തിരുവനന്തപുരം: സംസ്ഥാനത്ത് ഗർഭാശയഗള കാൻസർ (സെർവിക്കൽ കാൻസർ) പ്രതിരോധിക്കുന്നതിന്റെ ഭാഗമായി പ്ലസ് വൺ, പ്ലസ് ടു വിദ്യാർഥിനികൾക്ക് ഹ്യൂമൺ പാപ്പിലോമ വൈറസ് (എച്ച്പിവി) വാക്‌സിനേഷൻ നൽകാനൊരുങ്ങി കേരളം. കണ്ണൂർ ജില്ലയിലാണ് പൈലറ്റ് അടിസ്ഥാനത്തിലുള്ള പദ്ധതിക്ക് തുടക്കം കുറിക്കുന്നത്.

നവംബർ 3-ന് രാവിലെ 10.30-ന് കണ്ണൂർ കൂത്തുപറമ്പ് താലൂക്ക് ആശുപത്രിയിൽ വെച്ച് മുഖ്യമന്ത്രി പിണറായി വിജയൻ പദ്ധതിയുടെ ഉദ്ഘാടനം നിർവഹിക്കുമെന്ന് ആരോഗ്യ വകുപ്പ് മന്ത്രി വീണാ ജോർജ് അറിയിച്ചു. വരും തലമുറയെ ഗർഭാശയഗള കാൻസറിൽ നിന്ന് സംരക്ഷിക്കുക എന്ന ലക്ഷ്യത്തോടെയാണ് ഈ സുപ്രധാന കാൽവെപ്പ്.

ഇന്ത്യയിൽ സ്ത്രീകളിൽ കണ്ടുവരുന്ന രണ്ടാമത്തെ പ്രധാനപ്പെട്ട അർബുദമാണ് ഗർഭാശയഗള അർബുദം. അർബുദ അനുബന്ധ മരണ നിരക്കുകൾ ഉയർത്തുന്നതിൽ ഈ രോഗം ഒരു പ്രധാന കാരണമാണ്. ഈ സാഹചര്യത്തിലാണ് എച്ച്.പി.വി വാക്‌സിൻ എല്ലാ പെൺകുട്ടികളും സ്വീകരിക്കുന്നത് രോഗപ്രതിരോധത്തിന് ഉചിതമാണെന്ന് ആരോഗ്യ വിദഗ്ധർ ചൂണ്ടിക്കാട്ടുന്നത്.

കേരളത്തിലെ പ്ലസ് വൺ, പ്ലസ് ടു വിദ്യാർഥികളിൽ എച്ച്.പി.വി. വാക്‌സിൻ നല്കാൻ കേരള കാൻസർ കെയർ ബോർഡ് ശുപാർശ ചെയ്തിരുന്നു. തുടർന്ന്, മുഖ്യമന്ത്രിയുടെ നിർദേശപ്രകാരം ആരോഗ്യ വകുപ്പ് മന്ത്രിയുടെ നേതൃത്വത്തിൽ ആരോഗ്യ വിദഗ്ധരുടേയും ടെക്‌നിക്കൽ കമ്മിറ്റിയുടേയും യോഗം ചേർന്ന് പദ്ധതിക്ക് അന്തിമ രൂപം നൽകിയത്. വാക്‌സിനേഷൻ സംബന്ധിച്ച കാര്യങ്ങളിൽ കൂടുതൽ വ്യക്തത വരുത്തുന്നതിനായി സർക്കാർ നിയോഗിച്ച വിദഗ്ധ സമിതിയുടെ നിർദേശ പ്രകാരമാണ് ഹയർ സെക്കണ്ടറി വിദ്യാർഥികൾക്ക് വാക്‌സിനേഷൻ നൽകാനും പൈലറ്റ് പദ്ധതി ആരംഭിക്കാനും തീരുമാനമായത്.

എച്ച്.പി.വി. വാക്‌സിനേഷന്റെ ഗുണങ്ങളെക്കുറിച്ച് പൊതുജനങ്ങളെ ബോധവത്കരിച്ച് സ്വമേധയാ വാക്‌സിനേഷൻ സ്വീകരിക്കുന്നതിനായി പ്രോത്സാഹിപ്പിക്കുക എന്നതാണ് ആരോഗ്യ വകുപ്പിന്റെ നേതൃത്വത്തിൽ നടപ്പിലാക്കുന്ന ഈ പൈലറ്റ് പദ്ധതിയുടെ പ്രധാന ഉദ്ദേശ്യം. ലയൺസ് ക്ലബ്, റോട്ടറി ക്ലബ്ബ്, മറ്റ് സന്നദ്ധ സംഘടനകൾ തുടങ്ങിയവയുടെ സഹകരണത്തോടെയാണ് ഈ പദ്ധതി നടപ്പിലാക്കാൻ ആരോ​ഗ്യ വകുപ്പ് ലക്ഷ്യമിടുന്നത്.

kerala launches hpv vaccination for plus one and plus two girl students in a pilot phase starting in kannur to prevent cervical cancer. the initiative, led by chief minister pinarayi vijayan, aims to protect the future generation from the second most common cancer among women in india.