ദുബായ് : റാപ്പര്‍ വേടനെ വൈറല്‍ പനി ബാധിച്ചതിനെത്തുടര്‍ന്ന് ദുബായിലെ ആശുപത്രിയില്‍ പ്രവേശിപ്പിച്ചു. വേടന്‍ ഐസിയുവില്‍ തീവ്ര പരിചരണത്തിലാണ്. ആരോഗ്യ പ്രശ്‌നങ്ങള്‍ കാരണം ഖത്തറില്‍ നടത്താനിരുന്ന അദ്ദേഹത്തിന്റെ സംഗീത പരിപാടി മാറ്റിവെച്ചിരിക്കുന്നെന്ന് സംഘാടകര്‍ അറിയിച്ചു. ഡിസംബര്‍ 12ലേക്ക് പരിപാടി മാറ്റിവെച്ചതായാണ് സംഘാടകര്‍ സമൂഹമാധ്യമത്തിലൂടെ അറിയിച്ചത്. കഴിഞ്ഞ ഞായറാഴ്ച ദുബൈയിലെ ഖുസൈസില്‍ നടത്തിയ ഷോയ്ക്കിടെ അസുഖം വര്‍ദ്ധിച്ചതിനെത്തുടര്‍ന്ന് അദ്ദേഹത്തെ തീവ്രപരിചരണ വിഭാഗത്തിലേക്ക് മാറ്റുകയായിരുന്നു. പരിപാടി അവതരിപ്പിക്കാന്‍ സാധിക്കില്ലെന്ന് ആദ്യം സംഘാടകര്‍ അറിയിച്ചെങ്കിലും പിന്നീട് അവസാന നിമിഷം അദ്ദേഹം വേദിയില്‍ കയറി പരിപാടി പൂര്‍ത്തിയാക്കുകയായിരുന്നു. ഇതിന് ശേഷം ആരോഗ്യനില മോശമാകുകയായിരുന്നു. 

  'അപ്രതീക്ഷിതമായ ആരോഗ്യപ്രശ്‌നം കാരണം ഖത്തര്‍ ഷോ 2025 ഡിസംബര്‍ 12-ലേക്ക് മാറ്റിവെച്ചിരിക്കുന്നു, നിങ്ങളുടെ സഹകരണത്തിനും പ്രാര്‍ത്ഥനകള്‍ക്കും പിന്തുണയ്ക്കും ക്ഷമയ്ക്കും നന്ദി.' സംഘാടകര്‍ അറിയിച്ചു. ആശുപത്രിയില്‍ നിന്നുള്ള ചിത്രം വേടന്‍ ഇന്‍സ്റ്റഗ്രാം സ്റ്റോറിയായി പങ്കുവെച്ചിരുന്നു.

Rapper Vedan in intensive care; concert in Qatar postponed