കൊച്ചി: തെരുവുനായ കടിച്ചെടുത്ത മൂന്ന് വയസുകാരിയുടെ അറ്റുപോയ ചെവിയുടെ ഭാഗം പ്ലാസ്റ്റിക് സര്‍ജറിയിലൂടെ വെച്ചുപിടിപ്പിച്ചു. വീടിനോട് ചേര്‍ന്ന് കളിക്കുന്നതിനിടെയാണ് എറണാകുളം വടക്കന്‍ പറവൂര്‍ നീണ്ടുരിലെ മൂന്നര വയസുകാരി നിഹാരയുടെ ചെവി തെരുവ് നായ കടിച്ചെടുത്തത്.നിലവില്‍ എറണാകുളം സ്‌പെഷ്യാലിറ്റി ആശുപത്രിയില്‍ ചികിത്സയില്‍ കഴിയുകയാണ് കുട്ടി. 

ശസ്ത്രക്രിയ പൂര്‍ണമായും വിജയിച്ചോ എന്നത് രണ്ട് ദിവസത്തിന് ശേഷം മാത്രമേ പറയാന്‍ സാധിക്കൂവെന്ന് ഡോക്ടര്‍മാര്‍ പറഞ്ഞു. 

ഇന്നലെ വൈകീട്ട് നാല് മണിയോടെയായിരുന്നു സംഭവം. നീണ്ടൂര്‍ രാമന്‍കുളങ്ങര ക്ഷേത്രത്തിനു സമീപം മറ്റ് കുട്ടികളോടൊപ്പം കളിച്ചുകൊണ്ടിരുന്ന കുട്ടിയുടെ ചെവി തെരുവുനായ കടിച്ച് പറിച്ചെടുക്കുകയായിരുന്നു. സമീപത്തുണ്ടായിരുന്നവര്‍ ഓടിയെത്തിയാണ് നായയെ ഓടിച്ചത്. 

ALSO READ: സംസ്ഥാനത്ത് വീണ്ടും അമീബിക് മസ്തിഷ്‌ക ജ്വരം ബാധിച്ച് മരണം, രണ്ട് കുട്ടികള്‍ക്കു കൂടി രോഗം സ്ഥിരീകരിച്ചു

കുഞ്ഞിന്റെ നിലത്തു വീണ ചെവിയുടെ ഭാഗം പ്ലാസ്റ്റിക് കവറിലാക്കി ബന്ധുക്കള്‍ ആശുപത്രിയില്‍ എത്തിക്കുകയും ചെയ്തിരുന്നു. കളമശേരി മെഡിക്കല്‍ കോളജില്‍ എത്തിച്ച കുട്ടിക്ക് അവിടെവച്ച് വാക്‌സിനേഷന്‍ നല്‍കുകയും ശസ്ത്രക്രിയയ്ക്കായി മെഡിക്കല്‍ ട്രസ്റ്റ് ആശുപത്രിയിലേക്ക് മാറ്റുകയുമായിരുന്നു. പറവൂര്‍ ചിറ്റാറ്റുകര നീണ്ടൂര്‍ മേയ്ക്കാട്ട് എം.എസ് മിറാഷിന്റെയും വിനുമോളുടേയും മകളാണ് നിഹാരിക. 

കഴിഞ്ഞ ദിവസം ഗുരുവായൂരിലും സമാനമായ രീതിയില്‍ തെരുവ് നായ ഒരാളുടെ ചെവി കടിച്ചെടുത്തിരുന്നു. പുല്ല് പറിക്കുന്നതിനിടെ വീട്ടമ്മയുടെ ചെവി തെരുവ് നായ കടിച്ചെടുക്കുകയായിരുന്നു. ഗുരുവായൂര്‍ സ്വദേശി വഹീദയ്ക്കാണ് നായയുടെ കടിയേറ്റത്.

English Summary: A 3-year-old girl in Kochi was attacked by a stray dog, which bit off part of her ear. Surgeons reattached it through plastic surgery. Condition stable; full recovery awaited.