തിരുവനന്തപുരം: കേരള സര്‍വകലാശാലയില്‍ വീണ്ടും എസ്എഫ് ഐ പ്രതിഷേധം. വിസി മോഹനന്‍ കുന്നുമ്മലിന്റെ വാഹനം എസ്എഫ്‌ഐ പ്രവര്‍ത്തകര്‍ തടഞ്ഞു. ജാതി അധിക്ഷേപം നടത്തിയ സംസ്‌കൃതം വിഭാഗം ഡീന്‍ സി എന്‍ വിജയകുമാരിയെ സംരക്ഷിക്കുന്നു എന്നാരോപിച്ചാണ് എസ്എഫ്‌ഐ പ്രതിഷേധം. എസ്എഫ്‌ഐ സംസ്ഥാന പ്രസിഡന്റ് എം ശിവപ്രസാദിന്റെ നേതൃത്വത്തിലാണ് പ്രവര്‍ത്തകര്‍ വിസിയുടെ വാഹനം തടഞ്ഞത്. തുടര്‍ന്ന് പ്രവര്‍ത്തകരും പൊലീസും തമ്മില്‍ സംഘര്‍ഷമുണ്ടായി. മോഹനന്‍ കുന്നുമ്മലിന് നേരെ വിദ്യാര്‍ത്ഥികള്‍ കൂവിവിളിച്ചും പ്രതിഷേധിച്ചു.

സര്‍വകലാശാല ഭരണത്തെ മോഹനന്‍ കുന്നുമ്മല്‍ താറുമാറാക്കുകയാണെന്ന് എം ശിവപ്രസാദ് തുറന്നടിച്ചു. തനിക്ക് എന്താണ് യോഗ്യതയെന്ന് വി സി സ്വയം ചോദിക്കണം. സംഘപരിവാറിന്റെ കാല് തിരുമ്മുന്നത് മാത്രമാണ് വി സിയുടെ യോഗ്യത. സേവ് യൂണിവേഴ്‌സിറ്റി ഫോറത്തിന്റെ ഒത്താശയോടെയാണ് എല്ലാം നടക്കുന്നതെന്നും ശിവപ്രസാദ് പറഞ്ഞു.

അതേസമയം, രാവിലെ കേരള സര്‍വകലാശാല സെനറ്റ് യോഗത്തില്‍ ഇടത് സിന്‍ഡിക്കേറ്റ് അംഗങ്ങള്‍  പ്രതിഷേധം നടത്തിയിരുന്നു. ജാതി അധിക്ഷേപം നടത്തിയ ഡീന്‍ സി എന്‍ വിജയകുമാരിയെ പുറത്താക്കുക എന്ന് ആവശ്യമുന്നയിച്ചാണ് പ്രതിഷേധം സംഘടിപ്പിച്ചത്. സി എന്‍ വിജയകുമാരിയും സെനറ്റ് യോഗത്തിനെത്തിയിരുന്നു. തൊട്ടുപിന്നാലെ ബിജെപി സിന്‍ഡിക്കേറ്റ് അംഗം ദളിത് വിരുദ്ധ പരാമര്‍ശം നടത്തിയതും പ്രതിഷേധത്തിന് കാരണമായി.