ഡൽഹി: ഇന്ത്യൻ സൈന്യവുമായി ബന്ധപ്പെട്ട അതീവ രഹസ്യ വിവരങ്ങൾ പാകിസ്ഥാന് കൈമാറ്റം ചെയ്ത ഹരിയാനയിലെ മേവാത് സ്വദേശിയെ പൊലിസ് അറസ്റ്റ് ചെയ്തു. പൽവാൽ പൊലിസിന്റെ ക്രൈം ഇൻവെസ്റ്റിഗേഷൻ ഏജൻസിയാണ് (സിഐഎ) ഇയാളെ പിടികൂടിയത്. തൗഫീഖ് എന്നാണ് പിടിയിലായ വ്യക്തിയുടെ പേര്. മേവാത്തിനടുത്തുള്ള ഹാത്തിൻ ബ്ലോക്കിലെ അലിമേവ് ഗ്രാമത്തിലെ താമസക്കാരനാണ് ഇയാൾ.

വിദേശ വിസ സേവനങ്ങൾ നടത്തുന്നതിന്റെ മറവിൽ പാകിസ്ഥാന് സൈനിക രഹസ്യങ്ങൾ ചോർത്തിക്കൊടുത്തതായാണ് പൊലിസ് ആരോപണം. ഇന്ത്യൻ സൈന്യത്തിന്റെ പ്രവർത്തനങ്ങളുമായി ബന്ധപ്പെട്ട വിവരങ്ങൾ പാകിസ്ഥാൻ ഹൈക്കമ്മീഷനിലേക്ക് കൈമാറ്റം ചെയ്തതിനാണ് ഇയാള്‍ക്കെതിരെ കേസ് രജിസ്റ്റർ ചെയ്തിരിക്കുന്നത്. പ്രതിയുടെ മൊബൈൽ ഫോണിൽ നിന്ന് കേസുമായി ബന്ധപ്പെട്ട നിർണായക തെളിവുകൾ ലഭിച്ചു.

2022-ൽ പാകിസ്ഥാൻ സന്ദർശിച്ചിരുന്നതായും, അതിർത്തി മേഖലകളിലെ വ്യക്തികളുമായി സമ്പർക്കം നിലനിർത്തിയിരുന്നതായും പൊലിസ് കണ്ടെത്തി. പാകിസ്ഥാനിലേക്ക് പോകാൻ നിരവധി പേർക്ക് വിസ സഹായം ലഭ്യമാക്കിയിരുന്നു. കേന്ദ്ര ഏജൻസികളും ഹരിയാന പൊലിസും ചേർന്നാണ് കേസ് അന്വേഷിക്കുന്നത്. പ്രതിയുടെ പ്രവർത്തനങ്ങളുടെ ആഴവും വ്യാപ്തിയും വിശദമായി പരിശോധിക്കുമെന്ന് പൊലിസ് അറിയിച്ചു.