ഡൽഹി: ഉത്തർപ്രദേശിലെ ഗ്രേറ്റർ നോയിഡയിൽ 21-ാം നിലയിലെ ഫ്ലാറ്റിന്റെ ബാൽക്കണിയിൽ നിന്ന് താഴേക്ക് ചാടിയ എംബിബിഎസ് വിദ്യാർത്ഥി മരിച്ചു. മഥുര സ്വദേശി ശിവ (29) ആണ് മരിച്ചത്. യുവാവ് ആത്മഹത്യ ചെയ്തതാണെന്നാണ് പൊലിസിന്റെ പ്രാഥമിക നിഗമനം. എന്നാൽ, ആത്മഹത്യാ കുറിപ്പോ മറ്റ് തെളിവുകളോ ലഭിച്ചിട്ടില്ല. സംഭവസ്ഥലത്തെത്തിയ പൊലിസ് മൃതദേഹം ആശുപത്രിയിലേക്ക് മാറ്റി.

ഡൽഹിയിലെ സ്വകാര്യ മെഡിക്കൽ കോളേജിലെ 2015 ബാച്ച് എംബിബിഎസ് വിദ്യാർത്ഥിയായിരുന്നു ശിവ. കോവിഡ് കാലത്ത് മാനസിക പ്രയാസങ്ങൾ നേരിട്ടതിനെത്തുടർന്ന് പഠനം മുടങ്ങി. ഇതോടെ കടുത്ത വിഷാദരോഗത്തിന് അടിമയായെന്നാണ് ബന്ധുക്കൾ പറയുന്നത്.

ഗ്രേറ്റർ നോയിഡയിലെ ഗൗർ സിറ്റി പ്രദേശത്തുള്ള സഹോദരിയുടെ ഫ്ലാറ്റിലാണ് ശിവ എത്തിയത്. മാതാപിതാക്കളും ഒപ്പമുണ്ടായിരുന്നു. വീട്ടിനുള്ളിൽ മറ്റൊരു മുറിയിൽ മാതാപിതാക്കൾ ഉണ്ടായിരിക്കെ, ശിവ ബാൽക്കണിയിലേക്ക് പോയി താഴേക്ക് ചാടുകയായിരുന്നുവെന്നാണ് വിവരം. മൃതദേഹം പോസ്റ്റ്മോർട്ടത്തിനായി മാറ്റിയിട്ടുണ്ട്. സംഭവത്തിൽ വിശദമായ അന്വേഷണം നടത്തുമെന്ന് പൊലിസ് അറിയിച്ചു.