തിരുവനന്തപുരം: തദ്ദേശ തെരഞ്ഞെടുപ്പിന്റെ പശ്ചാത്തലത്തില്‍ ഉദ്യോഗസ്ഥരുടെ സ്ഥലംമാറ്റം നിരോധിച്ച് സംസ്ഥാന തെരഞ്ഞെടുപ്പ് കമ്മിഷന്‍ ഉത്തരവിറക്കി. ചീഫ് സെക്രട്ടറി, സര്‍ക്കാര്‍ വകുപ്പ് സ്ഥാപന മേധാവികള്‍  തുടങ്ങിയവര്‍ക്കാണ് കമ്മിഷന്‍ നിർദേശം നല്‍കിയത്. 
സര്‍ക്കാര്‍ വകുപ്പുകള്‍, പൊതുമേഖലാ സ്ഥാപനങ്ങള്‍, തദ്ദേശസ്വയംഭരണസ്ഥാപനങ്ങള്‍, സ്റ്റാറ്റ്യൂട്ടറി ബോര്‍ഡുകള്‍, കോര്‍പറേഷനുകള്‍, സര്‍വകലാശാലകള്‍, വിദ്യാഭ്യാസസ്ഥാപനങ്ങള്‍ എന്നിവിടങ്ങളിലെ സ്ഥലംമാറ്റത്തിനാണ് നിയന്ത്രണം ഏര്‍പ്പെടുത്തിയത്. ഭരണപരമായ അടിയന്തര സാഹചര്യം നേരിടേണ്ടഘട്ടത്തിൽ സ്ഥലംമാറ്റം ആവശ്യമായി വരികയാണെങ്കില്‍ സംസ്ഥാന തെരഞ്ഞെടുപ്പ് കമ്മിഷനെ ബോധ്യപ്പെടുത്തി മുന്‍കൂര്‍ അനുമതി വാങ്ങണമെന്നും വ്യക്തമാക്കി. 

വോട്ടര്‍പട്ടിക പുതുക്കലുമായി ബന്ധപ്പെട്ട ഉദ്യോഗസ്ഥര്‍ക്ക് സ്ഥലംമാറ്റ ഉത്തരവുകള്‍ ബാധകമല്ല. ഒക്ടോബര്‍ മൂന്നിന് വിവിധ സര്‍ക്കാര്‍ വകുപ്പുകളും സ്ഥാപനങ്ങളും പുറത്തിറക്കിയ സ്ഥലംമാറ്റ ഉത്തരവുകള്‍ നടപ്പാക്കാമെന്ന് സംസ്ഥാന തെരഞ്ഞെടുപ്പ് കമ്മിഷന്‍ വ്യക്തമാക്കി.  
അന്നും അതിനും മുമ്പും ഇറക്കിയിട്ടുള്ള ഉത്തരവുകളിലെ സ്ഥലംമാറ്റങ്ങള്‍ അടിയന്തരമായി നടപ്പില്‍വരുത്തണമെന്ന് കമ്മിഷന്‍ അറിയിച്ചു. 
എസ്.ഐ.ആര്‍ നടപ്പാക്കുന്നതിന്റെ ഭാഗമായി ഇതുമായി ബന്ധപ്പെട്ട ഉദ്യോഗസ്ഥരുടെ സ്ഥലംമാറ്റം നിരോധിച്ച് കഴിഞ്ഞമാസം മുഖ്യ തെരഞ്ഞെടുപ്പ് ഓഫിസറും ഉത്തരവിറക്കിയിരുന്നു. 

ALSO READ: 'അത്ര നിഷ്‌കളങ്കമായി കാണാനാകില്ല'; എസ്.ഐ.ആറിനെതിരെ നിയമസഭയില്‍ പ്രമേയം, ഏക കണ്ഠമായി പാസാക്കി

തദ്ദേശ തെരഞ്ഞെടുപ്പിന് മുന്നോടിയായുള്ള വോട്ടര്‍പട്ടിക പുതുക്കല്‍ പുരോഗമിക്കുകയാണ്.  ഈ മാസം 14 വരെ വോട്ടര്‍പട്ടികയില്‍ പേര് ചേര്‍ക്കാന്‍ അവസരമുണ്ട്.  അന്തിമ വോട്ടര്‍പട്ടിക 25ന് പ്രസിദ്ധീകരിക്കും.