തിരുവനന്തപുരം: പാലക്കാട് എംഎൽഎ രാഹുൽ മാങ്കൂട്ടത്തിലിനെതിരെ ലൈംഗിക പീഡന പരാതി നൽകിയ യുവതിയുടെ മൊഴി പൊലിസ് രേഖപ്പെടുത്തി. പ്രലോഭിപ്പിച്ച് പീഡിപ്പിച്ചെന്നും, ഗർഭഛിദ്രത്തിന് നിർബന്ധിച്ചുവെന്നും യുവതി മൊഴി നൽകിയിട്ടുണ്ട്. ഈ മൊഴിയുടെ അടിസ്ഥാനത്തിൽ എംഎൽഎക്കെതിരെ കേസെടുക്കാനുള്ള നടപടികൾ പൊലിസ് ആരംഭിച്ചു.

ഗുരുതര ആരോപണങ്ങൾ

രാഹുൽ മാങ്കൂട്ടത്തിൽ തന്നെ പ്രലോഭിപ്പിച്ച് ലൈംഗികമായി പീഡിപ്പിക്കുകയും ഗർഭഛിദ്രത്തിന് വിധേയമാക്കുകയും ചെയ്തുവെന്നാണ് യുവതി പൊലിസിന് നൽകിയ മൊഴി.മൊഴി രേഖപ്പെടുത്തിയതിന് പിന്നാലെ രാഹുൽ മാങ്കൂട്ടത്തിലിനെതിരെ ഇന്ന് തന്നെ കേസെടുക്കാനാണ് പൊലിസ് നീക്കം. തിരുവനന്തപുരം വലിയമല പോലീസ് സ്റ്റേഷനിലാണ് കേസ് രജിസ്റ്റർ ചെയ്യുക.

രഹസ്യമൊഴിയും തെളിവുകളും

കോടതി മുൻപാകെ യുവതിയുടെ രഹസ്യമൊഴി രേഖപ്പെടുത്താൻ പൊലിസ് അപേക്ഷ നൽകും. മുഖ്യമന്ത്രിയുടെ ഓഫീസിൽ നേരിട്ടെത്തിയാണ് യുവതി പരാതിയും വാട്സ്ആപ്പ് ചാറ്റുകൾ ഉൾപ്പെടെയുള്ള ഡിജിറ്റൽ തെളിവുകളും മെഡിക്കൽ രേഖകളും കൈമാറിയത്.കേസെടുക്കുന്ന സാഹചര്യത്തിൽ, രാഹുൽ മാങ്കൂട്ടത്തിൽ മുൻകൂർ ജാമ്യത്തിനായി അഭിഭാഷകരുമായി കൂടിയാലോചനകൾ നടത്തിയിട്ടുണ്ട്.സ്ത്രീകളെ ശല്യം ചെയ്തതിന് രാഹുൽ മാങ്കൂട്ടത്തിലിനെതിരെ ക്രൈം ബ്രാഞ്ച് നേരത്തെ സ്വമേധയാ കേസെടുത്തിട്ടുണ്ട്. ഇതിന് പുറമെയാണ് പുതിയ ലൈംഗിക പീഡന പരാതിയിൽ കേസെടുക്കുന്നത്.