മാഡ്രിഡ്: വാശിയേറിയ എല്‍ക്ലാസിക്കോ പോരാട്ടത്തില്‍ റയല്‍ മാഡ്രിഡിന് തകര്‍പ്പന്‍ ജയം. സ്വന്തം തട്ടകത്തില്‍ ബാഴ്‌സലോണയെ ഒന്നിനെതിരെ രണ്ട് ഗോളുകള്‍ക്ക് തകര്‍ത്താണ് റയല്‍ കുതിപ്പ് തുടരുന്നത്. കിലിയന്‍ എംബാപ്പേ, ജൂഡ് ബെല്ലിങ്ഹാം എന്നിവര്‍ റയലിനായി വല കുലുക്കി. ഫെര്‍മിന്‍ ലോപ്പസിലൂടെയാണ് ബാഴ്‌സയുടെ ആശ്വാസ ഗോള്‍. 

തുടക്കം മുതല്‍ കരുത്തുറ്റ പ്രകനടമാണ് ഇരുടീമുകളും നടത്തിയത്. കഴിഞ്ഞ സീസണിലെ എല്‍ക്ലാസിക്കോ വിജയത്തിന്റെ ആത്മവിശ്വാസത്തിലാണ് ബാഴ്‌സ സാന്റിയാഗോ ബെര്‍ണബ്യൂവില്‍ ബൂട്ട് തട്ടിയത്. എന്നാല്‍ തുടക്കം മുതല്‍ എംബാപ്പെയും, വിനീഷ്യസ് ജൂനിയറും ആക്രമണോത്സുക ഫുട്‌ബോളിലൂടെ ബാഴ്‌സയെ പരീക്ഷിച്ചു. അഞ്ചാം മിനുട്ടില്‍ വിനീഷ്യസിനെ ബോക്‌സില്‍ വീഴ്ത്തിയതിന് റയലിന് അനുകൂല്യമായ പെനാല്‍റ്റി വിളിച്ചെങ്കിലും വാര്‍ പരിശോധനയില്‍ ഫൗള്‍ അല്ലെന്ന് കണ്ടെത്തിയതിനെ തുടര്‍ന്ന് ഉപേക്ഷിച്ചു. തുടര്‍ന്ന് പതിനാലാം മിനുട്ടില്‍ തന്നെ കിലിയന്‍ എംബാപ്പെ ബാഴ്‌സയുടെ ഗോള്‍ വല കുലുക്കിയെങ്കിലും അതും വാര്‍ പരിശോധനയില്‍ ഓഫ് സൈഡ് ആയതോടെ ഗോള്‍ ആയില്ല. 

ALSO READ: 'ഒരു റയൽ മാഡ്രിഡ് കളിക്കാരനായിരുന്നെങ്കിൽ 2023-ലെ ബാലൺ ഡി'ഓർ പുരസ്‌കാരം ലയണൽ മെസ്സിക്ക് പകരം അവന് ലഭിക്കുമായിരുന്നു'; ലിവർപൂൾ ഇതിഹാസം ജാമി കാരാഗർ 

എന്നാല്‍ 22ാം മിനുട്ടില്‍ ജൂഡ് ബെല്ലിങ്ഹാമിന്റെ മികച്ചൊരു പാസിലൂടെ എംബാപ്പെ റയലിനായി ആദ്യ ഗോള്‍ നേടി. മറുപടിയായി 38ാം മിനുട്ടില്‍ ഫെര്‍മിന്‍ ബാഴ്‌സക്കായി ഗോള്‍ നേടി. ഇതോടെ മത്സരം സമനിലയിലായി. 

തുടര്‍ന്നും മികച്ച മുന്നേറ്റങ്ങള്‍ ഇരുടീമുകളും നടത്തിയെങ്കിലും 43ാം മിനുട്ടില്‍ ജൂഡ് ബെല്ലിങ്ഹാമിലൂടെ റയല്‍ രണ്ടാം ഗോള്‍ നേടിയതോടെ റയല്‍ വീണ്ടും മുന്നിലെത്തി. രണ്ടാം പകുതിയില്‍ ബാഴ്‌സ നിരന്തരം റയല്‍ ബോക്‌സില്‍ ആക്രമണം നടത്തിയെങ്കിലും റയലിന്റെ പ്രതിരോധ നിര ശക്തമായി നിലയുതിര്‍ത്തു. മത്സരം അവസാനിച്ചതോടെ ഒന്നിനെതിരെ രണ്ട് ഗോളുകള്‍ക്ക് സീസണിലെ ആദ്യ എല്‍ക്ലാസിക്കോ വിജയവും റയലിന്റെ പോക്കറ്റിലായി.