ന്യൂഡല്‍ഹി: രണ്ട് വയസിന് താഴെയുള്ള കുട്ടികള്‍ക്ക് ചുമ, ജലദോഷം എന്നിവയുടെ മരുന്നുകള്‍ നല്‍കരുതെന്ന് നിര്‍ദേശിച്ച് കേന്ദ്ര ആരോഗ്യ മന്ത്രാലയം. കഫ്‌സിറപ്പ് കഴിച്ച് കുട്ടികള്‍ മരിച്ച വാര്‍ത്തകള്‍ പുറത്തുവന്നതിന് പിന്നാലെയാണ് നടപടി. മരുന്നുകള്‍ ഉപയോഗിക്കുന്നതിന് മുന്‍പ് നിര്‍ബന്ധമായും ഡോക്ടറുടെ നിര്‍ദേശം തേടണമെന്നും ആരോഗ്യ മന്ത്രാലയം വ്യക്തമാക്കി. 

മരുന്ന് ഇതര രീതികള്‍ പ്രാഥമികമായി പരിഗണിക്കണം. എല്ലാ ആരോഗ്യ സ്ഥാപനങ്ങളും ഇത്തരം മരുന്നുകളുടെ ഗുണനിലവാരം ഉറപ്പ് വരുത്തണം. മരുന്ന് നിര്‍ദേശിക്കുന്നതില്‍ സ്വകാര്യ സ്ഥാപനങ്ങളടക്കം ജാഗ്രത പുലര്‍ത്തണം. സംസ്ഥാനങ്ങളിലെ എല്ലാ ആരോഗ്യ സ്ഥാപനങ്ങളും മേല്‍പറഞ്ഞ നിര്‍ദേശങ്ങള്‍ കര്‍ശനമായി പാലിക്കണമെന്നും കേന്ദ്ര ആരോഗ്യ മന്ത്രാലയം മുന്നറിയിപ്പ് നല്‍കിയിട്ടുണ്ട്. 

ALSO READ: ഒന്‍പത് വയസുകാരിയുടെ കൈ മുറിച്ചുമാറ്റിയ സംഭവം:  പാലക്കാട് ജില്ലാ ആശുപത്രിക്കെതിരേ പരാതി, അന്വേഷണം പ്രഖ്യാപിച്ച് ഡിഎംഒ 

വ്യാജ കഫ്‌സിറപ്പ് ഉപയോഗിച്ച് രണ്ടാഴ്ച്ചക്കിടെ മധ്യപ്രദേശില്‍ ഒന്‍പത് കുട്ടികളും, രാജസ്ഥാനില്‍ രണ്ട് കുട്ടികളും മരിച്ചിരുന്നു. നിലവില്‍ 1400ലധികം പേര്‍ നിരീക്ഷണത്തില്‍ തുടരുകയാണ്. കിഡ്‌നി തകരാര്‍ സംഭവിച്ചാണ് കുട്ടികള്‍ മരിച്ചത്. സംഭവത്തില്‍ വിശദമായ അന്വേഷണം തുടരുകയാണ്. മധ്യപ്രദേശിലെ  ചിന്ദ്വാഡയിലാണ് കൂടുതല്‍ മരണം റിപ്പോര്‍ട്ട് ചെയ്തത്. 

ഭരത്പൂര്‍, സിക്കാര്‍ ജില്ലകളില്‍ ചുമയുടെ സിറപ്പ് കഴിച്ചതിന് ശേഷം ആളുകളില്‍ ഛര്‍ദ്ദി, മയക്കം, അസ്വസ്ഥത, തലക്കറക്കം, അബോധാവസ്ഥ തുടങ്ങിയ പരാതികള്‍ റിപ്പോര്‍ട്ട് ചെയ്തിരുന്നു. വാര്‍ത്തകള്‍ക്ക് പിന്നാലെ ഭരത്പൂര്‍ ജില്ലയിലുടനീളം ഈ മരുന്ന് വിതരണത്തിന് നിരോധനം ഏര്‍പ്പെടുത്തുകയും ചെയ്തിരുന്നു. 

India's Health Ministry issues a warning against administering cough and cold medications to children under 2 years, citing potential health risks.