അബൂദബി: യുഎഇയിലെ ഇന്ത്യൻ പ്രവാസികൾക്കായി പുതിയ ചിപ്പ് ഉൾച്ചേർത്ത ഇ-പാസ്‌പോർട്ടുകൾക്ക് അപേക്ഷിക്കാനുള്ള പുതിയ ഓൺലൈൻ പോർട്ടൽ പ്രഖ്യാപിച്ച് ഇന്ത്യൻ എംബസിയും ദുബൈ കോൺസുലേറ്റും. ഒക്ടോബർ 28 ചൊവ്വാഴ്ച മുതൽ പ്രാബല്യത്തിൽ വരുന്ന ഈ പുതിയ പോർട്ടൽ വഴിയായിരിക്കും ഇനിമുതൽ പാസ്‌പോർട്ടുകളുമായി ബന്ധപ്പെട്ട എല്ലാ സേവനങ്ങൾക്കുമുള്ള അപേക്ഷകൾ സ്വീകരിക്കുക.

അബൂദബിയിലെ ഇന്ത്യൻ എംബസിയാണ് പുതിയ ഓൺലൈൻ പോർട്ടൽ വഴി ഇ-പാസ്‌പോർട്ടുകൾക്ക് അപേക്ഷിക്കാനുള്ള സൗകര്യം പ്രഖ്യാപിച്ചത്. ദുബൈയിലെയും വടക്കൻ എമിറേറ്റുകളിലെയും അപേക്ഷകർക്കായി ദുബൈയിലെ ഇന്ത്യൻ കോൺസുലേറ്റും ഇതേ അറിയിപ്പ് പുറപ്പെടുവിച്ചിട്ടുണ്ട്.

ALSO READ: ദുബൈ റൈഡ് 2025: പങ്കെടുക്കുന്നവർക്ക് ആർടിഎയുടെ കിടിലൻ ഓഫർ; അഞ്ച് മണിക്കൂർ കരീം ബൈക്കുകൾ സൗജന്യമായി ഓടിക്കാം 

അപ്‌ഗ്രേഡ് ചെയ്ത പാസ്‌പോർട്ട് സേവാ പ്രോഗ്രാമിന്റെ (GPSP 2.0) ഭാഗമായാണ് ഈ മാറ്റങ്ങൾ. ഇതിലൂടെ ഡിജിറ്റൈസ് ചെയ്ത വിവരങ്ങൾ അടങ്ങിയ എംബഡഡ് ചിപ്പ് ഉൾപ്പെടുന്ന ഇ-പാസ്‌പോർട്ടുകൾ ലഭ്യമാകും. ലോകമെമ്പാടുമുള്ള എമിഗ്രേഷൻ ക്ലിയറൻസുകൾ കൂടുതൽ സുഗമമാക്കാൻ ഇത് സഹായിക്കും.

പുതിയ വെബ്സൈറ്റ് URL: https://mportal.passportindia.gov.in/gpsp/AuthNavigation/Login

പുതിയ പോർട്ടൽ വഴി അപേക്ഷ സമർപ്പിക്കാനുള്ള നടപടികൾ ലളിതമാണ്. രജിസ്ട്രേഷൻ പോർട്ടലിൽ 'രജിസ്റ്റർ' ലിങ്കിൽ ക്ലിക്കുചെയ്ത് ഉപയോക്താക്കൾ രജിസ്റ്റർ ചെയ്യണം. അപേക്ഷ സമർപ്പിക്കാൻ ലോഗിൻ ചെയ്ത ശേഷം, അപേക്ഷകർക്ക് ഹോം പേജിൽ നിന്ന് പുതിയ അപേക്ഷകൾ സൃഷ്ടിക്കുകയും അത് ഓൺലൈനായി സമർപ്പിക്കുകയും ഫോം പ്രിന്റ് എടുക്കുകയും ചെയ്യാം.

ഓൺലൈൻ അപേക്ഷ സമർപ്പിച്ച ശേഷം, ഇന്ത്യൻ പാസ്‌പോർട്ട്, വിസ അപേക്ഷകൾക്കായുള്ള ഔട്ട്‌സോഴ്‌സ് സേവന ദാതാവായ BLS ഇന്റർനാഷണലിന്റെ ഏതെങ്കിലും കേന്ദ്രങ്ങൾ സന്ദർശിക്കാൻ അപ്പോയിന്റ്മെന്റ് ബുക്ക് ചെയ്യണം.

അപ്പോയിന്റ്മെന്റ് ലിങ്ക്: https://indiavisa.blsinternational.com/uae/appointment/bls_appmnt/login

അപ്പോയിന്റ്മെന്റ് ലഭിച്ചാൽ, ആവശ്യമായ രേഖകളുമായി BLS ഇന്റർനാഷണൽ സെന്ററിൽ എത്തുക.

ALSO READ: യുഎഇയിലെ ഈദുല്‍ ഇത്തിഹാദ് അവധി; എങ്ങനെ 9 ദിവസത്തെ മെഗാ ബ്രേക്ക് നേടാം? ഒരു 'സാന്‍ഡ്വിച്ച് ലീവ്' തന്ത്രം 

കാത്തിരിപ്പ് സമയം കുറയും, തിരുത്തലുകൾ നടത്താൻ എളുപ്പം

BLS കേന്ദ്രങ്ങളിലെ കാത്തിരിപ്പ് സമയം കുറയ്ക്കുന്നതിനായി, അപേക്ഷകർക്ക് ICAO (ഇന്റർനാഷണൽ സിവിൽ ഏവിയേഷൻ ഓർഗനൈസേഷൻ) മാനദണ്ഡങ്ങൾ അനുസരിച്ചുള്ള ഫോട്ടോ, ഒപ്പ്, മറ്റ് രേഖകൾ എന്നിവ PSP പോർട്ടലിൽ നേരിട്ട് അപ്‌ലോഡ് ചെയ്യാൻ അവസരമുണ്ട്.

കൂടാതെ, അപേക്ഷകർ നേരിടുന്ന ഒരു പൊതുപ്രശ്നത്തിനും പുതിയ സംവിധാനം പരിഹാരം കാണുന്നുണ്ട്. പാസ്‌പോർട്ട് അപേക്ഷകളിൽ ചെറിയ തിരുത്തലുകൾ വരുത്തേണ്ടി വന്നാൽ, BLS കേന്ദ്രങ്ങളിൽ വെച്ച് അധിക ചാർജുകളില്ലാതെ തന്നെ സേവന ദാതാവിന് അപേക്ഷകൾ തിരുത്തി നൽകാൻ കഴിയും. ഇതിനായി അപേക്ഷ മുഴുവനായും വീണ്ടും ടൈപ്പ് ചെയ്യേണ്ട ആവശ്യം ഇനിയില്ല.

ICAO മാനദണ്ഡങ്ങൾ പാലിക്കുന്ന ഫോട്ടോഗ്രാഫുകൾ സമർപ്പിക്കേണ്ടത് അത്യാവശ്യമാണ്. ഇതിനായുള്ള മാർഗ്ഗനിർദ്ദേശങ്ങൾ ഇന്ത്യൻ എംബസിയുടെ വെബ്സൈറ്റിൽ ലഭ്യമാണ്. അടുത്തിടെ BLS ഇന്റർനാഷണൽ കടും നിറത്തിലുള്ള വസ്ത്രം ധരിച്ച് ഫോട്ടോ എടുക്കണമെന്ന് നിർദ്ദേശിച്ചിരുന്നു.

യുഎഇയിലെ ഇന്ത്യൻ പ്രവാസികളുടെ പാസ്‌പോർട്ട് സേവനങ്ങൾ കൂടുതൽ കാര്യക്ഷമവും വേഗത്തിലുമാക്കാൻ പുതിയ സംവിധാനം സഹായിക്കുമെന്നാണ് ഇന്ത്യൻ കോൺസുലേറ്റ് അധികൃതർ പ്രതീക്ഷിക്കുന്നത്.

uae indian missions announce new online portal for chip-embedded e-passports. apply now for faster processing and reduced waiting time at bls centers.