ധാക്ക: ബംഗ്ലാദേശിലെ ധാക്ക അന്താരാഷ്ട്ര വിമാനത്താവളത്തില്‍ വന്‍ തീപിടുത്തം. കാര്‍ഗോ വിഭാഗത്തിലാണ് തീപിടുത്തമുണ്ടായതെന്ന് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. അപകടത്തെ തുടര്‍ന്ന് വിമാന സര്‍വീസുകള്‍ താല്‍ക്കാലികമായി നിര്‍ത്തിവെച്ചു. 

ധാക്കയിലെ ഹസ്രത്ത് ഷാജലാല്‍ ഇന്റര്‍നാഷണല്‍ എയര്‍പോര്‍ട്ടിലാണ് തീപിടുത്തമുണ്ടായത്. ഉച്ചയ്ക്ക് രണ്ടരയോടെ ഗേറ്റ് നമ്പര്‍ 8ല്‍ നിന്നുമാണ് ആദ്യം പുക ഉയര്‍ന്നത്. പീന്നീട് അത് പടരുകയായിരുന്നു. ഫയര്‍ഫോഴ്‌സ് സംഘം സ്ഥലത്തെത്തി തീ അണയ്ക്കാനുള്ള ശ്രമങ്ങള്‍ ആരംഭിച്ചു. 28 ഫയര്‍ യൂണിറ്റുകളാണ് ഇതിനായി സ്ഥലത്തെത്തിയത്. 

ഫയര്‍ ഫോഴ്‌സിന് പുറമെ വിവിധ സൈനിക വിഭാഗങ്ങളുടെ കൂടി നേതൃത്വത്തിലാണ് രക്ഷാപ്രവര്‍ത്തനം നടക്കുന്നത്. പ്രദേശത്ത് നിന്ന് ആളുകളെ ഒഴിപ്പിച്ചു. അപകടത്തിന് പിന്നാലെ പ്രദേശമാകെ കറുത്ത പുകച്ചുരുള്‍ വ്യാപിച്ചിട്ടുണ്ട്. 

ALSO READ: ഡ്രൈവര്‍, വര്‍ക്കര്‍ മുതല്‍ ടീച്ചര്‍ വരെ; ഗള്‍ഫിലെ ജോലിയൊഴിവുകളറിയാം; Latest Gulf Jobs October 16 

ഇറക്കുമതി ചെയ്ത സാധനങ്ങള്‍ സൂക്ഷിക്കുന്ന കാര്‍ഗോ വില്ലേജില്‍ സൂക്ഷിച്ചിരുന്ന വസ്തുക്കള്‍ കത്തി നശിച്ചതായി റിപ്പോര്‍ട്ടുണ്ട്. വിമാനത്താവളത്തിന്റെ എക്‌സിക്യൂട്ടീവ് ഡയറക്ടര്‍ എംഡി മസൂദുല്‍ ഹസന്‍ മസൂദ് സ്ഥിതിഗതികള്‍ നിരീക്ഷിച്ചു. അടിയന്തര നടപടികള്‍ പുരോഗമിക്കുകയാണെന്നും അദ്ദേഹം മാധ്യമങ്ങളോട് പറഞ്ഞു.

A major fire broke out in the cargo section of Dhaka International Airport in Bangladesh, leading to the temporary suspension of flight services.