ വയർ നീക്കം ചെയ്യുന്നതിൽ ഡോക്ടർക്ക് ഗുരുതര വീഴ്ച സംഭവിച്ചതായി ആരോഗ്യമന്ത്രി നിയമസഭയിൽ സമ്മതിച്ചിരുന്നു.

ALSO READ: സംസ്ഥാനത്ത് അതിശക്തമായ മഴയ്ക്ക് സാധ്യത: രണ്ട് ജില്ലകളിൽ ഓറഞ്ച് അലർട്ട്;  മത്സ്യത്തൊഴിലാളികൾക്ക് ജാഗ്രതാ നിർദേശം

എന്നാൽ, കുറ്റക്കാർക്കെതിരെ ഇതുവരെ നടപടിയെടുത്തിട്ടില്ല. കുറ്റക്കാരനായ ഡോ. രാജീവ് കുമാറിനെതിരെ നടപടി എടുക്കണമെന്നാവശ്യപ്പെട്ട് കഴിഞ്ഞ ആഴ്ച നിയമസഭയിൽ പ്രതിപക്ഷം ആരോ​ഗ്യമന്ത്രി വീണജോർജ്ജിനോട് വിശദീകരണം തേടിയിരുന്നെങ്കിലും മറുപടി മൗനത്തിൽ മാത്രം ഒതുക്കുകയായിരുന്നു.  അതേസമയം സുമയ്യയുടെ ശാരീരികാവസ്ഥ പരിഗണിച്ച് സർക്കാർ അടിയന്തര പരിഹാരം കാണണമെന്നും കുറ്റക്കാർക്കെതിരെ കർശന നടപടി സ്വീകരിക്കണമെന്നും കുടുംബം ആവശ്യപ്പെട്ടിട്ടുണ്ട്.

A guide wire lodged in a young woman's chest during surgery at Thiruvananthapuram General Hospital poses serious risks if removed, as it is fused with blood vessels and could cause rupture. The medical board, after detailed review, plans to inform the patient, Sumayya, and her family about the dangers. The wire, stuck since a March 2023 thyroid surgery, is deemed safe to remain, with further tests planned to address her breathing issues. The family demands accountability and government action.