കോഴിക്കോട്: പറമ്പിൽ ബസാറിൽ വീട് കുത്തിത്തുറന്ന് 25 പവൻ സ്വർണാഭരണം മോഷ്ടിച്ച കേസിൽ പ്രതി പൊലിസ് പിടിയിൽ. പന്തീരങ്കാവ് പാറക്കുളം സ്വദേശി അഖിൽ ആണ് അറസ്റ്റിലായത്. മല്ലിശ്ശേരി താഴം മധുവിന്റെ വീട്ടിൽ അലമാരയിൽ സൂക്ഷിച്ചിരുന്ന 25 പവൻ സ്വർണാഭരണം മോഷ്ടിച്ച കേസിലാണ് പ്രതിയെ പിടികൂടിയത്. കക്കോടിയിൽ മോഷണശ്രമത്തിനിടെ നാട്ടുകാർ പിടികൂടാൻ ശ്രമിച്ചപ്പോൾ, സഞ്ചരിച്ചിരുന്ന സ്കൂട്ടർ ഉപേക്ഷിച്ച് അഖിൽ രക്ഷപ്പെട്ടിരുന്നു. പിന്നീട് മോഷ്ടിച്ച മറ്റൊരു ബൈക്കിൽ രക്ഷപ്പെടാൻ ശ്രമിക്കവെയാണ് പൊലിസ് ഇയാളെ പിടികൂടിയത്.

കഴിഞ്ഞ വ്യാഴാഴ്ച രാത്രി 10 മണിയോടെയാണ് മധുവിന്റെ വീട്ടിൽ മോഷണം നടന്നത്. വീട്ടുകാർ ആശുപത്രി ആവശ്യത്തിനായി പുറത്തുപോയ സമയം മനസ്സിലാക്കി, അഖിൽ വീട്ടിൽ അതിക്രമിച്ച് കയറി മോഷണം നടത്തുകയായിരുന്നു. മധുവിന്റെ കുടുംബം തിരിച്ചെത്തിയപ്പോഴാണ് മോഷണം കണ്ടെത്തിയത്. വീടിന് സമീപത്തെ ഇടവഴിയിലൂടെ ഒരാൾ നടന്നുപോകുന്നതും വീട്ടുവളപ്പിലേക്ക് പ്രവേശിക്കുന്നതും സിസിടിവി ദൃശ്യങ്ങളിൽ പതിഞ്ഞിട്ടുണ്ട്.

പ്രതി ടെറസ് വഴി കയറി മുകൾഭാഗത്തെ വാതിൽ തുറന്നാണ് വീട്ടിനുള്ളിൽ പ്രവേശിച്ച് മോഷണം നടത്തിയത്. 14 വ്യത്യസ്ത സ്ഥലങ്ങളിൽ മോഷണം നടത്തിയതായി അഖിൽ പൊലിസിനോട് സമ്മതിച്ചതായി മെഡിക്കൽ കോളേജ് എസിപി ഉമേഷ് അറിയിച്ചു. കക്കോടിയിൽ ഉപേക്ഷിച്ച നിലയിൽ കണ്ടെത്തിയ അഖിലിന്റെ സ്കൂട്ടറിൽ വ്യാജ നമ്പർ പ്ലേറ്റ് ഉപയോഗിച്ചിരുന്നതായും പൊലിസ് കണ്ടെത്തി.