ഹൈദരാബാദ്: അഞ്ച് രൂപയ്ക്ക് പ്രഭാത ഭക്ഷണവും ഉച്ച ഭക്ഷണവും വിളമ്പി സാധാരണക്കാർക്ക് കൈത്താങ്ങാകാൻ ഇന്ദിരാമ്മ കാന്റീനുകൾ. തെലങ്കാനയിലെ ഹൈദരാബാദ് നഗരത്തിലുടനീളം ആകെ 150 ഇന്ദിരാമ്മ കാന്റീനുകൾ ആരംഭിക്കാൻ നിർദേശിച്ച് ജിഎച്ച്എംസി (Greater Hyderabad Municipal Corporation). ജൂബിലി ഹിൽസ് നിയമസഭാ മണ്ഡലത്തിൽ പ്രഭാതഭക്ഷണവും ഉച്ചഭക്ഷണവും വിളമ്പുന്ന 12 കാന്റീനുകൾ ഇന്ന് ആരംഭിച്ചതിന് പിന്നാലെയാണ് കൂടുതൽ തുറക്കാൻ തീരുമാനിച്ചത്. 

നഗരത്തിൽ 50 കാന്റീനുകളുടെ പണി പുരോഗമിക്കുകയാണ്. 11 കാന്റീനുകളുടെ നവീകരണ പ്രവർത്തനങ്ങൾ പുരോഗമിക്കുന്നു. ബാക്കി 77 കാന്റീനുകൾ രണ്ടാം ഘട്ടത്തിൽ പൂർത്തിയാകും.

നിലവിൽ 5 രൂപയ്ക്ക് ഉച്ചഭക്ഷണം നൽകുന്നത് തുടരുന്നതിനു പുറമേ, ഈ കാന്റീനുകൾ ദരിദ്രർക്കും ആവശ്യക്കാർക്കും 5 രൂപയ്ക്ക് പ്രഭാതഭക്ഷണവും നൽകും. പ്രഭാതഭക്ഷണത്തിന്, മൂന്ന് ഇഡ്ഡലി, സാമ്പാർ, ചട്ണി, ചമ്മന്തിപൊടി എന്നിവ നൽകും. പൊങ്കൽ പോലുള്ള മറ്റ് ഇനങ്ങളും പ്രഭാതഭക്ഷണ മെനുവിൽ ലഭ്യമാകും.

ALSO READ: പപ്പടം വീട്ടില്‍ തന്നെ ഉണ്ടാക്കാം; എളുപ്പത്തില്‍, നല്ല രുചിയോടെ

ഇരിപ്പിട ക്രമീകരണം, കുടിവെള്ളത്തിനായുള്ള ആർ‌ഒ പ്ലാന്റുകൾ, വാഷ്‌ബേസിനുകൾ എന്നിവ മനോഹരമായി സജ്ജീകരിച്ചാണ് ഇന്ദിരാമ്മ കാന്റീനുകൾ പ്രവർത്തിക്കുന്നത്. ശരാശരി 30,000 ഗുണഭോക്താക്കൾക്ക് ദിവസവും ഇന്ദിരാമ്മ കാന്റീനുകൾ വഴി ഉച്ചഭക്ഷണം മാത്രം ലഭിക്കും.

ഇന്ദിരാമ്മ കാന്റീൻ

കുറഞ്ഞ വിലക്ക് സാധാരണക്കാർക്കും ദരിദ്രർക്കും ഭക്ഷണം നൽകുന്നതിന് വേണ്ടി ആരംഭിച്ച പദ്ധതിയാണ് ഇന്ദിരാമ്മ കാന്റീനുകൾ (Indiramma Canteens) എന്ന് അറിയപ്പെടുന്നത്. ഇന്ത്യയുടെ മുൻ പ്രധാനമന്ത്രി ഇന്ദിരാ ഗാന്ധിയോടുള്ള ആദരസൂചകമായാണ് ഈ പദ്ധതിക്ക് "ഇന്ദിരാമ്മ കാന്റീൻ" എന്ന പേര് നൽകിയത്. പട്ടിണി ഇല്ലാതാക്കുക (Zero Hunger), ഹൈദരാബാദ് നഗരത്തിലും മറ്റു ജോലി ചെയ്യുന്ന പാവപ്പെട്ട തൊഴിലാളികൾക്ക് (നിർമാണത്തൊഴിലാളികൾ, റിക്ഷ - ടാക്സി ഡ്രൈവർമാർ തുടങ്ങിയവർക്ക്) കൃത്യമായ സമയത്ത് ഭക്ഷണം ലഭ്യമാക്കുക എന്നിവയാണ് പദ്ധതിയിലൂടെ ലക്ഷ്യമിടുന്നത്.

വർഷം    നൽകിയ ഭക്ഷണം
2022                72,31,210
2023                93,03,225
2024                65,86,380
2025             39,21,965 (ജൂലൈ വരെ)