കണ്ണൂര്‍: ജില്ലയിലെ നഗരസഭകളിലെ ഭരണം പിടിക്കാന്‍ അരയും തലയും മുറുക്കി മുന്നണികള്‍ രംഗത്ത്. ഏതാണ്ട് എല്ലാ നഗരസഭകളിലും യു.ഡി.എഫും എല്‍.ഡി.എഫും സീറ്റ് വിഭജനം അന്തിമഘട്ടത്തിലാക്കി സ്ഥാനാര്‍ഥി നിര്‍ണയത്തിലേക്ക് കടന്നിരിക്കുകയാണ്. എട്ട് നഗരസഭകളില്‍ മട്ടന്നൂര്‍ നഗരസഭയില്‍ ഇക്കുറി തെരഞ്ഞെടുപ്പില്ല. പയ്യന്നൂര്‍, ആന്തൂര്‍, കൂത്തുപറമ്പ് നഗരസഭകള്‍ ഇടതിന് മേല്‍ക്കെയുള്ള നഗരസഭകളാണ്. കേവല ഭൂരിപക്ഷമില്ലാതെ ഇരിട്ടി നഗരസഭയും എല്‍.ഡി.എഫ് ഭരിക്കുന്നു. ചുരുക്കത്തില്‍ ഇക്കുറി തെരഞ്ഞെടുപ്പില്ലാത്ത മട്ടന്നൂരടക്കം അഞ്ച് നഗരസഭകള്‍ ഇടതുമുന്നണി ഭരിക്കുമ്പോള്‍ തളിപ്പറമ്പ്, ശ്രീകണ്ഠപുരം, പാനൂര്‍ നഗരസഭകളാണ് യു.ഡി.എഫിന്റെ കൈവശമുള്ളത്. നിലവിലുള്ളത് നിലനിര്‍ത്താനും കഴിഞ്ഞ തവണ കൈപ്പിഴ കൊണ്ടും നോട്ടക്കുറവും മൂലം നഷ്ടപ്പെട്ട നഗരസഭകളില്‍ ഭരണം പിടിച്ചെടുക്കുകയാണ് ഇരുമുന്നണികളുടെയും ലക്ഷ്യം.

ജില്ലാ പഞ്ചായത്തിലേക്ക്  സി.പി.എമ്മിന്റെ പുതുമുഖപ്പട്ടിക, ബിനോയ് കുര്യന്‍ ഒഴികെ എല്ലാവരും പുതുമുഖങ്ങള്‍

ജില്ലാ പഞ്ചായത്ത് ഡിവിഷനുകളിലേക്ക് സ്ഥാനാര്‍ഥികളെ പ്രഖ്യാപിച്ച് സി.പി.എം. 25 ഡിവിഷനുകളില്‍ 16 ഇടത്താണ് സി.പി.എം മത്സരിക്കുന്നത്. നിലവിലെ ജില്ലാ പഞ്ചായത്ത് വൈസ് പ്രസിഡന്റ് ബിനോയ് കുര്യന്‍ ഒഴികെ മുഴുവന്‍ സ്ഥാനാര്‍ഥികളും പുതുമുഖങ്ങളാണ്. 

യുവത്വത്തിനു മുന്‍ഗണന നല്‍കിയ പട്ടികയാണ് സി.പി.എം ജില്ലാ സെക്രട്ടറി കെ.കെ രാഗേഷ് പുറത്തുവിട്ടത്. കഴിഞ്ഞ തവണ മത്സരിച്ച തില്ലങ്കേരി ഡിവിഷന്‍ വനിതാ സംവരണമായതോടെ പെരളശേരി ഡിവിഷനിലാണ് ബിനോയ് മത്സരിക്കുന്നത്. 
എസ്.എഫ്.ഐ മുന്‍ സംസ്ഥാന പ്രസിഡന്റ് കെ. അനുശ്രീ, ഏരിയാ സെക്രട്ടറി നവ്യ സുരേഷ് എന്നിവരും ജനവിധി തേടുന്നുണ്ട്. 
സ്ഥാനാര്‍ഥികളും ഡിവിഷനുകളും: എ.വി ലേജു(കരിവെള്ളൂര്‍), രജനി മോഹന്‍(മാതംമംഗലം), നവ്യ സുരേഷ്(പേരാവൂര്‍), ടി. ഷബ്ന(പാട്യം), പി. പ്രസന്ന(പന്ന്യന്നൂര്‍), എ.കെ ശോഭ(കതിരൂര്‍), കെ. അനുശ്രീ(പിണറായി), ബിനോയ് കുര്യന്‍(പെരളശേരി), ഒ.സി ബിന്ദു(അഞ്ചരക്കണ്ടി), പി.പി റെജി(കൂടാളി), കെ. മോഹനന്‍(മയ്യില്‍), കെ.വി ഷക്കീല്‍(അഴീക്കോട്), വി.വി പവിത്രന്‍(കല്യാശേരി), എം.വി ഷിമ(ചെറുകുന്ന്), പി. രവീന്ദ്രന്‍(പരിയാരം), പി.വി ജയശ്രീ(കുഞ്ഞിമംഗലം).

വെല്‍ഫെയര്‍ പാര്‍ട്ടി 15 ഡിവിഷനുകളില്‍ 

കണ്ണൂര്‍ കോര്‍പറേഷനില്‍ 15 സീറ്റില്‍ മത്സരിക്കാന്‍ വെല്‍ഫെയര്‍ പാര്‍ട്ടി കണ്ണൂര്‍ കോര്‍പറേഷന്‍ കമ്മിറ്റി യോഗം തീരുമാനിച്ചു. താണ, കസാനക്കോട്ട, തായത്തെരു, അറക്കല്‍, ആയിക്കര, വെത്തിലപ്പള്ളി, കുറുവ, താളിക്കാവ്, ചാലാട്, പഞ്ഞിക്കയില്‍, എളയാവൂര്‍ നോര്‍ത്ത്, വാരം, കക്കാട്, മേലെചൊവ്വ, ഏഴര എന്നീ ഡിവിഷനുകളിലാണ് മത്സരിക്കുക. യോഗം ജില്ലാ പ്രസിഡന്റ് സാദിഖ് ഉളിയില്‍ ഉദ്ഘാടനം ചെയ്തു. പ്രസിഡന്റ് സി.പി മുസ്ത്വഫ അധ്യക്ഷനായി. 

English Summary: Political fronts in Kannur are tightening their strategies ahead of the upcoming local body elections, aiming to capture control of key municipalities. The UDF and LDF have nearly finalized their seat-sharing arrangements across almost all municipalities, except Mattannur, where elections will not be held this time.