കോഴിക്കോട്: താമരശ്ശേരിയിലെ ഒന്‍പതുവയസുകാരിയുടെ മരണത്തില്‍ കോടതിയെ സമീപിക്കാനൊരുങ്ങി കുടുംബം. ജില്ലാ കോടതിയിലാണ് പരാതി നല്‍കുക. കുട്ടിയുടെ മരണകാരണം അമീബിക് മസ്തിഷ്‌കജ്വരം അല്ലെന്ന് ഇന്നലെ പോസ്റ്റ്‌മോര്‍ട്ടം റിപ്പോര്‍ട്ട് പുറത്തുവന്നതിന് പിന്നാലെയാണ് കോടതിയെ സമീപിക്കാന്‍ തീരുമാനിച്ചത്.

ഇന്‍ഫ്‌ലുവന്‍സ എ അണുബാധ മൂലമുള്ള വൈറല്‍ ന്യുമോണിയയെ തുടര്‍ന്നാണ് 9 വയസ്സുകാരി അനയ മരിച്ചതെന്നാണ് പോസ്റ്റ്‌മോര്‍ട്ടം റിപ്പോര്‍ട്ടില്‍ പറയുന്നത്. നേരത്തെ ജില്ലാ മെഡിക്കല്‍ ഓഫിസറുടെ റിപ്പോര്‍ട്ടില്‍ അമീബിക് മസ്തിഷ്‌കജ്വരമെന്ന് രേഖപ്പെടുത്തിയിരുന്നു.

കുട്ടിയുടെ നട്ടെല്ലില്‍ നിന്ന് ശേഖരിച്ച സ്രവത്തില്‍ അമീബയുടെ സാന്നിധ്യം കണ്ടെത്തിയെന്നാണ് ആരോഗ്യവകുപ്പ് ഡയറക്ടര്‍ക്ക് സമര്‍പ്പിച്ച റിപ്പോര്‍ട്ടില്‍ പറഞ്ഞിരുന്നത്. എന്നാല്‍ കുടുംബം ഇത് നിഷേധിച്ചിരുന്നു. താമരശ്ശേരി താലൂക്ക് ആശുപത്രിയില്‍ മതിയായ ചികിത്സ നല്‍കിയില്ലെന്ന ആരോപണത്തെ തുടര്‍ന്നാണ് മകള്‍ മരിച്ചത് എന്നായിരുന്നു അച്ഛന്‍ സനൂപിന്റെ ആരോപണം. 

ALSO READ: താമരശ്ശേരി ഡോക്ടർക്ക് വെട്ടേറ്റ സംഭവം: 9 വയസ്സുകാരിയുടെ മരണകാരണം അമീബിക് മസ്തിഷ്ക ജ്വരമല്ല; വൈറൽ ന്യുമോണിയെന്ന് പോസ്റ്റ്മോർട്ടം റിപ്പോർട്ട്

അതേസമയം, താമരശ്ശേരി താലൂക്ക് ആശുപത്രിയിലേ ഡോക്ടറെ വെട്ടിപ്പരിക്കേല്‍പ്പിച്ചതില്‍ കുട്ടിയുടെ പിതാവ് സനൂപിന്റെ കസ്റ്റഡി കാലാവധി ഇന്ന് അവസാനിക്കും. സനൂപിനെ അല്‍പസമയത്തിനകം താമരശ്ശേരി താലൂക്ക് ആശുപത്രിയിലെത്തിച്ചെ തെളിവെടുപ്പ് നടത്തും. ശേഷം വീണ്ടും കോടതിയില്‍ ഹാജരാക്കും.

കുട്ടിയുടെ മരണത്തിന് പിന്നാലെയാണ് പിതാവ് സനൂപ് ഡോക്ടറെ വെട്ടിയത്. കുട്ടിക്ക് അമീബിക് മസ്തിഷ്‌കജ്വരമല്ലെന്നും ഡോക്ടര്‍മാരുടെ അനാസ്ഥയാണ് രോഗം മൂര്‍ച്ഛിക്കാന്‍ കാരണമെന്നും ആരോപിച്ചായിരുന്നു ആക്രമണം. ഈ കേസില്‍ സനൂപ് ജയിലില്‍ കഴിയുന്നതിനിടെയാണ് പോസ്റ്റ്മോര്‍ട്ടം റിപ്പോര്‍ട്ട് പുറത്തുവരുന്നത്. സനൂപിനെതിരെ വധശ്രമം, അതിക്രമിച്ചുകയറി ആക്രമിക്കല്‍, ആശുപത്രി സംരക്ഷണ നിയമത്തിന്റെ 3, 4 വകുപ്പുകള്‍ എന്നിവ ചുമത്തിയാണ് കേസെടുത്തിരിക്കുന്നത്.

ആക്രമണത്തില്‍ ഡോക്ടര്‍ക്ക് തലയ്ക്ക് ഗുരുതരമായ പരുക്കേറ്റിരുന്നു. ഈ കേസില്‍  സനൂപ് ജയിലിലാണ്.  ചികിത്സയിലുള്ള ഡോക്ടര്‍ വിപിന്‍ ആശുപത്രി വിട്ടിരുന്നു. ഈ മാസം 11-നാണ് തലയ്ക്ക് വെട്ടേറ്റ ഡോക്ടര്‍ വിപിന്‍ വിപിനെ കോഴിക്കോട് സ്വകാര്യ ആശുപത്രിയില്‍ നിന്ന് ഡിസ്ചാര്‍ജ് ചെയ്തത്. തലയ്ക്ക് 8 സെന്റിമീറ്റര്‍ ആഴത്തിലുള്ള മുറിവിന് സര്‍ജറി നടത്തിയിരുന്നു. 

after the death of a 9-year-old girl in thamarassery, initial reports ruling out amoebic meningoencephalitis have led the family to consider legal action. they question the accuracy of the diagnosis and seek justice.