ചെന്നൈ; കരൂര്‍ ദുരന്തത്തില്‍ തമിഴക വെട്രി കഴകം (ടി.വി.കെ) നേതാവ് നടന്‍ വിജയ്ക്കെതിരേ പൊലിസ് തയ്യാറാക്കിയ എഫ്.ഐ.ആറില്‍ ഗുരുതര പരാമര്‍ശങ്ങള്‍. നിശ്ചിത സമയപരിധി നിശ്ചയിച്ചാണ് വിജയ്ക്ക് റോഡ്‌ഷോയ്ക്ക് അനുമതി നല്‍കിയിരുന്നതെന്നും എന്നാല്‍ വിജയ് അനുമതിയിവ്വല്ലാതെ റോഡ് ഷോ അടക്കം നടത്തിയെന്നും എഫ്.ഐ.ആറില്‍ പറയുന്നു. കൂടുതല്‍ ആളുകള്‍ എത്തുന്നതിനായി പരിപാടി മനപൂര്‍വ്വം വൈകിച്ചു. 

രാവിലെ 9 മണിക്കാണ് റാലി ആരംഭിക്കേണ്ടിയിരുന്നത്. 11 മണിയോടുകൂടി തന്നെ പ്രദേശത്ത് വലിയൊരു ജനക്കൂട്ടം തടിച്ചുകൂടിയിരുന്നു. ഉച്ചയ്ക്ക് വിജയ് പ്രസംഗിക്കുമെന്ന് അറിയിച്ചിരുന്നുവെങ്കിലും വൈകീട്ട് 7 മണിക്കാണ് വിജയ് എത്തിയതെന്നും എഫ്.ഐ.ആറില്‍ പറയുന്നു. 

ALSO READ: കരൂരിൽ വിജയ് പങ്കെടുത്ത റാലിക്കിടെയുണ്ടായ അപകടം; നേതാക്കൾക്കെതിരെ കേസ്

വിജയ്‌നെ കാണാന്‍ എത്തിയവര്‍ മരച്ചില്ലകളില്‍ കയറിനിന്നിന്നു. ഈ മരച്ചില്ലകള്‍ പൊട്ടി വീഴുന്ന സ്ഥിതി ഉണ്ടായതായും ആളുകള്‍ ഉയരമുള്ള സ്ഥലങ്ങളില്‍ പിടിച്ചു കയറാന്‍ ശ്രമിച്ചതും അപകടത്തിന് കാരണമായെന്നും ചൂണ്ടിക്കാണിക്കുന്നുണ്ട്. 

ആളുകള്‍ അനിയന്ത്രിമായി എത്തുകയാണെന്നും അതിനാല്‍ മറ്റിടങ്ങളില്‍ ഇറങ്ങുകയോ സ്വീകരണം ഏറ്റുവാങ്ങുകയോ ചെയ്യരുതെന്നും പൊലിസ് ഭാരവാഹികള്‍ക്ക് മുന്നറിയിപ്പ് നല്‍കിയിരുന്നു. എന്നാല്‍ അത് അവര്‍ അവഗണിക്കുകയാണ് ചെയ്തതെന്നും എഫ്.ഐ.ആറില്‍ പറയുന്നു. എന്നാല്‍ സംഭവത്തില്‍ ഇതുവരെ വിജയ്‌ക്കെതിരെ കേസ് രജിസ്റ്റര്‍ ചെയ്തിട്ടില്ല. 

അതേസമയം, വിജയ്യുടെ റാലിക്കിടെയുണ്ടായ തിക്കിലും തിരക്കിലും പെട്ട് മരിച്ചവരുടെ എണ്ണം 41 ആയി. ചികിത്സയിലിരുന്ന 65കാരി സുഗുണ ആണ് മരിച്ചത്.അതിനിടെ, വിജയ്യുടെ റാലിക്കിടെ വൈദ്യുതി മുടങ്ങിയെന്ന വാദം തമിഴ്‌നാട് സര്‍ക്കാര്‍ നിഷേധിച്ചു. വൈദ്യുതി മുടങ്ങിയത് ജനങ്ങളെ പരിഭ്രാന്തരാക്കിയെന്നും ഇത് തിക്കിലും തിരക്കിലും കലാശിച്ചെന്നുമാണ് ആരോപണം.

''പരിപാടിയില്‍ വൈദ്യുതി മുടങ്ങിയില്ല. ടിവികെ പാര്‍ട്ടി വൈദ്യുതി വിതരണം തടസ്സപ്പെടുത്തണമെന്ന് ആവശ്യപ്പെട്ടാലും, അത്തരമൊരു വൈദ്യുതി മുടക്കം ഉണ്ടാവുമായിരുന്നില്ല. പാര്‍ട്ടിയുടെ ക്രമീകരണങ്ങളിലെ ജനറേറ്റര്‍ പ്രശ്‌നം മൂലമാണ് കുറച്ച് ലൈറ്റുകള്‍ മങ്ങിയത്,'' കരൂര്‍ കളക്ടറെയും എഡിജിപിയെയും ഉദ്ധരിച്ച് സംസ്ഥാന ഫാക്റ്റ് ചെക്ക് ടീം എക്‌സില്‍ പോസ്റ്റ് ചെയ്തു. വിജയ് എത്തിയ സമയത്ത് ഏകദേശം 30 മിനിറ്റ് വൈദ്യുതി മുടങ്ങിയതായി ഇരകളും ടി.വി.കെയും ആരോപിച്ചിരുന്നു.

ALSO READ: 'ഇത് ഒന്നുമാവില്ലെന്ന് അറിയാം, കുടുംബാംഗമെന്ന നിലയില്‍ നിങ്ങള്‍ക്കൊപ്പം നില്‍ക്കേണ്ടത് എന്റെ കടമ' കരൂര്‍ ദുരന്തത്തില്‍ മരിച്ചവരുടെ ബന്ധുക്കള്‍ക്ക് 20 ലക്ഷം രൂപ ധനസഹായം പ്രഖ്യാപിച്ച് വിജയ്

അതേസമയം, കരൂര്‍ ദുരന്തത്തില്‍ ഗൂഢാലോചന അന്വേഷണിക്കണമെന്ന് ആവശ്യപ്പെട്ട് ടി.വി.കെ നല്‍കിയ ഹരജിപരിഗണിക്കുന്നത് മദ്രാസ് ഹൈക്കോടതി മാറ്റിവെച്ചു.. ദുരന്തം സ്വതന്ത്ര ഏജന്‍സി അന്വേഷിക്കണമെന്നാണ് ടി.വി.കെയുടെ ആവശ്യം. സിസിടിവി ദൃശ്യങ്ങള്‍ നല്‍കണമെന്നും ഹരജിയില്‍ ആവശ്യപ്പെടുന്നു. കല്ലേറും ലാത്തിചാര്‍ജും ഉണ്ടായെന്ന ടിവികെയുടെ വാദം എ.ഡി.ജി.പി തള്ളി.

വിജയ്യുടെ ചെന്നൈ നീലാങ്കരയിലെ വസതിയില്‍ പൊലിസ് സുരക്ഷയും ശക്തമാക്കിയിട്ടുണ്ട്. വിജയുടെ വീടിന് നേരെ ബോംബ് ഭീഷണി ഉണ്ടായെന്നാണ് റിപ്പോര്‍ട്ട്.

English Summary: Serious allegations have been raised against Tamil actor and TVK (Tamizhaga Vetri Kazhagam) leader Vijay in the police FIR related to the Karur rally tragedy, where 41 people died. According to the FIR, Vijay intentionally delayed his arrival by nearly four hours to draw a larger crowd and conducted an unauthorized roadshow, violating the time restrictions set by authorities.