പാല്‍ഘര്‍: ഓടുന്ന ട്രെയിനില്‍ നിന്നും യാത്രക്കാരന്‍ പുറത്തേക്കെറിഞ്ഞ തേങ്ങ തലയില്‍ വീണ് യുവാവ് മരിച്ചു. മുംബൈക്കടുത്ത് ഭയന്തറിലാണ് സംഭവം. സഞ്ജയ് ഭോയിര്‍(30) ആണ് മരിച്ചത്. ശനിയാഴ്ച രാവിലെയാണ് സംഭവം. ചികിത്സയിലായിരുന്ന സഞ്ജയ് ഇന്നലെയാണ് മരണപ്പെട്ടത്. 

നൈഗാവിനും ഭയന്ദര്‍ ക്രീക്കിനും ഇടയിലുള്ള പഞ്ചു ദ്വീപിലാണ് സഞ്ജയ് താമസിച്ചിരുന്നത്. ശനിയാഴ്ച രാവിലെ 8:30 ഓടെ റെയില്‍വേ ക്രീക്ക് പാലത്തിലൂടെ നൈഗാവോണ്‍ സ്റ്റേഷനിലേക്ക് നടക്കുകയായിരുന്നു യുവാവ്. 

ALSO READ: ബംഗ്ലാദേശിലേക്ക് നാടുകടത്തപ്പെട്ട സുനാലിയെയും കുടുംബത്തെയും തിരികെയെത്തിക്കാന്‍ ഉത്തരവ്; ബംഗാളികളെ ലക്ഷ്യംവയ്ക്കുന്ന ആഭ്യന്തരമന്ത്രാലയത്തിന് കനത്ത തിരിച്ചടി

ഇതേസമയം ഓടുന്ന ലോക്കല്‍ ട്രെയിനില്‍ നിന്ന് യാത്രക്കാരിലൊരാള്‍ പൂജാ സാധനങ്ങള്‍ അടങ്ങിയ പാക്കറ്റ് പുറത്തേക്ക് വലിച്ചെറിയുകയായിരുന്നു. ഇതിലുണ്ടായിരുന്ന തേങ്ങ സഞ്ജയുടെ തലയിലാണ് വന്നുപതിച്ചത്.

സംഭവത്തില്‍ ഗുരുതരമായി പരുക്കേറ്റ യുവാവിനെ ആദ്യം വസായിലെ മുനിസിപ്പല്‍ സര്‍ ഡിഎം പെറ്റിറ്റ് ആശുപത്രിയിലെത്തിച്ചു. എന്നാല്‍ പിന്നീട് കൂടുതല്‍ ചികിത്സയ്ക്കായി മുംബൈയിലെ ആശുപത്രിയിലേക്ക് മാറ്റുകയായിരുന്നു. അതേസമയം സംഭവത്തെക്കുറിച്ച് പരാതിയൊന്നും ലഭിച്ചിട്ടില്ലെന്ന് റെയില്‍വേ പൊലിസ് അറിയിച്ചു.

ALSO READ: ഇസ്‌റാഈലിന് നേരെ വീണ്ടും ബാലിസ്റ്റിക് മിസൈല്‍ അയച്ച് ഹൂതികള്‍, എങ്ങും സൈറണ്‍; മിസൈല്‍ തടഞ്ഞതായി സൈന്യത്തിന്റെ അവകാശ വാദം 

ഈ പ്രദേശത്ത് വ്യാപകമായി ട്രെയിനുകളില്‍ നിന്ന് വലിച്ചെറിയുന്ന വസ്തുക്കള്‍ ദേഹത്തുവീണ് പലപ്പോഴും കാല്‍നടയാത്രക്കാര്‍ക്ക് പരുക്കേല്‍ക്കാറുണ്ട്. നൈഗാവിനും ഭയാന്ദറിനും ഇടയിലുള്ള പാലങ്ങളില്‍ നിന്ന് നദിയിലേക്കും പുഴയിലേക്കും സാധനങ്ങള്‍ എറിയുന്നത് പതിവാണെന്നും നാട്ടുകാര്‍ പറയുന്നു. 

അതേസമയം, സംഭവത്തില്‍ പൊലിസ് അന്വേഷണം നടത്തുന്നുണ്ട്. സി.സി.ടി.വി ദൃശ്യങ്ങളടക്കം പരിശോധിച്ച് തേങ്ങ എറിഞ്ഞ വ്യക്തിയെ കണ്ടെത്താനുള്ള ശ്രമത്തിലാണ് പൊലിസ്. 

English Summary: In a bizarre and tragic incident, a 30-year-old man named Sanjay Bhoyar died after being struck on the head by a coconut thrown from a moving local train. The incident occurred on Saturday morning near Bhayandar.