കണ്ണൂര്‍: പള്ളിക്കുന്ന് ഗവ.ഹൈസ്‌കൂളിനു പിന്‍വശത്തുള്ള ആളൊഴിഞ്ഞ പറമ്പില്‍നിന്നു രണ്ടു ബോംബുകള്‍ കണ്ടെത്തി. ഒരു സ്റ്റീല്‍ ബോംബും ഐസ്‌ക്രീം ബോംബും പ്ലാസ്റ്റിക് കവറില്‍ സൂക്ഷിച്ച നിലയിലായിരുന്നു. മൂകാംബിക ക്ഷേത്രത്തിലേക്കു പോകുന്ന റോഡിനു സമീപം മുംബൈ സ്വദേശിയുടെ ഉടമസ്ഥതയിലുള്ളതാണ് പറമ്പ്.
സ്‌കൂളിനു സമീപം കഞ്ചാവ് വില്‍പനയും ഉപയോഗവും വ്യാപകമാണെന്ന പരാതിയെത്തുടര്‍ന്ന് പരിശോധനയ്‌ക്കെത്തിയ എക്‌സൈസ് സംഘമാണ് ഇന്നലെ വൈകുന്നേരം 4.30ഓടെ ബോംബുകള്‍ കണ്ടെത്തിയത്. അസി. എക്‌സൈസ് ഇന്‍സ്‌പെക്ടര്‍ വി അഷ്‌റഫിന്റെ നേതൃത്വത്തിലാണ് പരിശോധന നടത്തിയത്. ബോംബുകള്‍ കണ്ടെത്തിയതിനെത്തുടര്‍ന്ന് ബോംബ് സ്‌ക്വാഡും കണ്ണൂര്‍ സി.ഐ കെ.വി വേണുഗോപാല്‍, എസ്.ഐ എ കുട്ടിക്കൃഷ്ണന്‍ എന്നിവരുടെ നേതൃത്വത്തിലുള്ള പൊലിസും സ്ഥലത്തെത്തി.
ബോംബുകള്‍ പിന്നീട് നിര്‍വീര്യമാക്കി.