കൊച്ചി: പിതാവ് ബാങ്കില്‍ നിക്ഷേപിച്ച ഫിക്‌സഡ് ഡെപ്പോസിറ്റ് തുക അവകാശിയായ മകന് നല്‍കുന്നതില്‍ വീഴ്ച്ച വരുത്തിയ എസ്.ബി.ഐ ബാങ്കിനെതിരെ നടപടി. അവകാശിക്ക് ഡെപ്പോസിറ്റ് തുകയും, നഷ്ടപരിഹാരവും നല്‍കണമെന്ന് എറണാകുളം ജില്ല ഉപഭോകൃത തര്‍ക്ക പരിഹാര കമ്മീഷന്‍ ഉത്തരവിട്ടു. എറണാകുളം വൈറ്റില സ്വദേശി പിപി ജോര്‍ജ് നല്‍കിയ പരാതിയിലാണ് നടപടി. 

1989ലാണ് ജോര്‍ജിന്റെ പിതാവ് പിവി പീറ്റര്‍ വൈറ്റിലയിലെ സ്റ്റേറ്റ് ബാങ്ക് ഓഫ് ട്രാവന്‍കൂര്‍ ശാഖയില്‍ 39,000 രൂപ ഫിക്‌സഡ് ഡെപ്പോസിറ്റായി നിക്ഷേപിക്കുന്നത്. 2022 ജൂണില്‍ പിതാവ് മരിച്ച ശേഷം അവകാശിയായ മകന്‍ ബാങ്കില്‍ ചെന്ന് തുക പിന്‍വലിക്കാന്‍ ആവശ്യപ്പെട്ടു. എന്നാല്‍ എസ്ബിടി, എസ്.ബി.ഐയില്‍ ലയിച്ചതോടെ രേഖകള്‍ കാണാതായെന്ന ന്യായം നിരത്തി ബാങ്ക് തുക അനുവദിക്കുന്നത് തടഞ്ഞു. ഇതോടെയാണ് ജോര്‍ജ് ഉപഭോകൃത കമ്മീഷനില്‍ പരാതി നല്‍കിയത്. 

തെളിവായി അസല്‍ ഫിക്‌സഡ് ഡെപ്പോസിറ്റ് റെസിപ്റ്റ്, ആധാര്‍ കാര്‍ഡ്, ജനന സര്‍ട്ടിഫിക്കറ്റ്, പിതാവിന്റെ മരണ സര്‍ട്ടിഫിക്കറ്റ്, ബാങ്കുമായി നടത്തിയ കത്തിടപാടുകള്‍ എന്നിവയും ജോര്‍ജ് ഹാജരാക്കി. കേസ് പരിഗണിച്ച കമ്മീഷന്‍ ബാങ്കിന്റെ ഭാഗത്ത് പിഴവ് സംഭവിച്ചതായി കണ്ടെത്തുകയും, പരാതിക്കാരന് ഡെപ്പോസിറ്റ് തുകയായ 39,000 രൂപയും, ആര്‍.ബി.ഐ/ എസ്.ബി.ഐ സര്‍ക്കുലറുകള്‍ പ്രകാരമുള്ള പലിശയും, നഷ്ടപരിഹാര തുകയായി 50000 രൂപയും നല്‍കാന്‍ ഉത്തരവിട്ടു. മാത്രമല്ല കോടതി ചെലവുകള്‍ക്കായി 5000 രൂപ കെട്ടിവെക്കാനും നിര്‍ശിച്ചു. തുക 45 ദിവസത്തിനുള്ളില്‍ ജോര്‍ജിന് കൈമാറാണമെന്ന് ഡിബി ബിനു അധ്യക്ഷനും, വി രാമചന്ദ്രന്‍, ടിഎന്‍ ശ്രീവിദ്യ എന്നിവരടങ്ങിയ ബെഞ്ച് നിര്‍ദേശിച്ചു. 

ALSO READ: തൃശൂരിൽ കാറിന് നേരെ കാട്ടാന ആക്രമണം; ദമ്പതികളും പിഞ്ചുകുഞ്ഞും രക്ഷപ്പെട്ടത് അത്ഭുതകരമായി; കാട്ടാന തകർത്ത കാറിൽ മോഷണം 

കമ്മീഷന്റെ നിരീക്ഷണം

പത്ത് വര്‍ഷത്തിലധികമായി അവകാശപ്പെടാത്ത നിക്ഷേപങ്ങള്‍ ബാങ്കുകള്‍ ആര്‍.ബി.ഐക്ക് കൈമാറുന്ന വ്യവസ്ഥയുണ്ട്. എന്നാലിത് നിക്ഷേപകരുടെ അവകാശത്തെ ഹനിക്കുന്ന നടപടിയല്ല. ബാങ്കുകള്‍ നിക്ഷേപത്തുക നിക്ഷേപകര്‍ക്ക് മടക്കി നല്‍കുകയും, നല്‍കിയ തുക ആര്‍.ബി.ഐയില്‍ നിന്ന് റീഫണ്ട് ചെയ്യുകയുമാണ് വേണ്ടത്. ഇത് വ്യക്തമാക്കുന്ന വിവിധ സര്‍ട്ടിക്കുലറുകള്‍ ആര്‍.ബി.ഐ പുറത്തുവിട്ടിട്ടുണ്ട്. 

മാത്രമല്ല ഫിക്‌സഡ് ഡെപ്പോസിറ്റ് രേഖ വെറും അക്കൗണ്ടിങ് രേഖ മാത്രമല്ല, അത് ഒരു കുടുംബത്തിന്റെ ജീവിതസമ്പാദ്യവും വിശ്വാസവുമാണ്. ബാങ്കിന്റെ ആഭ്യന്തര വ്യവസ്ഥകള്‍ കൊണ്ട് ഉപഭോക്താവിന്റെ അവകാശങ്ങള്‍ നഷ്ടപ്പെടുന്നത് അനുവദിക്കാനാവില്ല.

SBI faces action for not transferring a father’s fixed deposit to his legal heir (son) as required.